DANIEL 10 - Pathian Laisiangthou (BSI)

Tigri Luigei A Daniel Mengmuhna

¹ Persia kumpipa Kura vaihawm kum thumna ah Daniel, a min Belteshazzar kiang ah thu khat a hong kihil hi; huan huai thu a tak ahi a, kidouna thupi mahmah thu ahi; huchi in huai thu a theisiam a, mengmuhna theihsiamna a nei hi.

² Huailai in kei Daniel in, nipikal pumpi kal thum ka sun hi.

³ Tanghou lim ka ne kei a; sa hi in uain hileh ka kam ah a lut kei a; sathau leng, nipikal thum a tunkim masiah ka nilh hetkei hi.

⁴ Huan kha masapen ni sawmnih leh li ni’n, lui lian, Hiddekel pang ah ka ding hi.

⁵ Ka dak a ngai in, mi khat puanmalngat silh, a kongte Uphaz dangkaeng siang a gak ka mu hi;

⁶ A pumpi leng beril suang bang ahi a; a maitang khophia bang ahi; a mitte meisel kuangpha a bang a, a bante leh a khepekte a dal nawttet a bang a; a thugen ging mipi aw a bang hi;

⁷ Huchi in kei Daniel kia in mengmuhna ka mu hi; ka kiang a om mite’n lah huai mengmuhna a mu ngalkei ua; himahleh a tung uah nakpi a linna a hongtung a, kibu ding in a taikekta uhi.

⁸ Huchi in kei kia a nutsiat in ka om a; hiai mengmuhna thupi ka muta hi; huchi in kei ah hatna a om nawnta kei a; ka kilawmna kei ah siatna a hongsuakta a; hatna ka neita kei hi.

⁹ Hina pi in ka muh mipa aw ka za a; a thute ka ngaihkhiak lai in, a khup in ka mai lei lam nga in nakpitak in ka ihmu hithit hi.

¹⁰ Ngai in, khut in a honkhoih a; ka khuk leh ka khutpek leh ban ah honlen in ling kawmkawm lai a hon phong hi.

¹¹ Huan aman ka kiang ah, “Aw Daniel, nang nakpitak a it a ompa, na kiang a ka thugente theisiam in dingtang in; na kiang a sawl a ompa ka hi” a chi a; hiai thu ka kiang a a genlai in, ling kawm in ka dingta hi.

¹² Aman ka kiang ah, “Lau ken, Daniel, theisiam ding leh na Pathian ma a kiniamkhiak ding a, na lungtang na koihkip ni masapen a kipan, na thugente zak in a om hi; na thugente ziak a hong ka hi.

¹³ Himahleh Persia gam kumpipa’n ni sawmnih leh khat kei hondal hi; himahleh ngai in, Persia kumpipa kiang ah hentang a ka om nilouh ziak in Mikael, vansawltak lianpen kei hon panpih ding in a hongpai hi;

¹⁴ Huchi in ni nanung lam chiang a na mite tung a hongtung ding bang ahia chih nang hon theisiam sak dia hongpai ka hi; mengmuhna tunung ni tampi a hong tungding a hilai hi” chi in.

¹⁵ Huan hiai thute bang a ka kiang a aman thu a gen khit in ka mai leilam ka ngat a a, ka pau theikei hi.

¹⁶ Huan ngai in, mi khat mite tapate toh kibang in ka mukte a hon khoihsak a; ka kam ka a, thu ka gen a, ka ma a dingpa kiang ah, “Aw ka Toupa, mengmuhna ziak in lungkhamnate ka tung ah hong kibung a, hatna ka neikei hi” ka chi hi.

¹⁷ Bangchi in ahia ka Toupa sikha in ka Toupa a houlimpih theih ding? Kei ah thahatna a omkei a, nak leng nak lahsim ka hi” chi in.

¹⁸ Huailai in mi khat mihing toh kibang in a honkhoih nawn a, a hon hatsakta hi.

¹⁹ Huan aman, “Aw nakpitak a it mipa, lau ken; na kiang ah muanna om hen, hattak in om in; ahi, hattak in om in, a chi hi. Aman ka kiang a thu a genkhit in, ka hatta hi; Ka Toupa’n thugen heh, ka chi a; nang n’on hatsakta ngal a” chi in.

²⁰ Aman, “Na kiang a bang ding a hongpai ka hia na thei hia? Tuin Persia gam makaipa kidoupih ding in ka kiknawn ding hi; huchi a ka paikhiak chiang in, ngai in, Grik makaipa a hongpai ding, a chi hi.

²¹ Himahleh thutak laibu sung a kigelh nang k’on hilh ding hi: Na makaipa Mikael chihlouh kuamah hiaite kalh a kei hon doupih a omkei uhi.”