Philippi 4 - Pupu Oharo Āre 1963 Genese 1970 Rute 1972

Iki aheke leiki oharo

¹ Laelave, ara iki havahu apavara oaria e, arave ikiveveke i korona ila, e va Amua v'ila aheke apeaki.

² Ara va Euodia i Syntyche ila ape karava maeaeaive, Amua ve ikikekela haroapo hovea leivahaeaki.

³ O iele, arave horova kake e, ma uavila koarakive, ehovea erealila arave iroro horova hukapape. Aeva Clement kara, aeva arave horova kake haela oaria kara: ereve rare oaria ovokake Buka ureve le apearo.

⁴ Amua v'ila mea oaria ikiveveke leivahaeaki. Ara v'aeka maeaive ikiveveke leivahaeaki.

⁵ Haela oaria eve harita harita apeaki mai ore leivahaeaki. Amua ve hoa maia iele.

⁶ Eharu v'ila horahora kalaivahaelue — aka mea oaria ivaiva kiva auhohi leivahaeaki, kai eve ikivere oharo i thank you oharo ila Aualari velavela leivahaeaki.

⁷ Aualari ve havila eve ove i iki ila Keriso v'ila kiva leivahaeaki. La havila meahaiapo hoa haela ve ikiore heaorapaivila.

⁸ Apavara e, arave hita oharo ma: O iele la eharu, mai ehoe, iki ehoe, ikiveveroro, ikikekela mekakure, rare veveke avila la eharu, ma eharu va mekakure i morapaeaki hovea la leivahaeakilava, ma eharu oaria iki auhohi alalaki.

⁹ E arave oki ve ore leivahaeape kai avape, kai iapape la eharu oaria, leivahaeaki. Havila Aualari e i hareho aeakilai.

Paul ve ikiveveke ehovea Philippi haela ve ikihuru

¹⁰ Ara Amua v'ila ikiveveke leive ehovea e va ma hoa araro iki kekelavila. E overa kekelape, aka la hoa koaraki oki karia.

¹¹ Ara va eharu aeaki aue oharo maea va ka. Ehovea ara va ma mai ore leipe — ara va learia aeavila, laria, ikiveveke aeakive, heroe.

¹² Ara va merava hovea aiakive ore, ara va eharu oaria ila aeakive kai ore. Ara eapai oaria mai aeva ere erereaki mai kara ore overa leipe, eharu oaria, aka eharu karia, hoveahovea.

¹³ Ehovea araro lei aheke leivila la Amua are va horova oaria hovea hovea.

¹⁴ Lae vi va, e veveke leivahaeape ehovea e va arave heraho hoa ikiheroe mai leivahaeape.

¹⁵ Aeka ma, Philippi haela e, e havahu ore, iroro oharo oropa ape la hoa, ara va Macedonia hakurepape la hoa, e hiki ikiheroe eapapo leivahaeape, kai araro meru aikiarape — ita lahua ve ekalesia haela laria au leila.

¹⁶ Aka ara Thessalonica aeape la hoa kara e arave meru hoa haroapo haroapo kiparaeape.

¹⁷ Ara meru haropa va ka, aka ara va ikivere iele la iki ureve meru ve iele, aireaki iele oaria leiki la meru.

¹⁸ Aka, ara va eharu oaria ila, ehovea e Epaphroditus ve mai ve kipaparaehape la eharu oaria koarape. La eharu va meru mekakure, maea morava mai veveke, iki ureve muo veveke hovea, Aualari ve ikiveveke leivahaeaki eharu va la.

¹⁹ Arave Aualari eve ikivere eharu oaria aiarakilai, areve Iesu Keriso ve erohoho mekakure are ero aiarakilai.

²⁰ Oa Aualari mea oaria lei morapaeaki, Amene.

Kokaukaki ikiheroe oharo

²¹ Iesu Keriso ve hehe haela oaria elave ikiheroe hela aiaraki. Ara i hareho apealula la apavara ero ikiheheroe oharo paraeaive.

²² Maia hehe haela oaria ero ikiheheroe oharo paparaehairo. Caesar ve uvi apealula la haela oaria kara.

²³ Amua Iesu Keriso ve ikiheroe meru eve ove ila hareho aeakive.