DANIEL 2 - Pathian Laisiangthou (BSI)

Kumpipa Nebukadnezzar Mangneihna

¹ Nebukadnezzar vaihawm kum nih kum in Nebukadnezzar in mang a nei a; a lungsim a buai mahmah a, a ihmu theita kei hi.

² Kumpipa’n mitkhialdawitawi leh, bummi leh, aisanmi leh Kaldaimite, kumpipa mang hilh ding a sap ding thu a pia hi. Huchi in a honglut ua kumpipa ma ah a hong dingta uhi.

³ Huchi in kumpipa’n a kiang uah, “Mang ka nei a, mang thei ding in ka lungsim a buai mahmah hi” a chi hi.

⁴ Kaldai mite’n kumpipa kiang ah Suria pau in, “Aw kumpipa, tangtawn in dam in; na sikhate na mang hilh in, a hilhchetna ka ensak ding uh” a chi uhi.

⁵ Kumpipa’n a dawng a, “Kaldai mite kiang ah, hiai thil kei a kipan a paikheta; mang leh a hilhchetna ka kiang a n’on theihsak kei ua leh atnen in na om ding ua, na innte uh ekvum a honghi ding.

⁶ Himahleh mang leh a hilhchetna n’on theihsak ua leh kei a kipan in thilpiakte leh kipahman leh nakpitak a zahtakna na mu ding uh; huaiziak in mang leh a hilhchetna hon ensak un” a chi hi.

⁷ A nihveina ding in amau a dawng ua, “Kumpipa’n mang honhilh henla, kou a hilhchetna ka ensak ding uh” a chi uhi.

⁸ Kumpipa’n a dawng a, “Kei a kipan hiai thil a paikheta chih na muh ziak un, hun hihsau tum na hi uh chih ka theitel hi.

⁹ Himahleh mang ka kiang a n’on theihsak kei uleh, nou ading in dan khat kia a om; hun a kikhen tan a, ka ma a thu zuau leh sia gelkhol na hih ziak un; huaiziak in mang honhilh unla, a hilhchetna n’on ensak thei uh chih ka thei ding” a chi hi.

¹⁰ Kaldai mite’n kumpipa ma ah a dawng ua, “Kumpipa thudot ensak thei leitung ah kuamah a omkei; kumpipa hiam, toupa hiam, vaihawmmi kuamah in mitkhialdawitawi kuamah hiam, bummi kuamah hiam, Kaldai mi kuamahmah huchibang thu a dot ngeilouh ziak un.

¹¹ Kumpipa thildeih vangtak ahi, pathiante a omna uh sa toh hiloute chih louhngal, midang kuamah in kumpipa ma ah huai a ensak theikei ding uh” a chi uhi.

¹² Hiai ziak in kumpipa a heh mahmah a, a thangpai tuntuna, Babulon mi pil tengteng hihmang ding in thu a peta hi.

¹³ Huchi in thupiak piakkhiak ahita a, mipilte thah ding ahi ta uhi; Daniel leh a lawmte thah ding in a zong uhi.

Pathian In Mangkhiakna Daniel Theisak

¹⁴ Huchi in Daniel in kumpipa veng sepaih zaheutu Ariok, Babulon mipilte that ding a kuankhe pa kiang ah thuhilhna leh thupil toh dawnna a kiksak hi:

¹⁵ Ariok kumpipa sepaih zaheutu a dong a a kiang ah, “Bangdia kumpipa a kipan thupiak huchitel a kin ahia?” a chi hi. Huchi in Ariok in Daniel kiang ah a thil omdan a theisak hi.

¹⁶ Daniel a lut a, amah adia hun sehsak ding in kumpipa a ngen hi, huchi a a hilhchetna kumpipa a etsak theihna ding in.

¹⁷ Huchi in Daniel a inn ah a pai a, Hananiah, Misael, Azariah, a lawmte kiang ah huai thil a theisakta hi.

¹⁸ Huchi a amaute’n hiai thuguk tanchin a van Pathian chitnate a nget theihna ding un; huchi a Daniel leh a lawmte Babulon a mipilte a lakte toh a manthat louhna ding un.

¹⁹ Huchi in zan mengmuhna ah Daniel kiang ah thuguk taklat in a omta hi. Daniel in van Pathian a phat hi.

²⁰ Daniel in a dawng a: Tangtawn tangtawn in Pathian min phat in om hen; pilna leh hatna amah a ahi, a chi hi;

²¹ Aman hunte leh hunbite a hih lamdang a; kumpipate a suankhia, kumpipate a tung khia a; mipilte kiang ah pilna a pia a, theihsiamna theite kiang ah theihna a pia hi.

²² Thil thukte leh thil gukte a taklang a, mial a om bang ahia a thei a, a kiang ah khovak a om hi.

²³ Na tung ah ka kipak a, k’on phat hi, Aw nang ka pipute Pathian, pilna leh hatna hon pepa, nang k’on nget uh ka kiang ua hon theisakpa’n; kumpipa thu ka kiang uah n’on theisakta ngal a, a chi uhi.

Daniel In Kumpipa Mang Leh Hilhchetna Gen

²⁴ Huaiziak in Daniel, kumpipa’n Babulon mipilte hihse dia a sehpa, Ariok kiang ah a hoh a; a vahoh a a kiang ah hichibang in a chi hi; “Babulon mipilte hihmang ken; kumpipa ma ah hon pilut inla, kumpipa kiang ah a hilhchetna ka ensak ding” a chi hi.

