Luke 12 - Pupu Oharo Āre 1963 Genese 1970 Rute 1972

Pharisee haela ve hehepo hovea kalaivahaelue

¹ La hoa haela oaria korukaiavahaeape, haela maeakoko, laelave haela ae haela ae ve loa la huharape. Are areve kilea haela aeka maria maeaeape, E Pharisee haela ve la mai kiva leila, ehovea leia ve hehepo mai iele.

² Aka au kokaukape eharu oaria hihika leivahaeakilai — au aiarapape la eharu oaria haela ore leivahaeakilai.

³ Laelave — e muru hoa ape la oharo, haela ovava hoa iapakilai: lalava ureve avako haopape la oharo, haela uvi akea ve iroro arilai.

Kilea haela ve hakakaeaki oharo

⁴ Ara ero maeaeaive — haelakaru e, maea haealula la haela a oaoka kalailue — ere va aireaki heaha aeva leivahaea va ka.

⁵ Aka, e oaoka leiki la haela ara ero kileakilai — eve maea haeakilai, aireaki ero Gehena paraeakive ore la haela, e va oaoka arero leiki va heroe. Kaire, ara ero maeaeaive — e va arero oaoka lei va heroe.

⁶ Ori titaeka 5 ve kavale peni haroapo ka ha? Aualari ve oropa ve la ori haroapo havoava va ka.

⁷ Are va eve haro kolo numera overa kaoape. E oaoka kalaivahaelue — eve kavale eapapo, ori titaeka oaria va kavale hekai.

⁸ Ara ero maeaeaive — Haela araro haela oaria ve oropa ve la vavavakilava, la haela haela ve Akore Aualari ve aneru ve oropa ve vavavakilai.

⁹ Araro haela ve oropa ve haure leiki la haela ara arero Aualari ve oropa ve haure leikilai.

¹⁰ Haela ae haela ve Akore o heaha la aikilava, areve la haeae hapururukakilai — aka haela Ove Veveke v'ila o heaha la aikilava, areve la haeae hapururuka va ka.

¹¹ Ere ero synagogue ureve la halakekeapukilava, kai heheavaki haela i amua haela ila oropa ve la halakekeapukilava, e va hukavaki oharo kai kavale oharo horahora kalaivahaelue.

¹² Ehovea Ove Veveke la hoa havahu o hovea ero kileavahaeakilai.

Eharu oaria ikivere mai: Ikihaveva erohoho haela

¹³ Haela ae arero mari maeape, Haelapo, arave apoheari maeaki are elare haruku hoveahovea hamureakive.

¹⁴ Are arero maeape, Haelakaru, araro heheavaki aka hamureaki horova ve va leita kimaeape ha?

¹⁵ Are erero maeaeape, E kiva leila e va e‐lahua haela ve mai hovea leivahaeaki ave — ehovea haela ve erohoho eharu oaria arero lei makuri va ka.

¹⁶ Are erero parabole oharo kai mari maeaeape, Erohoho haela ae ve kekele eapai eharu oaria lei horeravahaeape;

¹⁷ are elare iki ureve mari kekelape, Ara leari leikilai ha, ehovea arave eapai maeakoko, aeva korukaiaki uvi karia?

¹⁸ Are mariape, Ara mari leikilai. Arave eapai korukaiaki uvi oaria ara kopararapai are le kukueakilai — arave eapai i eharu oaria la uvi are aipevahaeakilai.

¹⁹ Ara elare ove mari maeakilai, Ove e, ava korukaiape la eharu va hitolo oaria hoveahovea leivahaeakilai: ara iki paraeai heraho are kalailue.

²⁰ Aka Aualari arero maeape, A va ikihaveva iele, ma oroa ara ave ove le itavakilai. Laelave a va korukaiape la eharu oaria leita la aeakilai ha?

²¹ Elare erohoho korukaia kai Aualari ve la erohoho kekelaki aue la haela are va lari hiki leikilai.

Iki heraho kalaivahaelue

²² Are areve kilea haela mari maeaeape, Laelave ara ero maeaeaive: eve ovokake hiki kakelavarue — le eapai larilai: maea kara kakelavarue — e va le pura oreaukilai la.

²³ Ovokake areva oropa eharu, eapai va aire. Maea va oropa eharu, pura va aire.

²⁴ Hapa ikikelavaila — ere va eapai apoporai i ikaeaki horova va haveva — ereve eharu i eapai korukaeaki uvi va karia, aka Aualari erero eapai aiaravila. Eva oropa haela, ori oaria eve aireaki va ka ha?

²⁵ Areve maea heaikiapo leikive ikivere la haela elare maea heaikiapo leikilai ha?

²⁶ Laelave e va la horova hekai iele haveva la leikilava, eharu aeva ikihorahora kalaivahaelue.

