Matthew 16 - Pupu Oharo Āre 1963 Genese 1970 Rute 1972

Iesu ihova avarakive ikivere ka

¹ Pharisee haela Sadducee haela ila hareho ekevahaeape. Ere arero au amuraeai arero kaia ve ihova ve velavela leipe.

² Are erero kavale maeaeape, Hailaea hoa eve oharo maria, Mea veveke leikilai, ehovea kaia ovo heheave.

³ Kai vevelare hoa e va maria arura, Mahau mea heaha leikilai ehovea kaia uru koave, mea le hihirive. E opore haela e — E kaia ve ihova heheava ore — e va ma mea hovea ore va ka ha?

⁴ Mai heahaha, airi pavora ila vilakao ra ihova haroparo — Ere ihova ava va ka, karia karia iele, Jonas ve la ihova hiki. Are erero haitapai ita lahua aupe.

⁵ Areve kilea haela la ukai elahuka pekahavi pai avakive iki hoapai.

Are kilea haela aihukamaeape ehovea iapaki aue mai

⁶ Iesu erero mari maeaeape, Kiva auhohi leila, Pharisee haela i Sadducee haela ila ve pai avaki ave.

⁷ Ere elarelare iki heheavape maria, Ma oharo ehovea ela va pai au aeakue.

⁸ Iesu ereve ikikekela ore lei erero mari maeaeape, Eve iapa iele va ka. Ipileve e va elarelare heheavaro ehovea e va pai au aeakue ha?

⁹ Aiai ma hoa kara e iapa ka ha? E va kelava ka ha? Haela 5,000 ve pai hue ila, kai e korukaiavahaeape hara kepea leavaila ha?

¹⁰ Aka haela 4,000 ve pai 7 kara, e eapai kepea korukaiavahai kailape hara leavaila ha?

¹¹ Leia va learia e va iapa va ka ha? Ara Pharisee haela i Sadducee haela ve pai kiva leiki oharo maeape hoa ara ero pai iele ve oharo au maeaeaila.

¹² Ere la hoa iki le kelavape — are va erero pai ve oharo hiki au maeaeaila, aka Pharisee Sadducee ila ve kilea oharo kiva leiki oharo maeaeape.

Peter Iesu va Keriso hihika maeape

¹³ Iesu Caesarea Philippi ve ukaki elaupe la hoa are kilea haela velavela leipe maria, Haela ve Akore va haela va leari aro ara va leita ha?

¹⁴ Uku maeape, John Baptist, uku maeape, Elias, kai uku Jeremiah aka peroveta haela aea.

¹⁵ Are erero maeaeape, E va araro leita rare aro ha?

¹⁶ Simon Peter arero kavale maeape, A Keriso, Aualari ovokake ve akore.

¹⁷ Iesu arero kavale maeape, A va ikiveveke leive, Simon Bar‐Iona, ehovea aivau kai apu aro la oharo au kileaila, aka arave kaia ve Oa.

¹⁸ Ara aeka aro maeaive, A va Peter, ma have akea ve ara arave ekalesia kukilai. Hell ve okiape oaria areve oropa ve heaorapa va ka.

¹⁹ Are kaia ve basileia ve key oaria aro aiarakilai: A va meahaiapo ve eharu ra hahakilava, are va kaia ve kara hahakilai: A va meahaiapo ve eharu ra hehelaukakilava, la eharu kaia ve kara hehelaukakilai.

²⁰ Are areve kilea haela ahilavahaeape ere are va Iesu Keriso la oharo haela kamaeailue.

Iesu areve aireaki api kai urouki oharo kileape

²¹ Aireaki hare oaria Iesu areve kilea haela oharo mari kileape: Are Jerusalem pekakilai, kai kakare oaria koarakilai, ehovea haela hoaha, oharo haela, hohoa haealula haela ila: kai ere arero ra harilava — are hare irehoila kai le uroukilai.

²² Peter arero arai oki lai aupe kai arero ovoro kopape maria, Amua, A va laria kakekelarue! A laria koara va arekaea.

²³ Aka are helari Peter mari maeape, Satan e, a araro hararua va arekaea — a arave oropa hereavaki haela, ehovea ave ikikekela Aualari ve hovea ka, aka haela ve ikikekela hovea.

Elare kekela v'arekaea

²⁴ Iesu areve kilea haela mari maeaeape, Haela ae araro airekai ra ekekilava, veveke, are elare kekela va arekaea, aka are havahu ve satauro oraiavi araro airekai ekekilai.

²⁵ Haela ae elare ovokake aheke ra leikilava, are va ovokake le paraeakilai. Haela ae elare ovokake ra havoavakilava, ehovea arave harihari, are va ovokake iele koarakilai.

²⁶ Haela va meahaiapo hareho ra avakilava, areve ove ra havoavakilava, areve kavale iele lahoa? Aka haela ve ove ve le kavale leikilai?

²⁷ Ehovea haela ve Akore areve Oa kai aneru ve haharika iele ila kihorerakilai. La hoa are haela oaria kavale leikilai, ereve horova hovea.

²⁸ O iele, ara ero maeaeaive, Maia epavaki uku haela apihaea mai ore lei va ka aiai ere haela ve Akore ve basileia ve ekeki hoa ra eavakilai.