Luke 9 - Pupu Oharo Āre 1963 Genese 1970 Rute 1972

Aposetolo haela 12 paparaehape

¹ Are haela 12 itavavahaeai aheke aiarape ovehahu haruapakive kai maea heahaha haela lei makukurikive.

² Are erero paparaehape Aualari ve basileia ve iroro arive, kai maea kakare haela mekaka leikive.

³ Are erero maeaeape — e va hahi eharu i kaika i aroa i pai i moni ila kaealue. Akea pura orahoka kara kaoreaulue.

⁴ E va pekahavaki la uvi leia apeapea e la ita harepakive.

⁵ Haela ero auhohi leiki aue la leivahaeakilava, e va la karikara hakurepaki hoa eve loa ve kekele mahuvu lalaeapaki, ihova va la.

⁶ Ere auvahaeai karikara oaria oharo veveke iroro avahaeape, kai ita oaria haela lei makukuripe.

Herod ve ikihorahora

⁷ Herod Tetrarch la horova ve hari iapai ikihorahora eapapo leipe ehovea uku haela mari ape — John Baptist api kai le uroupe.

⁸ Uku haela mariape — Elijah la horerape, uku haela mariape — overa peroveta haela la aeka uroupe.

⁹ Herod ve oharo maria, Ara John ve haro haerapape — Ma ve leita haela ara are v'ila maria oharo iapaivila? Are ikivere arero ovohae eavakive.

5,000 haela eapai lalavahaeape

¹⁰ Apostolo haela helari ekevahaeape la hoa ere leivahaeape horova oaria ere arero kileavahaeape. Are erero lahua kari ai karikara rare Bethsaida ukavupe.

¹¹ Aka haela oaria erero eavi ereve aire auvahaeape. Are erero auhohi leivahaeai Aualari ve basileia oharo erero kileavahaeape; maea kakare haela kara are lei mekaka leivahaeape.

¹² Hare hoauki hoa maeamaea, kilea haela 12 iki arero mari maeape, Ma haela oaria paparaehai maeamaea la karikara avuku ita i eapai ila haropakive, ehovea elaviila maia eapai aue ita apearo.

¹³ Aka are erero maeaeape, E havahu erero eapai aiaraki. Ere kavale maeape, Ela ve maia pai hue ila i ekaka orahokaila hiki: lehae, ela v'ai ma haela oaria ve eapai ilaea leiki learia ha?

¹⁴ Ehovea ere va haela oaria korukaiape 5,000 hovea. Are areve kilea haela maeaeape, Erero maeaeai hiru lahualahua avakive, hiru aeva 50.

¹⁵ Ere laria leivahaeape — haela oaria le avape.

¹⁶ Are va la pai hue ila i ekaka orahokaila kaili ovohae kaia ve iupei erero momorapupe kai le haivavaelape. Are kilea haela haela oaria ve oropa ve aipevahaeakive aiarape.

¹⁷ Ere oaria lalavahaeai eharau le huharavahaeape. Ere va aireaki eapai kepea kaili — hara 12 heloe le koavape.

Peter Iesu va Keriso maeape oharo

¹⁸ Iapaila — are lahua ivaiva leipe la hoa areve kilea haela are i hareho apeape. Are erero apevelavela maria leipe, Haela oaria va arave va leari arula ara leita ha?

¹⁹ Ere kavale maeape, John Baptist, aka, uku haela Elijah rare arura, kai uku overa peroveta haela aro aeka urou rare arura.

²⁰ Are erero apevelavela leipe, E va arave va leari aro ara leita ha? Peter arero kavale maeape, A va Aualari ve Keriso.

Iesu ve aireaki api kai urouki oharo

²¹ Are erero ape karava maeaeape — ere la oharo haela ae va kamaeaelue.

²² Are mariape, Haela ve Akore kakare oaria koarakilai, haela hoaha i oharo haela i hohoa haealula haela ila arero haure lei harilai: are va hare ilehoila kai uroukilai.

Elare kekela v'arekaea

²³ Are haela oaria maeaeape, Haela ae araro airekai ra ekekilava, veveke are elare maea kekela va arekaea, aka are havahu ve satauro hare oaria oraiavi araro airekai ekekilai.

²⁴ Ehovea haela ae ovokake aeakive ikivere la leikilava, la haela aire ovokake lei va ka — aka haela ae elare ovokake arav'ila haure la leikilava, are aire ovokake le leikilai.

²⁵ Haela va meahaiapo eharu hareho ra aeakilava, kai areve ove ra havoavakilava, areve kavale iele lahoa?

²⁶ Arav'ila kai arave oharo v'ila makiri leiki la haela, aireaki haela ve Akore areve Oa i aneru ila ve haharika ila kihoreavaki hoa la haela v'ila makiri leikilai.

²⁷ Aka ara ero o iele la maeaeaive — Uku maia apealula haela apihaeaki maea ore lei va ka aiai ere Aualari ve basileia la eavakilai.

Iesu ve maea koelaripe

²⁸ Ma oharo karia lei aireaki hare 8, are Peter i John i James ila hareho kela kari pekape ivaiva leikive.

²⁹ Are ivaiva leipe la hoa areve oropape le koelaripe, areve pura kara houhuka lei ovava eapapo hovea le leipe.

³⁰ Iapai, haela orahokaila are i hareho oharo hukavape.

