DANIEL 4 - Pathian Laisiangthou (BSI)

Nebukadnezzar Mang Nihna

¹ Kumpipa, Nebukadnezzar mite tengteng, namte leh paute, lei tengteng a tengte kiang ah, na kiang uah lemna hihpun in om hen.

² Tungnungpen Pathian in keilam a a bawl chiamtehnate leh thillamdangte etsak kei ading in hoih leh a kilawm hi.

³ A chiamtehnate thupi hina mahmah e: a thillamdangte thilhihthei hina mahmah uh e: a gam tangtawn gam ahi a, a vaihawmna a khang a khang in a om hi.

⁴ Kei Nebukadnezzar, ka inn sung ah ka khawl a, ka inpi sung ah ka lum hi,

⁵ Hon lausak mang ka nei hi; ka lupna tung ah ngaihtuahnate leh ka lungtang mengmuhte’n hon hihbuai uhi.

⁶ Huaiziak in hilhchetna ka kiang a a kitheihsak ding un, Babulon mi pil tengteng ka ma a pi ding thupiak ka bawlta hi.

⁷ Huchi in mitkhialdawi tawite, bummite, Kaldaimite leh aisanmite a hongpai ua: a ma uah ka mang ka genta hi; himahleh a hilhchetna ka kiang ah a hon theisak theikei uhi.

⁸ Himahleh a tawptawp in ka ma ah, Daniel a min ka pathian min dungzui in Belteshazzar hiven, amah a Pathian siangthoute kha a omna ma ah mang ka genta hi.

⁹ Aw Belteshazzar, mitkhialdawi tawite heutupa, nang ah, Pathian siangthoute kha a om a, thuguk bangmah in nang a hon hihbuai kei chih ka theih ziak in ka mang a ka muh mengmuhte leh a hilhchetna honhilh in, ka chi hi,

¹⁰ Ka lupna tung a ka lutang mengmuhte hichibang ahi: Ngai in, lei laizang ah sing khat ka mu a, huai sing sandan a thupi mahmah hi.

¹¹ Huai sing a khangtou a, a honghat a, a sanna in van a suntou a, lei tengteng tawp huai ah a kimu hi.

¹² A nahte a hoih un, a gah pha mahmah a; huai ah mi tengteng ading in an a om hi: gamsate a nuailim ah a om ua, van a vasate a hiangte ah a teng ua, sa tengteng huai a kipan in a kivak uhi.

¹³ Ka lupna tung a ka lup in mengmuhte ka mu a, ngai in, van a kipan in vengmi siangthou khat a hong paisuk hi.

¹⁴ Ngaihtak in a kikou a, hichibang in a chi a: Sing phuk inla, a hiangte satkhia inla, a nahte singkhia inla, a gah thehzak in: a nuai a kipan gamsate leh a hiang a kipan vasate hawlmang in om uhen.

¹⁵ Himahleh a bulsum leh a zungte pen hawi in, sik leh dal gui a henkhawm in, gam a loupa nou lak ah nutsiat in om hen. Van daitui in kawt henla, a tantuan lei a loupa lak a gamsate toh hi hen.

¹⁶ Huan a tung a hun sagih a bei mateng mihing lungsim kikheng in a kiang ah gamsa lungtang piak hi hen.

¹⁷ Tungnungpen in mite gam ah vai a hawm a, a utna peuh kiang ah a pia a, mi niampente ading khesak chih mihingte’n a theihna ding un vengmite’n a genkhia ua, misiangthoute’n a phuangkhia uhi.

¹⁸ Hiai mang kei kumpipa Nebukadnezzar in ka man hi: huan nang, Aw Belteshazzar, a hilhchetna genkhia in, ka gam a mipilte tengteng in ka kiang ah a hilhchetna a hon theisak theikei ua; himahleh nang na hihthei, nang a pathian siangthoute kha a om ziak in a chi hi.

Daniel In Mang Hilhchian

¹⁹ Daniel, a min Belteshazzar in, sawtloukal lamdang a sa a, a ngaihtuahnate’n amah a patausak hi. Kumpipa’n a dawng a, “Belteshazzar, mang hiam a hilchetna hiam in nang hon patausak kei hen” a chi hi. Belteshazzar in a dawng a, “Ka toupa, mang nang hon mudahte lamthu hi henla, a hilhchetna na galte lam thu hileh maw.

