Mark 5 - Pupu Oharo Āre 1963 Genese 1970 Rute 1972

Gerasene ovehahu ila haela lei veveke leipe

¹ Ere ukai poe elahuka Gerasene haela ve ita pekahavape.

² Are va vevaea ve ra ukaki, haela kapu ita ve kihorera arero miri koarape.

³ La haela va kapu ita aeaveape. Haela arero mai haha va hovea ka, kaire — aori horou kara hovea ka.

⁴ Ehovea ere va arero mehaemehae chain havahu hahaeroape, aka are va la chain oaria au koeraearoape, haela oaria are i maraha va ka.

⁵ Oroa i hare oaria ila are kela ve aeaveape, kai kapu ita kara are va hi o kaoka eapapo ape, kai maea iilu have hai heaha iele.

⁶ Are Iesu arai ve eavi vivila areve oropa ve ekaopape.

⁷ Ara hai kara maria itavape, Ara va aro leari leikilai ha, Iesu Akea ve Aualari ve Akore? Ara Aualari ve oropa aro ahilave — a araro ka hararuarue.

⁸ Ehovea are arero maeape, A va ovehahu hirihiri heaha arero harepai havoava.

⁹ Are arero velavela leipe, Ave rare leita ha? Are kavale maeape, Arave rare va Legion, ehovea ela ove oaria.

¹⁰ Ere arero here leipe erero ita lahua paparaeha va arekaea.

¹¹ Kela ita leia ilaita oaria korukai eapai lalavahaeroape.

¹² Ovehahu oaria arero velavela leipe, Elaro la ilaita ve ureve paparaehakive, ela va ereve ureve arahavakilai.

¹³ Are erero le paparaehape. La ove hirihiri heaha oaria arero harepai kihoreavi ilaita ve ureve arahavape: La ilaita oaria harava kaiko ukai hoahuka ma ve le titavape: (ere va 2,000 hovea) ere oaria hareho ma ihahape.

¹⁴ Ilaita kiva haela vivila karikara hihi ve la oharo hukavape, kai kaipure kara. Ere oaria horeavape ehovea la eharu ve iele ore leikive.

¹⁵ Ere Iesu leia horeavape kai ovehahu legion avape la haela eavape — are va pura veveke oaria ikiore lei hahari titavape. Ere iki le ihahape.

¹⁶ Eavavahaeape la haela la ovehahu ila haela ve hari erero maeaeape — la ilaita ve oharo kara.

¹⁷ Ere Iesu velavela leivahaeape, ereve ita harepakive.

¹⁸ Are va vevaea horera, ovehahu avape la haela arero velavela leipe arero koarai elaukive.

¹⁹ Aka Iesu arero mari maeape, Arekaea. Av' aea. A havahu ve la ita aula ave apavara haela oaria maeaeaki Amua aro leari maea laleila ae va aro leari ikihuru laleila.

²⁰ Are ai Decapolis ita oaria Iesu arero leipe la maea hovea oharo kopurapape. Haela oaria iki le ihahape.

Jairus ve mari: Apu epavape uamari

²¹ Iesu vevaea horeai ukai elaukape: haela oaria areve leia korukaiavahaeape are va ma haru poe ve epavape.

²² Iapai, synagogue ve kiva haela rare Jairus, areve leia ekepe. Are arero eavi areve loa ipi ve ekaopape.

²³ Are arero velavela maria leipe, Arave mari hekai apaki ve maia iele. Ara aro here leive — ekela, iki arero mai koharaki, are veveke leikive, are kai ovokake le leikilai.

²⁴ Iesu are i hareho aupe. Aka haela oaria erero koarai auvahaeape, kai areve oki au hereavape.

²⁵ Uamari ae va apu epavape, areve la maea hitolo 12.

²⁶ Are muramura haela oaria maea hovave overa leipe, laelave areve moni kari leilei, aka are veveke au leila, ae va heaha eapapo leipe.

²⁷ Are Iesu ve hari iapai areva areve aire aupe, haela oaria ve aru ve kai areve pura mai koperereape.

²⁸ Ehovea areve ikikekela maria, Ara areve pura hiki ra koperereakilava, ara maea veveke leikilai.

²⁹ Areve apu maea elavelave karia le leipe. Are va maea ure la hohipeva, areve maea veveke le leipe.

³⁰ Iesu leia ore leipe, areve maea ve aheke uku le horeavi ka leipe, are haela oaria hihi ve helari maeaeape, Arave pura pao leita mai kolapererealila ha?

³¹ Areve kilea haela arero maeape, A va haela oaria au eavakue ha? Ere va aro elari hupakai ereru velaru leiaro. Ehovealeve a maria avilara — araro leita kai kolapererealila ha?

³² Are helari lari leipe la haela haropi ovohae eavakive.

³³ La uamari oaoka lei ikihorahora leipe. Ehovea areva ore areve maea leipe la eharu. Are iki areve oropa ve ekaopi oharo iele arero maeape.

³⁴ Are arero maeape, Mari e, ave ikikekela aro lei veveke laleila. Havila ra avi aula, ave maea veveke la.

³⁵ Are leia avi hehe uvi kiva haela ve haela uku ekevahaeai arero mari maeape, Ave mari le api. Ehovea leve a la Haelapo aeka hararuavilava?

³⁶ Iesu ere maeape la oharo iapai are synagogue ve kiva haela mari maeape: Oaoka kalailue — iki kekela hiki.

³⁷ Are haela oaria au hereavape: Peter i James i John, James ve akoreheari ila, ere hiki arero airekai pekahavape.

³⁸ Are synagogue kiva haela ve uvi ekepe, kai hivi i hivavara i arura haela oaria eavape.

³⁹ Are uvi pekape la hoa are erero maeaeape, Ma ikihahika kai hivavara oaria ehovealeve? Mari huru havahu va ka — are avuku i aeave.

⁴⁰ Ere arero area keavape. Are erero oaria hukilala paraeape, kai oa i lou ila kai are i hareho ekevahaeape la haela hiki karape. Ere mari aeaveape la lalava ureve pekahavape.

⁴¹ Are mari hekai mari maeape, Talitha cumi. La oharo ve iele, Mari e, ara aro maeaive — Urou.

⁴² La mari elavelave urai loa veavelaripe, areve epape hitolo 12. Ere oaria iki le ihahape.

⁴³ Are erero muruhari maeaeape ere haela ae maea va arekaea; Are erero maeaeape, Mari hekai eapai avaraki, are larive.