Markus 15 - Kálara Zyɛ̌m Edwán é mpʉ̌n

Yesʉs é mih mo Pilat

¹ É dwine mɛn, ojwɨɨ be opara, otamabʉr o lal, oyeʼle o motie, le bʉʉ bʉr o Bʉm Nɨnɨ, bé a be ó, lé esaa tiʼa bé nʉa é lʉ mo Yesʉs ɨ. É jɔʼ bé a be, bé mu si kaʼ Yesʉs monkara ɛ, bé ze to e nye, to kɛhɔ nye Pilat.

² No ó Pilat a dî e nye ó: «Zê go ó ndɨ njwɨɨbʉr oYʉden ɛ?» Yesʉs ze bɨha e nye ó: «Yé ó mpʉ go lɛɛ nɨ!»

³ Ojwɨɨ be opara ze buʼɔ nye mɨlɔb é buobuo.

⁴ No ó Pilat a ze bâʼle dî e nye ó: «Zê go abɨha ba? Paʼ bee bim mɨlɔb bé lé epur go mi?»

⁵ Yesʉs a baakar é lɔb ngwar. Pilat ze bul jehe sa yaa.

Lɔb, wi tiʼ ó, Yesʉs ójʉŋɔ

⁶ No yé a be-be ó é jɔʼ ebʉʼ enɨ, lé a dɨ pyal ɨ, Pilat a be-be ó lé ebir-bir be mbʉʼ ngwar, waa bʉr o lal bé bʉr o tɨ, bé a twar ɨ.

⁷ To kœb ó, yé a be é mbɛr mɨmbʉʼ we ó, e mɨmbʉʼ myé a mɛrɔ é lɔb bɨntʉ ɨ. Mʉr a si laa muu é bɨntʉ byaa. É l'esama e mɨmbʉʼ minɨ tʉŋlʉ, mʉr a bul jwɨ̂ʼlɨ e lɔb bɨntʉ ɨ, a be die ó Barabas.

⁸ No ó, mpʉ mpampaʼ bʉr, yé a pyal boo Pilat ó, bé twara mbʉʼ wé óbirɔ é mbu waa ɛ,

⁹ Pilat ze bɨha e be ó: «Zê bɨn bé lé egwɨm ó, me birɨ bɨn waa lé ejebɔ-jebɔ ó, “njwɨɨbʉr oYʉden” ɨ?»

¹⁰ Nye a lwib no ó, ebe, nye a be ó si bee ó, ojwɨɨ be opara, bé a pur Yesʉs ó, ebe zii.

¹¹ No ó ojwɨɨ be opara bé a soʼlo ntuntuma bʉr ó, yé diʼe ó, nye birɨ be mʉr ó, njɨ Barabas.

¹² Pilat ntɔʼ bâʼle dî. Nye ó: «Yé be no nɛʼɛ, waa bɨn lé ejebe ó, njwɨɨbʉr oYʉden ɨ, me saʼ nye nyá ɛ?»

¹³ Bé ntɔʼ bâʼle kʉ bɨʼla kʉ kʉ lé elɛɛ ó: «Cyèlɨ nye é klos kʉ.»

¹⁴ Pilat ntɔʼ dî e be ó: «Ebe yé? Nye sa yáa syɛɛla ebebe?» Bé ntɔʼ yɨm motwii, lɛɔ ó: «Cyèlɨ nye é klos kʉ!»

¹⁵ Mpʉ Pilat a bee ó, nye fuo kolo ó ntuntuma bʉr ɨ, nye ka ze bir be Barabas. É jɔʼ nye a be si lomo bʉr ó, bé fuura Yesʉs mɨmbihe e, nye ze liʼe nʉm ó, bé toʼ, to cyèl nye é klos kʉ.

¹⁶ Bɨzima ze toŋɔ e Yesʉs é bii mo njwɨɨ. (Naa, yé ó, bé a to ó, é bii mo ngoman.) Byé ntɔʼ jebe ntoo bɨzima yiyɛh.

¹⁷ No ó byé a ze bœr nye len kʉr mo njwɨɨbʉr akaa-e-kaa, ze pene epʉʼlʉ e kol modwaʼ, dilɔ nye la é lʉ.