²⁷ Kora mere oaria aheaulula la maea ikikelavaki — ere horova leivahaea va ka, pura kara he va ka, aka ara ero maeaeaive — Solomon i maupa veveke oaria ila ma eharu ve maupa hoveahovea au leila.

²⁸ Aka Aualari mahau mea ve aeavila kai opoa kemo paraeaki la kora mere maupa veveke la karikikilava, iele havahu iele are ero pura hovea aiara va ka ha? E va ikikekelaki aue haela e.

²⁹ E va au larive eapai i ma ila kaharoparue, kai ikihorahora kalailue.

³⁰ Ma eharu meahaiapo vila‐ipipi oaria haro?-?parura. Aka eve Oa ore e va ma eharu ikivere leilula.

³¹ Kahara, e va areve basileia la haropaki, aireaki ma eharu e va koarakilai.

³² Oaoka kalailue, mamoe hiru hekai e, ehovea eve Oa ero basileia avarakive ikivere leive.

³³ E va overa aeape eharu ilaea leiki, e va heaha leiki aue la eharu ve aroa veveke harive — kaia ve la erohoho heaha lei va ka: leia korea haela ekeva ka: ihoko kara eharu haea va ka.

³⁴ Eve eharu oaria apeaki la ita e va mea oaria iki va kelavalula.

Kiva auhohi leivahaeaki. Horova kiva haela veveke

³⁵ Hopa erekai aheke hahaiaki, lamepa ve ovava kiva hiki leiki.

³⁶ E va ereve amua la karilula haela hovea leivahaeaki — Are uva laeaki hurae ve kiavaki okiape la kokeaki la hoa, ere va okiape elavelave le hapakilai.

³⁷ Amua iki la haela kiva va laila eavakilai, are erero momorapukilai. O iele ara ero maeaeaive — are va elare hopa erekai hahai erero eapai larive avakive maeaeakilai — are havahu elare mai ve eapai erero aiarakilai.

³⁸ Are va hailaea hoa aka oroa hoa la ekekilava, kai erero laria la eavakilava are la horova haela momorapukilai.

³⁹ Aka ma oharo ore leiki — uvi haela korea haela ve ekeki hoa ore ma laelava, are va kiva auhohi le leikilai kai areve uvi hakurepa va ka, haela la uvi kopararapaki ave.

⁴⁰ E kara kiva auhohi leila — ehovea e va iki kelavaki aue la hoa haela ve Akore ekekilai.

⁴¹ Peter maeape, Amua, a va ma parabole elaro hiki ra kimaeaila ha, aka haela oaria ve hareho ha?

⁴² Amua erero maeaeape, Mai ehoe i ikiore iele kiva haela leita? Areve amua arero uvi eharu hareho kiva leikive maeakilai, kai uvi haela oaria ve eapai aiarakive maeakilai.

⁴³ Amua ve ekeki hoa la haela horova kiva ma laila eavi arero le morapaeakilai.

⁴⁴ O iele ara ero maeaeaive — are la haela areve eharu oaria hareho kiva leikive maeakilai.

⁴⁵ Aka la horova kiva haela elare iki ureve mari la kekelakilava — arave amua va haiapo ekeva ka, kai horova haela i uavila ila haru koakive la ipopeavakilava, kai eapai i ma ila lala ihape mai laleikilava;

⁴⁶ Are kekelaki aue la hoa, kai haveva iele la hoa, horova haela ve Amua iki la haela ve hoa haerapai areve eharu oaria haela ae aiarakilai.

⁴⁷ Aeka, amua ve ikivere kara ore overa leipe la horova haela, kai areve eharu oropa karikiki aue la leikilava, kai areve ikivere horova leiki aue la leikilava, arero haru le harilai.

⁴⁸ Aka ore au leila la haela horova kavale heaha hovea la leikilava areve maea haru haroapo haroapo la koakilai. Eharu oaria aeape la haela ere horova eapapo la maeakilai. Eharu oaria kiva leikive maeape la haela kara ere va aeka eapapo maeakilai.

Aireaki Basileia hoa ve ihova

⁴⁹ Ara ekepe meahaiapo a ve veveroro leikive: haela la a overa la ililakilava, heroe, arava ikivere va la.

⁵⁰ Aka araro bapatiso leiki horova kepea le aeave — ara va iki heraho lei lei ara va la horova iele leikilai.

⁵¹ Eve ikikekela ara ekepe meahaiapo havila avarakive ha? Ara ero maeaeaive, Ka, aka ehovea hamureakive.

⁵² Ehovea aireaki hoa lalava haela 5 la apeakilava, ere va hiru hiru le leikilai, ukai 3 ukai 2 aka ukai 2 ukai 3.

⁵³ Ere va hahari mari arilai, oa areve akore, akore areve oa, lou areve mari, mari areve lou, lou areve evera, evera areve lou.

⁵⁴ Are kai haela oaria maeaeape — Eva avara hoa meuru la pekaila la eavakilava, e elavelave maeaive, lai ihaukilai. