Markus 15 - Kálar Nzyɛ̌m : Ejwán é Sáá

Yésʉs ɨ́ mpǒm mé Pilátos

¹ Ɨ́ dwiné mɛ́n, ojwɨ́ɨ o mpáh Nzyɛ̌m, otɔ́má bʉ̂r o b'Ɨ́zraɛ̂l, olɛ̂ʼla o métié, le bʉ́ʉ́ bʉ̂r ó bʉ̌m nɨ́nɨ́ɨ́, bê nzě sáŋɔɔ pɨ̂ʼ, dumo e Yésʉs. Jɔʼ bé á be, bé mû sí kâʼ Yésʉs menkara yɨ́, bê nzě tô e né, tó tímlɔɔ nyé Pilátos.

² Nó ó Pilátos á dî e né ó: «Go ó dí njwɨ́ɨ oYúden ɨ́?» Yésʉs nzě yala e né ó: «Yé ó gó dí sí lɛ́ɛ̌ nɨ̌.»

³ Ojwɨ́ɨ o mpáh Nzyɛ̌m nzě laʼ nyé milɔ̌b ɨ́ buo buo.

⁴ Nó ó Pilátos á nze baʼa dî e né ó: «Nzê gó abá yala ɛ̌? Paá beě bím mílɔ̌b bé dí epur gó mí?»

⁵ Yésʉs á bé akǎ yala ékǎn. Pilátos nzě buú kâm sâ yaá.

Lɔ̌b, wɨ́ tîʼ ó, Yésʉs ójʉ́ŋɔɔ

⁶ Nó yé á bɨbe ó, ɨ́ jɔʼ yɨ́yɛ̂h nzɔ́ɔ nyaá, nyé á pipyâl yɨ́, Pilátos á bɨbe ó lɨ́ ebibîr bé mbʉʼ ngwár, waá bʉ̂r, bé á gwɨgwɨ̂m ó, nye bírɨɨ wɨ́.

⁷ Gúú mbʉʼ, wé á be e díe ó, Barábas. Bé e bʉr o b'á sâ bintʉ̌ bá, bé á be ó mimbʉʼ. Bé á si jʉ̂ mʉr ɨ́ jɔʼ bé á gbɔba e bʉr ó Rôm yɨ́.

⁸ Nó ó éntumo e bʉ̂r, lé á to dî e Pilátos ó, nye dwêʼ bé sá nyé á boo dwidwe bé ɨ́ mbi nzɔ́ɔ nyaá yɨ́.

⁹ Pilátos nzě yala e bé ó: «Nzê bɨ̌n gwɨ́m ó, me bírɨɨ bɨ̌n njwɨ́ɨ oYúden ɛ̌?»

¹⁰ Nye á lwib nó ó, ebě, nye á si bee ó, ojwɨ́ɨ o mpáh Nzyɛ̌m, bé á jaa pur Yésʉs ó, njɨ ɨ́ lɔ̌b nzwíí.

¹¹ Nó ójwɨ́ɨ o mpáh Nzyɛ̌m á bêhle entumo e bʉ̂r ó, lé díʼee ó, nye bírɨɨ bé mʉr, njɨ Barábas.

¹² Pilátos ntɔ̂ʼ báʼǎ dî. Nye ó: «Á nó, waá bɨ́n jɨ́jébé ó, “Njwɨ́ɨ oYúden” nyá, me sâʼ nye nyá?»

¹³ Bé ntɔ̂ʼ báʼǎ bʉ̂ bítím, lɛ́ɔɔ kʉ́kʉ́ ó: «Tyelɨɨ nyé ɨ́ kolôs kʉ́!»

¹⁴ Pilátos ntɔ̂ʼ dî e bé ó: «Nye sá yáǎ sá ébébe?» Bé ntɔ̂ʼ báʼǎ kʉ́ bʉ́ŋɔɔ bítím kʉ́kʉ́, lɛ́ɔɔ ó: «Tyelɨɨ nyé ɨ́ kolôs kʉ́!»

¹⁵ Mpʉ̌ Pilátos á tíʼe ɨ́ lémé wé ó, nyě koló ó entumo e bʉ̂r yɨ́, nye nzě bîr bé Barábas le elómo bʉ̂r ó, bé ŋmɛ́hɛɛ Yésʉs mingáhá. Nye ntɔ̂ʼ tímle bé nyǎ, ó bé tôʼ bomlo nyé ɨ́ kolôs kʉ́.

Bisója lɨ́ epyǎ Yésʉs

¹⁶ Bisója nzě tóŋɔɔ e Yésʉs témé ebɛhɛɛ mé Pilátos, ntɔ̂ʼ jébě sɔ́má bísója yɨ́yɛ̂h.