¹⁸ Byé ze taare lé ebaʼ e nye. Byé e nye ó: «Moswɨhlɨ, njwɨɨbʉr oYʉden!»

¹⁹ Byé ntɔʼ taare lé eŋmɛh nye e peh sʉŋ é lʉ é tʉb-tʉb, syɛɔ nye mocyeele é mih, le ekurɔ moboo si é mih me.

²⁰ É jɔʼ byé a be, byé mu si bul kpeʼle nye e, byé ze fo len kʉr akaa-e-kaa, ze bula bœrɔ nye mɨkan mye, ntɔʼ toŋɔ e nye ó, nye toʼ, to cyèlɔ é klos kʉ.

Zi mɨtuu mɨ efie é klos

²¹ Nuu mʉr Sirɛn, die le Simɔn, a be ó lé eduho é lʉn wé a be é nkpah nkana ɛ. (Nye ó sɔŋ mo Alɛksandros bé e Rufus.) Mpʉ bé a fuuba e nye e, bé ze mɛr nye e nkul, le eyɨmɔ nye ó, nye nkɛŋɨ klos mo Yesʉs.

²² No ó bé a to e Yesʉs é gumo lé ejwɨrɔ die ó, Golgota ɛ. (No yé edwirɔ ó: «Gumo koko lʉ».)

²³ Bé a be ó si ngbaa dwe nye monwoʼ mo rezɛŋ mpuhba e myrrhe, ó nye deʼ. Nyɛɛ kʉ bene me.

²⁴ Bé ntɔʼ bomlo nye e mosen, bɨnɔ nye é klos kʉ, ze kabla mɨkan mye, doŋɔ mye ebya, ó bé nkʉʼ gʉa nkɔb mʉr nyiwɛh é sama yɔɔ ónʉa ɛ.

²⁵ Yé a be ó, yé mu mowala bu mo mɛn é jɔʼ bé a cyèl nye é klos kʉ ɨ.

²⁶ Mokan mé a be tila lé elɛʼle mobe nye a jala e me e, mé a be ó: «Njwɨɨbʉr oYʉden ó nwa.»

²⁷ Bé a cyèl nye kʉ ó, sama e bɨzilngan bɨba, ze cyèlɔ nteme bye é bɨklos: yiʼ klos, é nko paʼ mbo ejʉm mo Yesʉs; yʉʉ, é nko paʼ mbo emyɛl. [

²⁸ Yé ntɔʼ pyal mpʉ yé a be tila é Kalara Zyɛm ó: «Nye a si láŋɔ é sama bɨbɨbla bɨ bʉr.»]

²⁹ Bɨlaa-nwan, byé a be ó lé elwɨɨ nye ndwe le esiʼrɔ mɨlʉ, le elɛɔ ó: «Wɛɛ, gwɔɔ mʉr a lɛɛ ó, go ógbɛɛ Odia mo Zyɛm, ntɔʼ bâʼle fumo we njɨ é molu molɛl ɨ,

³⁰ kaʼ tiʼ go mʉr tɨʼ ʉʉ! Paʼ kʉ fulo é klos nɨ si ʉʉ!»

³¹ Ojwɨɨ be opara bé e l'oyeʼle o motie, bé a be nteme ó, lé ekpeʼle nye, le elɛɛla paʼra wɔɔ ó: «Nye a be ó si tiʼ bʉr ofih. No ó, nye akoʼo lé etiʼ nye mʉr tɨ!

³² Yé be ó, nye ó Lœma mulo mo Zyɛm le njwɨɨbʉr lal Ɨzraɛl nɛʼɛ, nye paʼ kʉ fulo si é klos tina é banana, bɨna nkʉʼ ka bee ga, le ejyɛʼ taa buʼo ga yina boo nye!» Bʉr o bé e boo nɔɔ, bé a be mɨcyèla é bɨklos kʉ ɨ, bé a be nteme ó, lé elwɨɨ nye.

