Luke 19 - Pupu Oharo Āre 1963 Genese 1970 Rute 1972

Zacchaeus

¹ Are Jericho araeai le aupe.

² Iapai, haela ae rare Zacchaeus, akea tax korukaia haela erohoho iele, leia aeveape.

³ Are va ikivere Iesu ovohae eavaki are va leita la, aka are au eavaila, ehovea haela oaria, are kara haela ka hekai,

⁴ Are oropa vivila kora eapapo pekai haiavape, ehovea Iesu la oki aukilai.

⁵ Iesu iki la ita epavi ovohae iupei arero le maeape, Zacchaeus, elavelave kihoau, ara va mahau hare ave uvi ai pekakive.

⁶ Are va elavelave kihoau, ikiveveke lei arero auhohi leipe.

⁷ Haela oaria lari eavi mari maeape, Are va mai heaha haela ve uvi aeakive pekape.

⁸ Zacchaeus epavi Amua mari maeape, Amua e, iapa, arave eharu ara hamureai ukai ara merava haela aiarakilai. Ara haela ae va eharu korea va lailava ara la eharu hoa 4 hovea aiarakilai.

⁹ Iesu arero maeape, Mahau hare ma lalava haela ovokake le laleivahaeaila, ehovea ma haela kara Abraham ve meamari.

¹⁰ Ehovea haela ve Akore ekepe, havoavape la eharu haropi lei makurikive.

Talent ve parabole

¹¹ Ere ma oharo iapai, are kai parabole aeka maeape, ehovea are va Jerusalem maeamaea, aeka ereve ikikekela Aualari ve basileia la hoa havahu la kihorerakilai.

¹² Laelave are maeape, Amua haela ae ita apehai aupe, ehovea basileia ae avakive, kai aireaki kai ekekilai.

¹³ Are areve horova kiva haela 10 itavavahaeai £10 erero aiari mari maeaeape, E va ma eharu horova va laila, ara va aireaki kai ekekilai.

¹⁴ Aka areve la karikara haela arero ikiheaha leivahaeai arero airekai paraeape oharo maria, Ela va ikivere ka ma haela elave amua leikive.

¹⁵ Areva basileia avi aireaki ekepe la hoa are moni avarape la haela itavakive maeape, ehovea are ereve horova leivahaeape la kavale kai ore leikive.

¹⁶ Oropa haela iki areve oropa ve mari maeape, Amua, ave la £1 aeka £10 la koarape.

¹⁷ Are arero maeape, A veveke leipe, horova haela mekakure e: ehovea a va eharu perehekai kiva auhohi leipe, a va ma hoa karikara 10 kiva leikilai.

¹⁸ Aire la haela iki arero maeape, Ave la £1 aeka £5 koarape.

¹⁹ Are arero kara maeape, A va karikara five kiva leivahaeakilai.

²⁰ Haela aeva iki arero mari maeape, Ave £1 ma, ara va pura hahai auhohi aipepe.

²¹ Ehovea ara aro oaoka leipe, ehovea a va mai aheke haela, a va au aipeila la eharu a kaivavila, a va au apoporauila la hae a va ikaeavila.

²² Are arero maeape, Ave la oharo aro le heheavakilai, a va horova haela heaha e: a va ore overa leipe ara va haela aheke, ara au aipeila la eharu ara kaivavila, kai au apoporauila la eharu ara ikaeavila.

²³ Laelave, ehovealeve a arave moni kakavae horova haela au avaraila, ehovea arave ekeki hoa ara va kepea le koarakilai ha?

²⁴ Are are i hareho epavape haela maeaeape, Areve la £1 hareavi £10 ila la haela avaraki.

²⁵ Ere arero maeape, Amua, areva £10 overa aeape.

²⁶ Ara ero maeaeaive, Eharu ila la haela ere aeka aiarakilai, eharu karia la haela, ereve la perehekai ere hareavakilai.

²⁷ Arave iri haela, araro amua leikive ikivere au leila la haela, erero kari iki arave oropa huru haeakive.

Iesu Amua hovea Jerusalem pekape

²⁸ Are lari avi ereve oropa ai Jerusalem oki aupe.

²⁹ Iapai, are Bethphage i Bethany ila maeamaea kela rare Olivet ekepe.

³⁰ Are kilea haela orahokaila paparaehai mari maeaeape, Ari ai oropaki la karikara: leia haela au horeai loakiaue asini mere au hahape le la pavila: arero helauka lai ekela.

³¹ Haela ealilara la kimaeakilava, evalila arero leve helaukaro, evali kavale mari maeaki, Amua laila ve.

³² Au paparaehape la haela ai are erealilara maeaeape la o hovea le koarape.

³³ Erealila asini akore helaukape la hoa la haela erealilara maeaeape, Eva asini akore leve helaukaro ha?

³⁴ Erealila maeape, Amua laila ve.

³⁵ Erealila arero Iesu ve lai ekepe. Ere ereve pura areve kaka akea ve hurukavi Iesu la akea ve haiavape.

³⁶ Ere auvahaeape la hoa ere ereve pura oki ve hurukavahaeape.

³⁷ Are va karikara maeamaea Olivet kela ipi ve aupe la hoa kilea haela oaria hareho ikiveveke lei Aualari ara hai morapaeape, ehovea ere eavape la horova veveke oaria.

³⁸ Ere maeape, Amua ve rare v'ila ekeki la Amua lei morapaeaki; kaia akea havila ila, akea ve haharika veveke iele.

³⁹ Pharisee haela uku haela oaria ve aru hihi ve arero maeape, Haelapo, ave kilea haela aihukamaeaki.

⁴⁰ Are erero maeaeape, Ara ero maeaeaive, ma haela ve ape kolakaukakilava, ipi ve la have ara hai itavakilai.

Iesu Jerusalem ve ikihuru leipe oharo

⁴¹ Are iki karikara maea iele epavi hi la maria le ape,

⁴² Aro havila avaraki eharu a v'ore va laila, ma hoa kara: aka mahau la eharu a v'ila le aiarapape.

⁴³ Ehovea hare a v'ila kihorerakilai, la hoa ave iri haela ave hereavaki kara hahakilai, ere aro helari hupakai le kokaukakilai.

⁴⁴ Ere aro koa ipi ve huikapai paraeakilai: ave akoremari ila hareho: ere va have ae have ae akea ve hakurepa va ka, ehovea a va ore au leila ave lei makuri hoa.

Iesu Hehe Uvi huhelape

⁴⁵ Are kai Hehe Uvi pekai ilaea leilula haela haruapai mari maeaeape:

⁴⁶ Oharo mari hape, Arave uvi ivaiva uvi la leikilai, e va arero korea haela ve loro hovea leipe.

⁴⁷ Are va hare oaria Hehe Uvi kiriveape, aka oharo haela i akea haela oaria arero harive oki haropape.

⁴⁸ Aka ere va oki au koaraila, ehovea haela oaria areve oharo auhohi iapai ikivere leivahaeape.