Mark 3 - Pupu Oharo Āre 1963 Genese 1970 Rute 1972

Horo au hareavape haela lei veveke leipe

¹ Are va kai synagogue pekape: leia horo au hareavape haela ae pekape.

² Ere arero ovohae eavape — lehae — are sabati hare la haela veveke leikilai la, ehovea ere ikivere arero oropai maeakive.

³ Are horo hareavape haela maeape, Urai, hihika pava.

⁴ Are erero maeaeape, Lehae ha? Pupu leari ha? Sabati hare mai veveke leikive, aka mai heaha leikive — haela lei makurikive, aka haela harive? Ere va oharo ka, muruha le avape.

⁵ Are va ikiheaha helari erero ovohae eavape, kai ikihuru eapapo leipe ehovea ereve iki aheke iele. Are la haela maeape, Ave mai horapa. Are mai le horapape — areve mai veveke havahu leipe, mai ukai hoveahovea.

⁶ Pharisee haela hoahukai Herodian haela ila hareho oharo hukavape, arero leari lei harive.

Maea heaha lahua lahua lei makukuripe

⁷ Aka Iesu i kilea haela ila ma poe ve hoahukape, kai haela oaria Galilee ve arero airekai auvahaeape, Judea haela kara.

⁸ Jerusalem haela, Idumaea haela ve ukai, Jordan la ukai haela kai Tyre i Sidon ila ve ukai haela, ere oaria areve hari iapai areve leia auvahaeape.

⁹ Are va kilea haela vevaea ma poe ve avaki maeaeape — ehovea haela oaria: ere arero helari hupakai hukikiki ave.

¹⁰ Ehovea are haela lei makukuripe — laelave ere oaria are i hareho arero au hukikiroape, ehovea arero mai koharakive.

¹¹ Ovehahu arero eavi areve oropa ekaopi ara hai itavape maria, A va Aualari ve Akore.

¹² Are erero ahilape ere areve rare hihika kalailue.

Iesu kilea haela 12 hareavape

¹³ Are kela pekai areve ikivere leipe haela itavavahaeape. Ere kai areve leia korukaiavahaeape.

¹⁴ Are va haela 12 apostle haela leivahaeape ehovea erero areve oharo iroro arive paparaehakive.

¹⁵ Kai are erero aheke aiarape maea heahaha haela lei veveke leikive, kai ovehahu haruapakive.

¹⁶ Are Simon rare ae va Peter itavape.

¹⁷ James Zebedee ve akore, kai John areve akoreheari — ma haela are rare are itavape Boanerges (la rare ve iele — kaia kukururu are la akoremari).

¹⁸ Kai Andrew, Philip, Bartholomew, Matthew, Thomas, James, Alphaeus ve akore, Thaddaeus, Simon Canaan haela:

¹⁹ Kai Judas Iscariot, arero hihila epape la haela.

Iesu Satan ve horova leivila opore oharo

²⁰ Ere hareho uvi pekahavape, kai haela oaria ereve leia korukaiavahaeape, laelave ere eapai auhohi va au leila.

²¹ Areve apavara la oharo iapai arero mai paeakive ikivere leipe, ehovea ereve oharo maria, are heraho eapapo leive.

²² Jerusalem ve ekevehaeape haela, hohoa haealula haela mari maeape, Beelzebub areve iki ureve le aeave, are va ovehahu ve amua ve aheke ila, laelave are ovehahu haruapaivila.

²³ Are erero itavi parable maeaeape, Satan lehae lei Satan havahu avakakilai ha?

²⁴ Basileia ae va elare urai hahari la leikilava la basileia aheke lei va ka.

²⁵ Lalava aea elare urai hahari la leikilava lalava kara aheke lei va ka.

²⁶ Satan urai elare hahari la leikilava are kara aheke va ka, areve hoa karia leikilai.

²⁷ Haela ae ikivere la leikilava haela aheke ve uvi pekai areve eharu ra hararuakive, are va oropa la haela aheke mai hahakilai, aireaki are areve uvi hararuakilai.

²⁸ O iele ara ero maeaeaive, haela ve akoremari ve haeae oaria hapururukakilai, aeva ereve naoae naoae o heaha oaria kara.

²⁹ Aka Ove Veveke ve rare o heaha maeaki la haela areve haeae hapururuka va ka, areve heaha kara karia lei va ka.

³⁰ Ehovea ere maeaeape, Are va ovehahu ila.

Apavara mai iele

³¹ Aireaki areve lou i apavara ila arai ve epavape kai are v'ila oharo paraeape.

³² Haela oaria arero au hukikiroape. Ere arero maeape, Iapai — ave lou i apavara ila mahokaea ve leia aro haroparo.

³³ Are erero kavale maeaeape, Arave lou leita, aka arave apavara leita?

³⁴ Are helari haela oaria eavi mari maeape, Eavaila — arave lou i apoheari ila ma.

³⁵ Ehovea Aualari ve ikivere horova ra leikilava, la haela hovea hovea ere arave apoheari, kai arave mariloa, kai arave lou kara.