Efie mo Yesʉs

³³ É jɔʼ teme moho, yé a pyal ɨ, edurʉ ntɔʼ fulo é si nwaʼ nyiwɛh, to pyal é mowala molɛl mo bii kʉʼ.

³⁴ É mowala molɛl maa, Yesʉs ze bʉ tim, lé elɛɛ ó: «Eloyɨ, Eloyɨ, lama sabaktani?» (No yé edwirɔ ó: «Zyɛm wam, Zyɛm wam! Ebe yé go ka ntwiŋ me e?»)

³⁵ Bʉʉ bʉr o b'a be tɨʼ ɨ, mpʉ bé a joʼo mpʉ nye a time e, bé ze lɛɛ ó: «Joʼa ga: nye mu ó lé ejebe Élie.»

³⁶ Nuu mʉr ze to kam, to dubo éponge é monwoʼ, ze pɛn le é peh sʉŋ, ntɔʼ cen nye la ó, nye duʼo. Nye ó: «Bona. Bɨna paʼ bee ga yinɨ, nkʉ Élie óbɛm pyal, ze fil nye si!»

³⁷ No ó Yesʉs a ze time kʉ kʉ, ntɔʼ fil mɨswɨh mɨ epihe.

³⁸ É jɔʼ yaa, kan ebe, wé a be-be cyèla é Mpah Zyɛm tʉŋlʉ ɨ, wé ntɔʼ nyɛɛ é wɛɛɛb bɨpeh bɨba, taare kʉ, pyal si.

³⁹ Njwɨɨ nter bɨzima a be cɨcyel é mih mo Yesʉs ɨ, mbea nye a bee mpʉ Yesʉs a fil mɨswɨh mɨ epihe e, nye ó: «Mʉr nwaʼ a bana kʉ be ó Mwan mo Zyɛm!»

⁴⁰ Yé a be nteme ó e bʉʉ bʉba, bé a be lé edwɛʼ sa yé a be lé esyɛɛlɨ ɨ, cyɛbɔ-cyɛbɔ ká ká. Bé a be ó: Maaria, sile Magdala, e Salʉma ndwe e Maaria, nyɔŋ mo Jacques twaʼa, bé e Yose.

⁴¹ Bé ó b'a dɨ du Yesʉs lé esea e nye é jɔʼ nye a be Galɨle e. Bʉʉ bʉba é buobuo bé e boo nɔɔ, bé a ze Yerʉsalɛm ɨ, bé a be nteme ó tɨ.

Dɨla mo Yesʉs

^42-43 É jɔʼ bii kʉʼ, yé a pyal ɨ, Yoseb mʉr nkana Arimate ze pyal. Nyɛɛ a be ó njwɨ̂ʼ mʉr é Bʉm Nɨnɨ. Nye a be ó lé ejoʼo dweh ebee Zyɛm lé ecyel jwɨ̀ʼa ye cyecye. Yé a be ó dobo bé a kʉmsa ebʉʼ ɨ, moho saba lé eka bɔma. Ebe no ó Yoseb a tʉm nyʉl, ntɔʼ to jaʼ Pilat muu mo Yesʉs ɨ.

⁴⁴ É jɔʼ Pilat a joʼo ó, Yesʉs, nyi lɨ dwè e, nye ntɔʼ jehe lɔb waa nʉm mbeʼ, nye ze baŋle njwɨɨ nter bɨzima, le edî nye nkʉ Yesʉs a si kʉ bana dwè.

⁴⁵ Njoʼa nye a joʼo mpɨha we e, nye ntɔʼ mɛʼle ó, Yoseb toʼ, to nʉa muu.

⁴⁶ Yoseb ze to bwam ndomo kan é pumo-pumo, ntɔʼ to fil Yesʉs si, dîble nye e ndomo waa. Nye ntɔʼ to dɨl muu é foo, tuba nguʼ ekoʼ. Pie tɨ, nye ntɔʼ biŋle lʉʉ ekoʼ, buuro nʉm foo e tɨ.

⁴⁷ Maaria, sile Magdala, bé e Maaria, nyɔŋ mo Yose, bé a be ó tɨ, lé edwɛʼ fum nye a jyɛʼɔ ɛ.