Matthew 9 - Pupu Oharo Āre 1963 Genese 1970 Rute 1972

Epe apo heheva haela lei veveke leipe

¹ Are vevaea horeape, ukai elai are havahu ve karikara pekai pavape.

² Iapai; ere epe apo heheva haela ra kile kohahai kaivi areve oki avikepe. Iesu ereve ikikekela aheke ore leipe la hoa are maea haela mari maeape, Akore e, ave haeae oaria le hapururuka.

³ Iapai: pupu haealula haela uku ere va elare iki la kelavape, Ma haela Aualari ve rare ve o heaha laila.

⁴ Iesu ereve ikikekela leia ore overa leipe. Are mari maeaeape, E va iki ureve learia oharo heaha ra aro?

⁵ Le koraoka ha? Mari maeakive, Ave haeae ra hapururukakive, aka mari maeakive, Urou, kile ra kaivi, aula?

⁶ Kahara, ehovea e ore leikive haela ve Akore meahaiapo hoa mai haeae hapururuka hovea, Are epe apo heheva la haela maeape, Urou, kile ra kaiva, ave uvi aula.

⁷ Are urai elare uvi le aupe.

⁸ Haela oaria la horova eavi iki oaoka leivahaeape. Ere Aualari ve rare morapaeape ehovea are haela aheke laria avarape.

Matthew itavape hari

⁹ Iesu leia harepape la hoa are haela ae rare Matthew tax ita titavila eavape. Are arero maeape, Araro airekai ekela. Are urai areve aire le aupe.

¹⁰ Iapaila, Iesu uvi ureve eapai lape hoa, tax korukaia haela mai heaha haela ila oaria pekahavi i kilea haela ila hareho avape.

¹¹ Pharisee haela ra eavi ere areve kilea haela maeaeape, Eve haelapo tax korukaia haela i mai heaha haela ila eapai hareho lalaro, ehovealeve ha?

¹² Iesu la oharo iapai, erero mari maeaeape, Maea mekaka haela dokita haela ikivere va ka, maea heahaha haela hiki.

¹³ E va auila, ma oharo ve iele ore leikive, Ara va ikiheroe mai ikivere, arava maea morava mai ikivere va ka. Ara ekepe ehovea mai ehoe haela va ka, aka, ehovea mai haeae haela lei ikihelarikive.

Ere erereaki mai

¹⁴ John ve kilea haela la hoa iki arero mari maeape, Ehovealeve ela Pharisee haela ila mehaemehae ere ereavalula, aka ave kilea haela mekehaku ere ereavavahaea va ka?

¹⁵ Iesu erero mari maeaeape, Laeaki hurai ve akoremari laeaki haela erero koarai aeaki la hoa ikihuru leve leiki? Kahara, aireaki hare kihorerakilai, la hare laeaki haela erero haitapakilai, ere va la hoa ikihuru leiki, heroe.

¹⁶ Haela ae pura are — apu overa ve pura i kopererea kokora va ka — ehovea are ra kokoraki la pura overa pura haipararapakilai, pura aeka heaha le leikilai.

¹⁷ Aeka, haela uaina are overa kavapu kakaita va ka, kavapu kara heaha eapapo leiki ave. Kahara, ere uaina are kavapu are hiki kakaitalula: lahovea kavapu uaina ila veveke hiki apealula.

Jairus ve mari: Apu pavape uamari

¹⁸ Are ma oharo maeaeape la hoa — akea haela ae iki areve oropa ve ekaopi mari maeape, Arave mari apaki maia iele — ava ekeki hela, arero mai koharaki, are ovokake leikive i.

¹⁹ Iesu urai, arero airekai aupe, areve kilea haela kara.

²⁰ Iapai, hitolo 12 apu pavape uamari aea arero ai aireaki epavape, kai areve pura kao ra mai paeape.

²¹ Ehovea are iki mari kekelape, Ara areve pura kao mai va paila, ara maea veveke le leikilai.

²² Kahara, Iesu helari arero eavi mari maeape, Mari e, ikiveveke: ave ikikekela ave maea veveke laleila. La hoa la uamari maea veveke le leipe.

²³ Iesu la akea haela ve uvi pekape la hoa are haela hivavarai la hivi la arura eavape.

²⁴ Are erero mari maeaeape, Au haikilavaila: mari hekai au apakue, are avuku i aeave. Ere arero area koavape.

²⁵ Are haela oaria mea ve haruapai, are uvi ureve pekai mari hekai mai le paeape — are le uroupe.

²⁶ La hari veveke la ita haela oaria hareho le iapape.

Ovohae kariri haela orahokaila

²⁷ Iesu leia harepape la hoa — ovohae kariri haela orahokaila arero airekai ai ara hai itavape maria, David ve akore e, elalilara hela ikiheheroe leiki.

²⁸ Are uvi pekape la hoa la ovohae kariri haela arero kai pekahavape. Iesu erealilara maeaeape, Eve ikikekela ara va ma horova lei va ore ha? Erealila arero maeape, Kaire, Amua e.

²⁹ Are la hoa ereve ovohae mai kohari erealilaro maeaeape, Ealilave ikikekela hovea, eali lari leikive.

³⁰ Erealilave ovohae le hapape. Iesu erealilaro ahilape maria, Haela ae kavaeailue.

³¹ Kahara — erealila aupe la hoa erealila areve hari veveke la ita hareho huavape.

Ikihaveva ovehahu ila haela

³² Ere mea hoahukape la hoa ere ikihaveva ovehahu ila haela ae arero lai ekepe.

³³ Are ovehahu avakape la hoa, ikihaveva haela oharo veveke ape. Haela oaria ikihaparaehaparae leivahaeai — mari maeaeape, Maria mai Israel haela overa ore va au leila.

³⁴ Kahara — Pharisee haela mari maeaeape, Are ovehahu haruapavila ehovea are ovehahu ve amua.

³⁵ Iesu karikara ehoaha titaeka ila loa veavelaripe. Are synagogue ureve oharo kileape, kai ita oaria basileia ve iroro kara ape.

Keriso haela oaria ikihuru leivahaeape

³⁶ Are haela lakea eavape la hoa are erero ikihuru eapapo leivahaeape, ehovea ere va aitara are aupe, kai oaria le titavape, kiva haela aue mamoe hovea.

³⁷ La hoa are kilea haela mari maeaeape, Hae hovare oaria apearo, ikaeaki haela oaria ka.

³⁸ Ehoveala, e va hae hovare ve Amua hilahila leila, are hae hovare ikaeaki haela elavelave kiparaeakive.