DANIEL 11 - Pathian Laisiangthou (BSI)

Aigupta Leh Suria Lalgam

¹ Huan kei ka hihleh, Mid mi Darias kum khatna kum in, amah hihkip ding leh hihhat ding in ka ding hi.

² Huchi in thutak k’on ensak ding hi. “Ngai in, Persia ah kumpipa thum a hong dingkhe lai ding ua; a lina pen amaute tengteng sang in nakpitak in a hausa zaw ding hi; huchi a a hauhna ziak a a honghat mahmah chiang in, Grik dou ding in mi tengteng a tokthou ding hi.

³ Huan kumpipa hattak a hong dingkhe ding a, thuneihna thupi toh vaihawm ding leh a deihdan a hih ding in.

⁴ A hong dinkhiak chiang in, a gam a kek ding a, van huih lite lam ah a hawmzak ahi ding; amah suan hilou in vai a hawm dia, himahleh amah thilhihtheihna a neikei ding; a gam bohkhiak leh midangte kiang a piak in a om ding hi.

⁵ “Huchi in simlam kumpipa a hat ding a, a sepaih heutu khat amah sang in a hatzaw ding a, gam a nei ding a; a vaihawmna thupi ahi ding.

⁶ Huan kum bangzah hiam nung in, a kizom khawm ding ua; simlam kumpipa tanu mallam kumpipa kiang ah kituahna bawl ding in a hongpai dia; himahleh hiai kizopna in hunsawt a daihkei ding hi; huai ni’n amah vengmite leh a pa leh amah kithuahpihpa leng piakkhiak in a om ding hi.

⁷ Himahleh a zung a kipan a hiang selnou mun ah mi khat a hong dingkhe ding a; huai tuh sepaih pawl kiang ah a hongpai dia; mallam kumpipa kulhpi sung ah a lut dia; amaute dou in thil a hih ding a, a vualzou ding hi;

⁸ Huchi in a pathiante u leng, a milim sun te utoh, huan a dangka leh dangkaeng tuium-belsuan hoihte utoh, Aigupta ah aman a sal in a lakik ding hi; huan mallam kumpipa a kipan kum bangzah hiam a kidang koih ding hi.

⁹ Huan simlam kumpipa gam ah a hongpai dia, himahleh amah gam lam ah a kiknawn ding hi.

¹⁰ “Huchi in a tapate’n a dou ding ua; sepaih thupi tampi a kaikhawm ding ua; huaite a dimlet in a hong kuan ding ua, a paisuak ding uhi; huan a kiknawn ding ua, amah kulh tan pha hial in a dou ding uhi.

¹¹ Huchi in simlam kumpipa a heh mahmah ding a, a hong kuankhe dia mallam kumpipa a kidou pih ding hi. Mallam kumpipa’n sepaih a tam a tam tungkhe mahleh mipite a khut a piak in a om ding hi.

¹² Huan mipite pimang in a om ding ua, a lungtang sansak in a om ding hi; huchi in sang sawm tampi a puksak ding a, himahleh a vualzou kei ding hi.

¹³ “Huan mallam kumpipa a hongkik dia, a ma sang a thupizaw mipi a hon tungkhe ding hi; kum bangzah hiam nung in sepaih hon thupi leh van tampi toh a hong kuan ding hi.

¹⁴ Huan huai hunte ah simlam kumpipa dou in mi tampi a dingkhe ding uh; na mite lak a hiamgam tate leng mengmuhna hihkip ding in a hong ki domkang ding uh; himahleh a puk ding uhi.

¹⁵ Huchibang in mallam kumpipa a hong dia, panmun a bawldia, khopi kulhneite a la ding; simlam sepaihte leh a mi telte’n leng a nang kei ding ua, nan na ding in hatna leng a omkei ding hi.

¹⁶ Himahleh amah dou dia hong paipa’n amah deihlam bang in a hih ding a, a ma ah kuamah ading kei ding; gam thupi ah ading dia, a khut ah siatna a om ding hi.

¹⁷ “A gam pumpi thahatna toh hongpai a tum chiltel ding a, simlam kumpi gam toh kizopna a bawl ding in a tanu a kiang ah a pe ding hi; himahleh a thilsawm a lohsam ding a, a phattuam pih sam kei ding hi.

¹⁸ Hiai khit in tuikulh lam a nga dia, gam tampite a zou ding hi; himahleh gamdangmi sepaih heutu khat in amah a zou dia, a mi simmawh na a tawp sak ding; ahi, a mi simmohna amah tung ah a kibungsak ding hi.

¹⁹ Huai hun chiang in amah gam kulhpi lam ah a kiknawn dia; himahleh a kisuipai in a puk dia, muh in a om nawn takei ding hi.

²⁰ “Huai hun chiang in amah mun ah mi khat a hong dingkhe dia, aman a gamsung puahna ding in leiman khonpa gam thupi tan a palsuak sak dia; himahleh ni tamlou zoh in hehna leh kidouna hilou in hihsiat in a om ding hi.

Suria Kumpipa Hoihlou

²¹ “Huan a mun ah mi zahpihhuai khat a hong dingkhe dia, huai lalgam in zahtakna a piaklouhna pa uh; himahleh mite bit a kisaklai un a hongpai ding a, maitang phatna in gam a la ding hi.

²² Huan sepaih honte a ma ah taihmang in a om ding ua, sepaih honpite leh thukhun heutupa leng a hih manthat in a om ding uhi.