¹⁷ Nó ó bé á nze bôr nye kán kaá e kaá, bê nzě dil nyé káráá dúu, pená le mindwínɨ́nɨ́, ɨ́ lʉ̂.

¹⁸ Bê nzě táare ésoho nyê. Bé e né ó: «Njwɨ́ɨ oYúden, bɨ̌h bé lɨ́ ebâʼ e go.»

¹⁹ Bé ntɔ̂ʼ ŋmɛ̂h nyé e péh sʉŋ ɨ́ lʉ̂, syɛɛ nyé metyéelé ɨ́ mîh, le ebɨʼ mébóó sí mpʉ̌ sá lɛ́ɛ́, bé dwé ó nye kûm.

²⁰ Jɔʼ bé á be, bé mû sí pya nyé yɨ́, bê nzě pɛʼ nyé kán kaá e kaá, nzě bôr nyé mikán myé, nzě tô e né ó, nye tó bomlɔɔ ɨ́ kolôs kʉ́.

Yésʉs, nyɨ́ bomlɔɔ ɨ́ kolôs

²¹ Bé ntɔ̂ʼ mɛ̂r nyʉ́ʉ́ mʉ̂r e nkul ó, nye nkɛ́yɨɨ kolôs mé Yésʉs. Mʉr waá á be ó lɨ́ ebúlǎ pemé. Díé lé, lé á be ó, Simon, mʉr Sirénia, sɔ́ŋ mé Alexandre, bé e Rufûs.

²² Nó ó bé á tô e Yésʉs ɨ́ gúmó dí ejébɔɔ ó, “Golgotâ” yɨ́. Díe laá, lé páʼlɔ́ɔ́ ó, “Gúmó Bʉ̌n Lʉ̂.”

²³ Bé á be ɨ́ gwá dwe nyé menyoʼ púhlá e mǐr lɨ́ esul mékpaa, ó nye dêʼ. Sâ gwár, nye á bé ade.

²⁴ Bé ntɔ̂ʼ bomlo nyé e binzâŋ, bɨ́nɔɔ nyé ɨ́ kolôs kʉ́, nzě kabla míkán myé, doŋɔɔ myé ebya, bé nkʉ̂ gʉ́a nkɔ̂b mʉ̂r nyɨnyɛ̂h ɨ́ sɔ́má yɔ́ɔ́ ngá nʉa nyɨ́.

²⁵ Yé á be ó, yé mû mewala ebǔ mé mɛ́n ɨ́ jɔʼ bé á bomlo nye ɨ́ kolôs kʉ́ yɨ́.

²⁶ Ebɔ́m lé á be e micɛmá lɨ́, lé á si elɛ̂ʼle mebě nyé á búra e mé má. Lé á be cɛmá ó: Njwɨ́ɨ oYúden.

^27-28 Bé á bomlo nye ɨ́ kolôs kʉ́ ó e binzilngǎn bibá, yɨ̂ʼ ɨ́ páʼ mbó éjʉ́m wé; yʉ́ʉ́ ɨ́ páʼ mbó émyɛ̌l.

²⁹ Bʉr o b'á lɨlaa tɨ̂ʼ bá, bé á be ó lɨ́ elwɨ́ɨ nyê, le esiʼre mílʉ̂, le elɛ́ɛ ó: «Á go náǎ e, wɛɛ! Gua mʉr á lɛ́ɛ ó, go ógbɛ́ɛ mpáh Nzyɛ̌m, ntɔ̂ʼ báʼǎ sumo nyé tâŋ melú mélɛ̂l nyá!

³⁰ Tiʼɨɨ gó mʉr tɨ̂. Go e súló ɨ́ kolôs nɨ̌ sí!»

³¹ Ojwɨ́ɨ o mpáh Nzyɛ̌m le olɛ̂ʼla o métié, bé á be ntémé ó, lɨ́ epya nyê, le elɛ́ɛla páʼ nyɔ́ɔ́ ó: «Nye á si kʉ tiʼ bʉ́ʉ́ bʉ̂r oswîh. Nó nyé akoʼo étiʼ nyé mʉr tɨ̂.

³² Krîst, Njwɨ́ɨ Ɨ́zraɛ̂l! Kaá sulo sí ɨ́ báánâ, bɨ̌h nkʉ̂ kǎ bee, le edyɛ̂ʼwo e go.» Bʉr o bé e boo nɔ́ɔ́ bé á be mimbwɨmlá ɨ́ bikolôs kʉ́ bá, bé á be ntémé ó, lɨ́ epya nyê.

Eswie mé Yésʉs

³³ Jɔ̌ʼ témé móhó á pyâl yɨ́, edúrʉ́ʉ́ ntɔ̂ʼ sula ɨ́ sí yɨ́yɛ̂h ntinɨ̂, tó pyâl ɨ́ mewala melɛ̂l mé bíí kʉ̌ʼ.