²⁰ Na sing muh, hong khang a, honghat a, a sanna in van a suttouh a, hiai a kipan lei tengteng a kimuhna;

²¹ A nahte a hoih a, a gah pha mahmah a, huai ah tengteng ading an a om a; huai nuai ah gamsate a teng ua, a hiang ah van a vasate a teng uhi:

²² Aw kumpipa, huai hong khang a, honghat na muh, nangmah na hi a: na thupina a khang in, van a sun in, na vaihawmna leitawp pha in ahi.

²³ Van a kipan a kumpipa’n vengmi siangthou hong paisuk a muh, Sing phuk inla, hihgawp in; himahleh a bulsum leh a zungte hawi in, sik leh dal gui a henkhawm in gam a loupa nou lak ah van daitui in kawt henla, huan a tantuan gamsate kiang ah hi in, a tung a hun sagih a bei matan, chih thu ahihleh;

²⁴ Aw kumpipa, hiai a hilhchetna ahi, ka toupa kumpipa tung a hongtung Tungnungpen thupiak ahi:

²⁵ Mite a kipan hawlkhiak in na om dia; gamsate kiang ah na khosa ding a, bawngtalte bang a loupa neksak in na om ding a; van daitui in na kawt ding a; na tung ah hun sagih a bei ding; mite gam ah Tungnungpen in vai a hawm a; a ututna kiang ah a pia chih na theih ma tan.

²⁶ Huan sing bulsum leh a zungte nutsiat ding a thupiak a om pen ahihleh; van Pathian in vaihawm petmah ahi chih na theihkhit chiang in na gam nang kiang a piakkik ding genna ahi.

²⁷ Aw kumpipa, huaiziak in k’on thuhilh nang ading in pomtuak leh tagahte kiang a chitna etsakna in na thulimlouhnate tawpsan in; na hamphatna suksau a a omkhak zenzen leh a chi hi.

Nebukadnezzar Hihniamna

²⁸ Hiai tengteng kumpipa Nebukadnezzar tung ah a hongtung hi.

²⁹ Kha sawm leh nih bei in Babulon a kumpi Inpi sung ah a vialvak hi.

³⁰ Kumpipa’n thu a gen a, hiai Babulon thupi, kumpipa tenna mun ding a, ka thilhihtheihna hatna leh ka thuneihna thupina ding a ka lam ahi kei maw? chi in.

³¹ Kumpipa kamsung a thu a omlai mahmah in, van a kipan aw a hong suakkhia a, “Aw kumpipa Nebukadnezzar, na kiang a thugen ahi: nang a kipan gam a paimangta hi.

³² Tungnungpen in mite gam ah vai a hawm a, a ututna kiang ah a pia chih na theih matan, mihingte a kipan in hawlkhiak na hi ding a, na tenna gamsate kiang ah ahi ding; bawngtalte bang a loupa ne ding a bawl in na om dia; na tung ah hun sagih a bei ding” a chi hi.

³³ Huai bang thil a hongtungta a: mite a kipan a hawlkhiak in a om a; bawngtalte bang in loupa a ne petmah hi; a pumpi van daitui in a kawt a; a sam muvanlai multe a hong bang a, a chinte vasate chinte a hong bang hi.

Nebukadnezzar In Pathian Phat

³⁴ Huan nite bei in kei Nebukadnezzar in vanlam ah ka mitte ka suantou a, ka theihtheihnate ka kiang ah a hong kiknawn a, huchi in Tungnungpen ka pahtawi hi; amah tangtawn a om gige phat in ka zahtak hi: A vaihawmna tangtawn vaihawmna ahi a, a gam a khang a khang in ahi, chi in:

³⁵ Huan lei a teng tengteng bangmahlou bang a ngaih ahi ua: huan van sepaih pawl leh lei a tengtengte lak ah a deihlam bang in a hihzel a: kuamah in a khut a len thei un, a kiang ah, Bangdia hih na hia? a chi theikei uhi.

³⁶ Huai laimah in ka theihtheihna ka kiang ah a hong kiknawn a; ka gam thupina, ka lalna leh hoihna ka kiang ah a hongkik a; ka midotte leh ka toupate’n kei a hongzong ua; huchi in ka gam ah kiptak in ka ding a, kei ding in thupina lian mahmah behlap in a omta hi.

³⁷ Huchi in kei Nebukadnezzar in van Kumpipa phat a pahtawi in ka zahtak a; a thilhih tengteng thutak ahi a, a lampite vaihawmna ahi a, kisatheitak a omte a hihniam thei hi.