²⁵ Huchi in Ariok in kintak in kumpipa ma ah Daniel a pilut a, a kiang ah hichibang in a chi a; “Judah saltangte lak ah mi khat ka mu a, aman kumpipa kiang ah a hilhchetna a theisak ding” a chi hi.

²⁶ Kumpipa’n a dawng a Daniel kiang ah, a min Belteshazzar hiven, “Mang ka neih n’on theisak thei in, a hilhchetna n’on theisak thei ding maw?” a chi hi.

²⁷ Daniel in kumpipa ma ah a dawng a, “Thuguk kumpipa’n a nget mi pil hi in, aisanmite hileh, kumpipa kiang ah a ensak theikei ding uhi.

²⁸ Himahleh van ah Pathian a om a aman thugukte a taklang hi; ni nanung lam a bang om ding ahia chih kumpipa Nebukadnezzar kiang ah a theisak hi. Na lupna tung a na lutang mengmuhna leh na mang hiaite ahi:

²⁹ Nang na hihleh aw kumpipa na lupna tung ah na lungsim sung ah na ngaihtuahnate a hongom ua; tunung chiang a bang ahia hongom ding thu: huan amah thugukte na kiang a taklangpa’n bang ahia hongom ding na kiang ah a theisakta hi.

³⁰ Himahleh kei bel pilna mihing dangte sang a pilna ka neih tamzawk ziak a hiai thuguk ka kiang a taklat ahi kei a; himahleh a hilhchetna kumpipa kiang a theihsak a hih theihna ding leh nang na lungtang ngaihtuahte na theihna ding ahizaw hi.

³¹ “Aw kumpipa ngai in, nang milim thupitak na muta hi. Hiai milim hattak mai, a vakna thupi mahmah, na ma ah ading a; a mel a kihtakhuai mahmah hi.

³² Hiai milim ahihleh a lutang dangkaeng hoih ahi a, a awm leh a bante dangka, a gil leh a pheipite dal,

³³ a khete sik, a khezungte sik leh tungman khenkhat kihel ahi.

³⁴ Suang khut a seklouh huai milim a khepek sik, leh tung deng a kitam nen sak dimdem tan in na mu hi.

³⁵ Huchi in sik, tungman, dal, dangkate leh dangkaeng toh a kitam nen khawm vek ua, nipi buhphual a buhsi bang mai a honghi ua; huchi in huih in huaite a mutmang a, huai milim dengzan suangpi pen mual thupi a hongsuak a, lei pumpi a dimta hi.

³⁶ “Hiai mang ahi a; kumpipa ma ah a hilhchetna ka gen ding uhi.

³⁷ Aw kumpipa, nang kumpipate Kumpipa, van Pathian in a kiang a gam leh thilhihtheihna, hatna leh thupinate a piakna na hi.

³⁸ Koipeuh a mite tate a tenna uah, gam a sate leh van a vasate na khut ah a honpia hi; amau tengteng tung a vaihawm ding a a bawl dangkaeng lutang na hi.

³⁹ Nang nung in nang sang a niamzaw gamdang khat a hong dingkhe ding; huchi in lalgam thumna dang, leitung tengteng a thunei ding in.

⁴⁰ Huan gam lina sik bang in a hat ding a, sik in a keknen sak a thil tengteng a nuaisiah bang in sik in hiaite tengteng a delhzan bang in, a keknen sak in, a delhzan ding hi.

⁴¹ Huan khepek leh khezung na muhte, a khen belvelmi tungman leh a khen sik ahihleh gam hawmzak ahi ding a; himahleh asung ah sik hatna a om ding a, sik tungman toh helkhawm na muh bangtak in.

⁴² Huan khepek khezungte, a khen sik leh a khen tungman pen ahihleh, huchibang in gam hatna chiang nei, kitapna chiang nei a hi ding hi.

⁴³ Huan sik leh tungman kihel na muh pen ahihleh, mite chi toh amau a kitok hel ding uh; himahleh sik leh tungman a kigawm theihlouh bang in a ki kawikip kei ding uhi.

⁴⁴ Huai kumpipate damlai in van Pathian in gam suksiat a om ngeilou ding, a thuneihna midang kiang a nutsiat a om ngei samlou ding, a hon dingkhe sak ding a; himahleh hiai gam tengteng a kitam nen sak ding a, a suse vek ding, amah bel tangtawn in ading ding hi.

⁴⁵ Huchi in Suangpi mual a kipan khut a sek louh hong omkhia a, sik, dal, tungman, dangka leh dangkaengte a kitam sak dimdem na muh pen ahihleh; tunung chiang a bang ahia hongom ding kumpipa kiang ah Pathian thupi in a theisakta hi: mang omzia theihsa ahi a, a khiakna a kichian hi” a chi hi.

Kumpipa’n Daniel Kipahman Pia

⁴⁶ Huaitak in Nebukadnezzar in a mai a leisi in Daniel a bia a, thillat leh gim namtui a kiang a lan ding in amau thu a pia hi.

⁴⁷ Kumpipa’n Daniel a dawng a, “Chihtaktak in na Pathian, pathiante Pathian leh, kumpipate Toupa leh, thugukte taklangpa ahi; hiai thuguk taklang ding a hihtheihna na neih ziak in” a chi hi.

⁴⁸ Huchi in kumpipa’n Daniel a liansak a, thilpiak tampi a pia hi, Babulon bial pumpi a heutu leh Babulon mipilte tengteng tung a ukpipa pen ding in a bawlta hi.

⁴⁹ Daniel in Sadrak, Meshak, Abednego, Babulon bial thu leh la tung a koih ding in kumpipa kiang ah a ngen hi; himahleh Daniel zaw kumpipa kongpi ah a om hi.