Matthew 6 - Pupu Oharo Āre 1963 Genese 1970 Rute 1972

Muruhari meru mai

¹ Kiva leila, eve meru haela oaria oropa ve hihika aikararue, e va laria la leikilava, e va kaia ve Oa ve kavale veveke aireaki aea va ka.

² Laelave, a va meru avaraki la hoa, puva ave oropa kahohoalue, opore haela synagogue ureve, karikara hihi ve leilula hovea, ehovea haela erero momorapukive. O iele, ara ero maeaeaive, ereve kavale ere mave avaro.

³ A va meru avaraki la hoa, ave mai keva ukai ave mai ore ukai ve horova kakilealue.

⁴ Ave meru oaria muruhari hiki la apeakive, ave muruhari aeavila la Oa aro kavale hihika leikilai.

Muruhari ivaiva

⁵ A va ivaiva leiki la hoa, ava hehepo leilula haela hovea kalailue, ehovea ere ikivere eapapo synagogue ureve, karikara hihi ve ila ivaiva leikive, haela erero ovohae eavakive. O iele ara ero maeaeaive — ereve kavale ere mave avaro.

⁶ Kahara — a havahu ave ivaiva leiki hoa, ave lalava ureve araeakive, okiape kokaukakive, ave muruhari Oa ivaiva leikive: ave muruhari ovohae eavavila la Oa aro kavale hihika leikilai.

⁷ E va ivaiva leiki la hoa, aeka oharo kailue, kai aireaki kailue, ita lahua haela ve mai hovea, ehovea ereve ikikekela Aualari, ehovea ereve oharo oaria, ereve la oharo iapakilai.

⁸ E oaria erero hoveahovea kalaivahaealue, ehovea eve Oa eve ikivere eharu ore overa leipe.

Amua ve Ivaiva

⁹ E va ivaiva mari leikive: Elave Oa kaia akea, Ave rare hehe iele leikive.

¹⁰ Ave basileia ekekive, Ave ikivere mai Meahaiapo ka kaia ila hoveahovea leikive,

¹¹ Ma hare elave eapai elaro aikiarakive.

¹² Ela havahu haela ve ape karava hapururukaki hovea, Elare kara laria hapururukakive.

¹³ Amuraeharae ita elaro kari kaulue: Elaro mai heaha ve lei makukurikive: Ehovea basileia ave, Aheke ave, Morapaea va ave, Aiai kari lei va ka, Amene.

¹⁴ E va haela ve mai heaha halapurukakilava, eve kaia ve Oa eve mai heaha kara hapururukakilai.

¹⁵ E va haela ve mai heaha ka hapururukakue la leikilava, eve Oa kara eve mai heaha hapururuka va ka.

Ere erereaki mai

¹⁶ Aeka oharo mae — e va eapai ere ereavakilava, e va hehepo leilula haela ve oropape ikihuru hovea kalailue. Ehovea ere oropape here‐maea leilula, ereve ere ereavaki mai haela ve oropaki hihika leikive. O iele ara ero maeaeaive — ereve kavale ere mave avaro.

¹⁷ A havahu ave ere erereaki hoa haro la‐apu paeaki, oropape ka huhelaki:

¹⁸ Ave ere erereaki mai haela oropa ve hihika leiki ave: ka ave muruhari Oa ve oropa hiki, ave muruhari eavaki la Oa aro kavale hihika avarakilai.

Erohoho iele

¹⁹ Erohoho eharu meahaiapo ve kakorukaialue, leia ihoko i apu ila erero poae leikilai, korea haela kara kovaelai korea leikilai.

²⁰ E ve erohoho kaia ve korukaiakive, leia ihoko i apu ila eharu lei poae lei va ka, korea haela kara kovaelai korea lei va ka.

²¹ Eve erohoho apeaki la ita e va leia hiki kekelakilai.

Ovava i mea muru ila

²² Maea ve ovava ovohae — ave ovohae ehoe la leikilava, ave maea oaria hareho ovava leikilai.

²³ Ave ovohae heaha la leikilava, ave maea oaria hareho muru le leikilai. E va ureve aeaki la ovava muru la leikilava, la muru muru apo havahu.

²⁴ Haela haroapo amua orahokaila ve horova leiki hovea ka. Are haroapo haure leikilai, haroapo ikiheroe leikilai, aeka are haroapo ikivere leikilai, ae va haroapo hakurepakilai. E va Aualari mamona ila ve horova hoa haroapo leikive hovea ka.

Iki heraho: Aualari ve ikikekela

²⁵ Laelave, ara ero maeaeaive: eve ovokake iki mari ka kekelarue — e va le eapai larilai, ae ka le ma larilai, ae ka eve maea ve kara, iki mari kakekelarue, e va le pura oreaukilai. Ovokake are eapai oropa ve ka ha? Maea are pura oropa ve ka ha?

²⁶ Ori merava ovohae eavaila — ere eapai apoporau va ka, aeka hae ikaea va ka, eapai ere uvi kara korukaia va ka. Kahara, eve kaia ve Oa ereve eapai erero aiaravila. E va erero akea va ka ha?

²⁷ Leita haela ve ikikekela areve maea ve heaikiapo are havahu perehekai koperereakilai ha?

²⁸ E va pura ve ikihorahora ehovealeve ha? E va kora mere titaeka ikikelavaila, ere va learia aheaulula ha? Ere va horova lei va ka, pura kara he va ka.

²⁹ Kahara, ara ero maeaeaive, Solomon havahu, areve maupa eapapo, ma kora mere ve maupa hoveahovea au leila.

³⁰ Laelave — Aulari huakara ve la hohe ve maupa la leikilava, hare ae kemo ureve paraeaki la hohe, are ero pura ra aiarava ka ha, e iapaki aue haela e!

³¹ Ehoveala, iki mari ka kelavarue — ela va le eapai larilai, ela va le ma larilai ha? Ela va pura leari le aeakilai ha?

³² (Ehovea ita lahua haela ma eharu oaria haropalula hiki.) Eve kaia ve Oa ore overa leipe e va ma eharu oaria ikivere.

³³ E va oropa Aualari ve basileia haropaki, areve mai ehoe kara: aeka eharu oaria are ero aireaki aiarakilai.

³⁴ Laelave — opoa ve ikihorahora kalailue. Ehovea opoa hare are havahu ve eharu ikikekelakilai. Hare haroapo areve heaha la hare hoveahovea.