DANIEL 3 - Pathian Laisiangthou (BSI)

Kumpipa Dangkaeng Milim Biak Ding Thupiak

¹ Nebukadnezzar kumpipa’n dangkaeng milim, tong sawmguk a sang, tong guk a lian a bawl a; Babulon bial a Dura phaizang ah a dingsak hi.

² Nebukadnezzar kumpipa’n bial heutute, vaihawmmite, ukpipate, thukhenmi, sumkemmi, thudotmi, dansiammi leh bial vaihawmmi tengteng a kaikhawm a, Nebukadnezzar kumpipa’n a dinkhiak milim kipahpihna bawlna a hongpai ding in mi a sawlkhia hi.

³ Huchi in bial heutu vaihawmmi, ukpipa, thukhenmi, sumkemmi, thudotmi, dansiammi leh bial vaihawmmi tengteng kumpipa Nebukadnezzar in a dinkhiak sak milim kipahpihna ah a hong kikhawm vek uhi; Nebukadnezzar adin khiaksak milim ma ah ading uhi.

⁴ Huaitak in tangkou ngaihtak in a kikou a, “Na kiang ua thupiak ahi, Aw mite, namte, paute,

⁵ Pengkul, tamngai, kaihging, gosem, nawtging, tumging pengnih nei leh tumging chichih ging na zak chiang un, puk unla, kumpipa Nebukadnezzar in adin khiaksak dangkaeng milim bia un:

⁶ Huan kuapeuh a bia a puklou a, beloute meipi kuang zuazua sung ah huai hun mah a paihlut ding ahi” a chi hi.

⁷ Huaiziak in huailai a mi tengteng in pengkul, tamngai, kaihging gawsem, nawtging leh tumging chichih ging a zak un, mi tengteng, namte, paute, a puk ua, kumpipa Nebukadnezzar in a tunkhiak dangkaeng milim a bia uhi.

Daniel Lawm Thumte Heksiatna

⁸ Huchihlai in Kaldai mi kuate hiam a hongpai nai ua, Judah tuailaite a hong hekta uhi.

⁹ A dawng ua kumpipa Nebukadnezzar kiang ah, “Aw kumpipa, tangtawn in dam in!

¹⁰ Aw kumpipa, nang thupiak na bawl a, mi chiteng in pengkul, tamngai, kaihging, gawsem leh nawtging, tumging pengnih neite leh, tumging chichih a zak chiang ua, a puk ding ua dangkaeng milim a biak ding uh chi in.

¹¹ Kuapeuh puklou a belou, meipi kuang zuazua ah paihlut ding” chi in,

¹² Babulon bial a thu leh la tung a na sehsa Judah kuate hiam a om ua, Sadrak, Meshak, leh Abednego; hiai mite’n, Aw kumpipa, nang a hon limsak kei ua; na pathiante na a semkei ua na dinkhiak sak dangkaeng milim leng a bekei uh, chi in.

¹³ Huchi in Nebukadnezzar heh leh thangpai in Sadrak, Meshak, Abednego honpi ding in thu a pia hi.

¹⁴ Huchi in hiai mite kumpipa ma ah a honpi ua, Nebukadnezzar in a dong a a kiang uah, “Aw Sadrak, Meshak leh Abednego, ka pathian nna nasep louh ua, dangkaeng milim ka tunkhiak na biak louh uh, na tup mawng uhia?” a chi hi.

¹⁵ Tuin na kimansak unla chik hunpeuh a pengkul, tamngai, kaihging, gawsem, nawtging leh tumging pengnih nei leh tumging chichih ging na zak chiang un puk unla milim ka tunkhiak bia un, hoihtak in; himahleh na biak kei ua leh meipi kuang zuazua sung ah huai hunmah in a hon pailut ding uh; huchi in ka khut a kipan a nou hon hunkhe ding huai pathian kua hi ding ahia?