³⁴ Lɨ́ mewala melɛ̂l maá, Yésʉs nzě bʉ̂ bítím, lɨ́ elɛ́ɛ ó: «Eloyɨ̂, Eloyɨ̂, lama sabaktáni?» (Nó yé lɨ́ elɛ́ɛ ó: «Nzyɛ̌m wǎm, Nzyɛ̌m wǎm, go ka myah mé ɨ́ yé ɛ́?»)

³⁵ Bʉ́ʉ́ bʉ̂r o b'á be tɨ̂ʼ bá, ɨ́ mpʉ bé á jóʼo mpʉ nyé á tíme yɨ́, bé ó: «Jóʼáá gá, nye mû ó lɨ́ ejébě Elie.»

³⁶ Nyʉ́ʉ́ mʉ̂r ɨ́ sɔ́má yɔ́ɔ́ nzě tô kám, tó dubo éponge ɨ́ kɛ̌ʼla ményoʼ, nzě pɛn lé ɨ́ péh sʉŋ, ntɔ̂ʼ tyen nyé lǎ ó, nye dúʼoo. Nye e né ó: «Bónáá gâ. Mɨná páa bee gá yɨ́nɨ̌, nkʉ̂ Elie ónzě sul nyé sí.»

³⁷ Nó ó Yésʉs á nze tíme kʉ́kʉ́, ntɔ̂ʼ sulǎ swɨ̂h.

³⁸ Jɔʼ yaá, kán ébê, wé á bɨbe tyelá ɨ́ mpáh Nzyɛ̌m wɨ́ ntɔ̂ʼ nyɛɛ ɨ́ kwiií bipéh bíbá, táare kʉ́, kumo sí.

³⁹ Njwɨ́ɨ bisója á be tîtyěl ɨ́ mpǒm mé Yésʉs nyá, mbeá nyé á bee mpʉ̌ Yésʉs á dwe yɨ́, nye ó: «Mʉr nyâʼ á kʉ be ó Mwân mé Nzyɛ̌m.»

⁴⁰ Yé á be ntémé ó e bʉ́ʉ́ bʉ́bá bé á be lɨ́ edwɛ̂ʼ sá yé á syɛ́ɛ yɨ́ bá, tyɛ́bɔɔ lɨ́ ejaa. Bé á be ó: Maria, silě Magdalâ, le Maria, nyɔ̌ŋ mé Jacques mâ ntwǒm, bé e Yóse ti e Salóme.

⁴¹ Bé ó b'á dû Yésʉs le eséa e né ɨ́ jɔʼ nyé á bě sí Galilê yɨ́. Bʉ́ʉ́ bʉ́bá ɨ́ buo buo, bé e boo nɔ́ɔ́ bé á nzě Yerʉ́zalɛm bá, bé á be ntémé ó tɨ̂.

Dɨlá mé Yésʉs

^42-43 Jɔ̌ʼ bíí kʉ̌ʼ, yé á pyâl yɨ́, Yóseb mʉr Arimatê nzě pyâl. Nyɨɛ á be ó mʉ̌r nɨ́nɨ́ɨ́ ɨ́ mpáh milɔ̌b oYúden. Nye á be lɨ́ ejóʼǒ dwéh ébeě Nzyɛ̌m lɨ́ etyêl Mpóʼo nyé ɨ́ píʼi. Yé á be ó jwɨ́h sábat, móhó bé á jɨjâm mede mé sábat wɨ́. Sâ yaá ó Yóseb á be ajóʼo bʉ́á lɨ́ etó gwâm Pilátos múú mé Yésʉs yɨ́.

⁴⁴ Pilátos á be ɨ́ buú kâm lɨ́ ejóʼo ó, Yésʉs, nyɨ́ lɨ̌ dwe. Nó nyé á jébe njwɨ́ɨ bisója, lɨ́ edî nyé nkʉ̂ Yésʉs á si boo dwe.

⁴⁵ Jɔʼ nyé á jóʼo yalá mé njwɨ́ɨ bisója yɨ́, nye ntɔ̂ʼ kam ó, Yóseb tô nʉǎ múu.

⁴⁶ Yóseb nzě tó bwâm ndɔ́má, ntɔ̂ʼ tó sǔl múu sí, díble wé ɨ́ ndɔ́má waá. Nye ntɔ̂ʼ tó dɨ̌l múu ɨ́ soo, túbá ngʉ̌ʼ lɨ́ ekóʼ. Píe tɨ̂, nye ntɔ̂ʼ nʉa lʉ́ʉ́ ékóʼ, búblǒ num sóo e tɨ̂.

⁴⁷ Maria, silě Magdalâ, le Maria nyɔ̌ŋ mé Yóse, bé á be ó lɨ́ egwá dwɛ̂ʼ súm bé á dɨl múú wé yɨ́.