DANIEL 6 - Pathian Laisiangthou (BSI)

Humpinelkai Kulh Ah Daniel

¹ Darias in a gam pumpi bial za leh sawmnih omsuak ding bial heutu za leh sawmnih gam tung ah a koih hi.

² Huan amaute tung ah, heutu lian thum, huaite lak ah Daniel khatna ahi a; huchi a hiai bial heutute’n huaite kiang ah thu a tut ua, kumpipa’n siatna a neihlouhna ding in.

³ Huchi in hiai Daniel, amah a lungsim hoihpen a om ziak in, heutuliante leh bial heutute tung ah a kan a val a bawl in a om a; kumpipa’n gam pumpi tung ah amah koih a ngaihtuah hi.

⁴ Huailai in heutuliante leh bial heutute’n gam thu a Daniel demna ding a zawng uhi; himahleh amah mi ginom a hih ziak in thupatna ding in a diklouhna a mu kei ua, amah a diklouhna leh khelhna muh in a omkei hi.

⁵ Huchi in hiai mite’n, “Hiai Daniel demna ding bangmah i mu kei ding; a Pathian dan a amah demna ding i muh kei ngal leh” a kichi uhi.

⁶ Huan hiai heutuliante leh bial heutute kumpipa kiang ah a kikhawm ua, a kiang ah hichibang in, “Aw, kumpipa Darias, tangtawn in dam in!

⁷ Gam heutulian tengteng, heutute leh bial heutute, dantheimite leh ukpipate, kumpi thuseh bawlkhiak a, khamna khauhtak bawl ding in a kikum khawm uhi. Huchi in mi kuapeuh, nang chih louh, Aw kumpipa, ni sawmthum sung a pathian hiam mihing hiam lak a ngetna a bawl leh, humpinelkai huangsung a paihlut in a om ding hi.

⁸ Tuin, Aw kumpipa, khamna hihkip inla, laigelh ah na min gelh in; huchi a Mid mite leh Persia mite dan bang a a kihihlamdan louhna ding in” a chi uhi.

⁹ Huchi in kumpipa Darias in laigelh leh khamna ah a min a gelhta hi.

¹⁰ Daniel in laigelh ah min a kigelhta chih a theih in a inn sung ah a lut a; a dantan sung a a tawlette Jerusalem lam a hon ahi uhi, a khukdin a, ni khat in thumvei, huchi in a thum a, a malam a a hih bang in, a Pathian ma ah kipahthu a gen hi.

¹¹ Huchi in hiai mite a kikhawm ua, Daniel a Pathian ma a thu ngen leh thum a mu uhi.

¹² Huchi in a hongpai nai ua, kumpipa khamna tungtang kumpipa ma ah a hong genta uhi; “Aw kumpipa, nang chih louh michih kuapeuh in ni sawmthum sung a pathian hiam mihing hiam kiang a ngetna a bawl leh humpinelkai huangsung a paih ding ahi chih khamna ah na gelh ahi kei maw” a chi uhi. Kumpipa’n, “Mid mite leh Persia mite dan lamdang theilou bang in huai dan kiplai ahi,” a chi hi.

¹³ Huan amau a dawng ua kumpipa ma ah, “Huai Daniel, Judah saltang tate lak a in nang leh na min gelhna khamna leng a hon limsak kei hi, Aw kumpipa, ni khat in thumvei ngetna a bawl hi” a chi uhi.

¹⁴ Hiai thute a zak in, kumpipa a lungkim hetkei a, amah suaktasak ding in Daniel tung ah lungtang a nga a; amah hutkhiak tum in nitum tan a semgim hi.

¹⁵ Huchi in hiai mite kumpipa kiang ah a kikhawm ua, kumpipa kiang ah, “Aw kumpipa, khamna hiam thuseh hiam kumpipa’n a hihkipsa hihlamdan theih a hihlouh Mid mite leh Persia mite dan ahi chih thei in” a chi uhi.

¹⁶ Huchi in kumpipa’n thu a pia a, Daniel a honpi ua, humpinelkai huangsung ah a paita uhi. Huan kumpipa’n thu a gen a, Daniel kiang ah, “A nna nasep gige na Pathian in a hon suaktasak ding” a chi hi.

¹⁷ Huan suang khat a honla ua, huangsung gong ah a koih ua; kumpipa’n amah suaisawnna zungbuh leh a tapate suaisawnna zungbuh in suai a namta hi; Daniel tungtang thu a bangmah hihlamdan theih a hihlouhna ding in.

¹⁸ Huchi in kumpipa a inpi ah a pai a, anngawl in, tumging leh nopbawlna a khawlsak in a zanhak a; amah lah a ihmu theikei hi.

¹⁹ Huchi in kumpipa zingsang in beltak in a thou a, humpinelkaite huangsung lam ah kintak in a vahoh hi.

²⁰ Huangsung lam a Daniel kiang a a hongpai nailai in, kah aw in a kikou a; kumpipa’n thu a gen a Daniel kiang ah, “Aw Daniel, Pathian hing sikha, a nna nasep gige, na Pathian in humpinelkaite a kipan nang hon suaktasak thei hiam?” a chi hi.

²¹ Daniel in kumpipa kiang ah, “Aw kumpipa, tangtawn in hing in!

²² Ka Pathian in a angel honsawl a, humpinelkaite kam a hong chihsaka, a hon hihna kei uhi; amah ma a keimah a hoihna muh a a om ziak leh, Aw kumpipa nangmah ma a leng gilou ka hihlouh ziak in” a chi hi.

²³ Huchi in kumpipa nakpitak in a kipak a, huangsung a kipan Daniel lakhe tou ding in thu a pia hi. Huchi in Daniel huangsung a kipan in a lakhe tou ua, a Pathian a muan ziak in a tung ah bangmah natna a kimu kei hi.

²⁴ Huan kumpipa’n thu a pia a, Daniel hekte huai mite a honpi ua, humpinelkai huangsung ah a pai ua, amau, a zi leh tate uh; humpinelkaite’n a maute huangsung taw a hong tunma un a man ua, a guhte uh a hihnen vek uhi.

²⁵ Huchi in kumpipa Darias in mite tengteng, namte, paute lei tengteng a tengte kiang ah lai a gelh a; “Na kiang uah lemna hihpun in om hen!

²⁶ Ka gam sehthum tengteng ah Daniel Pathian ma ah mite a ling un a lau ding uh: Amah Pathian hing, tangtawn a omkip, a gam hihsiat ahi ngeikei ding a; a thuneihna a om den ding hi chi in thupiak ka bawl hi.

²⁷ Aman a suaktasak a, a tankhia a, van leh lei ah chiamtehna leh thillamdangte a hih a; aman Humpinelkaite thilhihtheihna a kipan in Daniel a suakta sak hi.

²⁸ Huchibang in hiai Daniel Darias vaihawm lai leh Persia mi Kura vaihawm lai in a thupi mahmah hi.