Забур 1 - Muqaddas Kitob

1–SANO

¹ Shunday insonlar saodatlidir: Ular fosiqlar maslahatiga yurmaydi, Gunohkorlar yoʻlida ular turmaydi, Mazaxchilar orasida oʻtirmaydi.

² Ha, ular Egamizning qonunidan zavq oladi, Tunu kun taʼlimotining magʻzini chaqadi.

³ Unday insonlar oqar suv boʻyiga oʻtqazilgan Daraxtlarga oʻxshaydi. Ular oʻz mavsumida mevasini beradi, Barglari aslo qurimaydi. Ular neki qilsa, muvaffaqiyatga erishadi.

⁴ Fosiqlar esa bunday emaslar, Shamolda toʻzgʻib ketadigan somonga oʻxshaydi.

⁵ Hukmda fosiqlar oqlana olmaydi, Solihlar jamoasidan gunohkorlar joy ololmaydi.

⁶ Egamiz solihning yoʻlini qoʻriqlaydi, Fosiqning yoʻli halokatga yetaklaydi.