³¹ La haela va Moses i Elijah ila, are i hareho areve aireaki apaki ve la horova oharo hukavape, Jerusalem aireaki leikive la horova.

³² Peter i hareho apearoape la haela ovohae hoeavahaeape, aka — ere ovokake iele leipe la hoa ere areve haharika hihika le eavape, are i hareho epavape la haela orahokaila kara.

³³ Iapaila, erealila arero hakurepape la hoa Peter Iesu mari maeape, Haelapo, veveke elaviila maia apearo; ela kovo uvi ilehoila kukueakilai, ae v'ave, aeva ela ve, aeva Elijah ve — are va ikihorahora learia oharo maeakive.

³⁴ Are la oharo laila meuru kihorera erero le aerape — meuru erero aerape la hoa ere oaoka eapapo leivahaeape.

³⁵ Meuru ve ara kitavape maria, Maia ara iki havahu akore, areve oharo iapaila.

³⁶ La ara kitavape hoa ere Iesu hiki eavape. Ereve oharo kari leilei, ere kai eavape la eharu oaria ere haela au maeaeaila.

Ovehahu ila akore lei makuripe

³⁷ La opoa hare, ere la kela ve kihoahukape hoa, haela oaria iele arero oki koarape.

³⁸ Iapai, haela haroapo ara mari itavape, Haelapo, ara aro here leive, a arave akore la eavaki, arave akore haroapo hiki ma:

³⁹ a iapai, ovehahu arero hulaveravakilava are hi eapapo ave — are areve maea uki hareavave aiai areve ape ve ohare le horerave — are arero hakurepa va ka aiai arero maea kakare oaria leikilai.

⁴⁰ Ara ave kilea haela velavela leipe arero la avakakive; ere va la horova hoveahovea au leila.

⁴¹ Iesu kavale mariape, Ikikekelaki aue mai hahaeae vilakao e, ara e i hareho aeavila hare leavaila aiai e v'ila heraho leikive ha? Ave akore lai ekela.

⁴² Are ekepe la hoa ovehahu arero mea ve huikapape, arero maea uki eapapo hareavape — Iesu la ovehahu erereai akore lei makuri oa kai le avarape.

Iesu ve aireaki apaki oharo aea

⁴³ Haela oaria va ikihorahora eapapo leivahaeape ehovea Aualari ve aheke. Aka ere oaria areve horova ve horahora leivahaeape la hoa are kilea haela mari maeaeape:

⁴⁴ E va ma oharo auhohi iapaki: ehovea ere va aireaki haela ve Akore haela ve mai ve avarakilai.

⁴⁵ Aka ere va la oharo mekari au iapaila, areve iele au avarapape, laelave ere la iele ore au leila: ere kai areve ma oharo v'ila velavela leikive oaoka leivahaeape.

Maeoka mai veveke: Haela ae haure kalailue

⁴⁶ Hare ae ere elare oharo hahari ape maria — oropa haela leita leikilai?

⁴⁷ Iesu ereve la oharo iapai are akore hekai lai iki ereve oropa ve aepai mariape,

⁴⁸ Haela ma akore hekai arave rare ve auhohi la leikilava, are araro kara auhohi leive: haela araro auhohi la leikilava, are araro kiparaeape haela kara auhohi leikilai: eve ipi ve la haela eve akea ve haela are la.

⁴⁹ John arero maeape, Haelapo, ela va haela ae ovehahu ave rare v'ila haruapaivila eavape: ela ka arero au hereavape, ehovea are ela i hareho au va ka.

⁵⁰ Iesu arero maeape, Arero ka hereavalue — ero iri leiki aue la haela are va eve haela.

Iesu Jerusalem pekape. Samaria haela arero haure leipe

⁵¹ Iapai — arero lai urapaki hare maeamaea horerape la hoa areve oropape Jerusalem ve ukaki ehoe hiki helari eavape.

⁵² Are kai haela uku areve oropa ve paparaehape: ere ai Samaria haela ve karikara pekahavi areve ita karikikive.

⁵³ Ere arero auhohi au leila ehovea areve oropape Jerusalem ehoe pekakive hovea leipe.

⁵⁴ Areve kilea haela James i John ila laria eavi arero mari maeape, Amua, lehae? A va ikivere ela kaia akea ve a kihoaukive itavakive erero a haeakive (Elijah leipe la mai hoveahovea) ha?

⁵⁵ Aka are airelari erero aihukamaeape.

⁵⁶ Ere kai karikara aeva auvahaeape.

⁵⁷ Ere auvahaeape la hoa haela ae arero maeape, A va lahoa la aukilava, ara kara ai hareho aukilai.

⁵⁸ Iesu arero kavale maeape, Viva ka ura ila, kaia ve ori oaria va loro ila, aka haela ve Akore areve haro koraki aihari karia.

⁵⁹ Are haela ae maeape, Araro airekai ekela. Aka la haela maeape, Amua, aupava, ara oropa arave oa ve koru la ihakilai.

⁶⁰ Aka are arero maeape, Apihaeape haela elare apihaeape haela ve koru ihavakive — av'auki, Aualari ve basileia ve iroro arive.

⁶¹ Haela ae maeape, Amua, ara va aro airekai aukilai: ara va arave apavara haela oaria oropa ikihuru oharo maeaeakilai.

⁶² Aka Iesu arero maeape, Haela ae horova eharu oropa pae aire horova haure la leikilava, la haela are va Aualari ve basileia hoveahovea va ka.