²³ Huchi in amah toh pankhawmna kibawl nung in lepchiahtak in thil a hih ding a; a hong kuantou dia, nam neuchik toh honghat ding ahi.

²⁴ Gam khen a hausa mahmah namte a bitlai pen un dou ding in a kuantou ding a, a pipute’n a hih zohlouh uh a hon hihzou dia, a pipute’n leng a hih ngeilouh uh a lak uah samat leh gallakte leh vante a hawmzak dia, ahi, kulhnei khopite dou ding in a guksawm ding hi, himahleh hun khat kia a daih ding hi.

²⁵ “Huan sepaih thupi toh simlam kumpipa dou ding in a thilhihtheihna leh a hatna a tokthou ding a; huchi in simlam kumpipa’n sepaih a thupi a thupi leh hat in kidouna ah a dou thuk ding hi; himahleh amah siatna ding a a guk a thusawm a hih ziak in ading zoukei ding hi.

²⁶ Ahi, a an nete’n amah a hihmang ding ua, a sepaihte phiatmang in a om ding uhi; huchi in tampi thah in a puk ding uhi.

²⁷ Kumpipa nihte a hih uleh gilou lungtang pukawm in dohkan khat ah a tukhawm ding ua, zuau in a kikhem tuah ding uhi; himahleh huntawp a tung ding a sehsa a hih ziak in a lohching kei ding uhi.

²⁸ Huai hun chiang in simlam kumpipa tuh gallak thupi toh a gam lam ah a kiknawn dia; huchi in a lungtang in thukhun siangthou a dou ding; a utut a hih ding a amah gam ngei ah a kiknawn ding hi.

²⁹ “Hun sehsa ah a kiknawn dia, simlam ah a hongpai dia; himahleh hun masa hiam hun nanung bang ahi kei ding hi.

³⁰ Amah dou dia Kittim longte hongpai ding a hih ziak in; huaiziak in a dah ding a, a kiknawn dia; thukhun siangthou dou in a hehna a sungbaw ding a a utut a hih ding hi; a hong kiknawn ngeingei dia, thukhun siangthou nungngat sante deihsakna a lak ding hi.

³¹ Amah lam ah sepaihte a pang ding ua, mun siangthoupen kulhpi mahmah a buahsak ding ua; haltum thillat gige a hihbei ding ua a hihgawp ding in kihhuai a tungkhe ding uhi.

³² Huan thukhun nungngatsante maitang phatna in a gilou tak in, aman a hekkawi dia; himahleh mi a Pathian uh theite bel a hat ding ua, thilhih minthangpente a hih ding uhi.

³³ Huchi in mite lak a theihsiamna neite, ni tampi sung, namsau leh meikuang, saltanna leh loh in a om mahle uh, mi tampi a thuhilh ding uhi.

³⁴ Huan a puk chiang un, panpihna tawmchik a ngah ding ua, himahleh maitangphatnate toh mi tampi in amau a pawlbawl ding uhi.

³⁵ A lak ua theihsiamna neite lak a mi khenkhatte, amaute bawlhoih ding leh, siangthousak ding leh amaute ngousak ding in, a puk ding uhi. Huntawp tanpha; hun sehsa ading a hihlai ziak in.

³⁶ “Huan kumpipa’n a deihlam bang in a hih dia; a kiliansak ding a, pathian chiteng tung ah a kikoih lian dia, pathiante Pathian dem in thil lamdangte a gen ding hi; thangpaihna a pichin matan a lohching ding; a tup chintensa a hih ding hi.

³⁷ A pipute pathiante leh numeite lunggulh leng a zahtak kei dia, pathian leng a zahtak kei ding; mi tengteng tung a amah kiliansak ding hi.

³⁸ Himahleh a man kulhpite pathian a pahtawi dia; a pi leh pute theih ngeilouh dangkaeng leh dangka leh suangmantamte leh thilthawnpiak manphate in amah a be ding hi.

³⁹ Huan gamdang pathiante panpihna in kulh muanhuaipen pente a sual ding a; kuapeuh amah hihna pomte kiang ah zahna lianzaw a pe ding a, tampi tung a vaihawm ding in a bawl dia, man nei in gam a hawm ding hi.

⁴⁰ “Huan huntawp chiang in simlam kumpipa’n amah a kidou pih ding; mallam kumpipa amah dou ding in pingpei bang in, kangtalaite toh, sakol tung tuangmite toh, long tampi toh a hong kuan ding hi; huchi in gamte ah a lut dia, a dimlet dia a paisuak ding hi.

⁴¹ Aman gam Siangthou leng a sim ding a, huchi in gam tampi zoh in a om ding hi; himahleh Edom leh Moab leh Ammon tate hausapate a khut a kipan suahtaksak in a om ding hi.

⁴² Gam tampite tung ah a khut a zan ding a; Aigupta gam a suakta kei ding hi.

⁴³ Himahleh dangkaeng leh dangka goute tung leh, Aigupta thil manphate tengteng tung ah thilhihtheihna a nei dia; huan Libia mite leh Ethiopia mite a kalsuanna ah a om ding uhi.

⁴⁴ Himahleh suahlam a kipan leh mallam a kipan a thuthang in amah a hihlau dia; thangpaihna thupi a mi tampi suse ding leh hihmang ding in a kuankhe ding hi.

⁴⁵ Huan tuipi leh mual siangthou thupi kikal ah a Inpi puanbukte a kai ding a, himahleh amah a beina hongtung dia, kuamah in amah a panpih kei ding uhi.