¹⁶ Sadrak, Meshak leh Abednego in a dawng ua kumpipa kiang ah, “Aw Nebukadnezzar, hiai thu ah k’on dawn uh a kiphamoh kei hi.

¹⁷ Huchibang ding ahihleh, Aw kumpipa, a na ka sep uh ka Pathian un meipi kuang zuazua a kipan kou a hon hunkhe thei hi, na khut apan a hon hunkhe ding hi.

¹⁸ Ahihkeileh leng, na thei in, Aw kumpipa, na pathiante na ka semkei ding ua, na dinkhiak dangkaeng milim leng ka be sam kei ding uh” a chi uhi.

Daniel Lawm Thumte Thahdia Thutanna

¹⁹ Huchi in Nebukadnezzar a thangpai petmah a, Sadrak, Meshak leh Abednego tung ah a mel putdan a kikheng hial hi; huaiziak in meipi a sat ngeina sang a mun sagih a a satsak ding in thu a pia hi.

²⁰ Huan a sepaihpawl lak a om mihat kuate hiam Sadrak, Meshak leh Abednego hen ding leh meipi kuang zuazua sung a pailut ding in thu a pia hi.

²¹ Huchi in hiai mite a puansilhlai uh, samul puanak toh, puanak kawnggak nei leh a puansilh dangte utoh, mei kuang zuazua lak ah a pailutta uhi.

²² Huchi in kumpipa thupiak a khawk mahmah ziak leh meipi a sat mahmah ziak in huai mi Sadrak, Meshak leh Abednego domte meikuang in a hul lumta hi.

²³ Hiai mi thumte, Sadrak, Meshak leh Abednego te meipi kuang zuazua lak ah hensa in a puk uhi.

²⁴ Huchih lai in Nebukadnezzar in lamdang a sa mahmah hi: kintak in a thoukhia a: amah thudotmite kiang ah thu a gen a, “Meilak ah mi thum hensa in i pailut uh ahi kei maw?” a chi hi. Amau a dawng ua kumpipa kiang ah, “Dik, Aw kumpipa” a chi uhi.

²⁵ Aman a dawng a, “Ngai un, mi li phelsa a om, meilak a vak in ka mu a, bangmah a chi kei uh, a mi lina melputdan Pathian tapa a bang hi” a chi hi.

Daniel Lawm Thumte Hotkhiakna Leh Maisanna

²⁶ Huchi in Nebukadnezzar meipi kuang zuazua gei chin ah a hongpai a; thu a gen a, “Sadrak, Meshak leh Abednego, nou Pathian Tungnungpen sikhate, hong pawtkhia unla, hiai lam ah hongpai un” a chi hi. Huchi in Sadrak, Meshak leh Abednego, meilak ah kipan in a hong pawtkhia uhi.

²⁷ Huan bial heutute, vaihawmmite, ukpipate leh kumpipa dantheimite, omkhawmte’n hiai mite, mei in a pumpi tung uah hihtheihna a neikei a, a luzang ua sam leng a kangdang kei a, a puansilh uleng a lamdang kei a, meigim leng a namkei uh chih a mu uhi.

²⁸ Nebukadnezzar in thu a gen a, “Sadrak, Meshak leh Abednego Pathian in a angel sawl a, amah muang a sikhate hunkhia a, kumpipa thu hihlamdang a, amau Pathian loungal pathian na a seplouh ua a biaklouhna ding ua pumpite uh pepa phat in om hen,

²⁹ Huaiziak in thupiak ka bawl hi, michih, namchih, pauchih, Sadrak, Meshak leh Abednego Pathian gensiatna thil banghiam gente, atnen in a om dia, a innte uh ekvum a bawl ahi ding hi: hichibang a hunkhe thei pathian dang a omlouh ziak in” a chi hi.

³⁰ Huchi in kumpipa’n Sadrak, Meshak leh Abednego, Babulon bial ah a kaisang sakta hi.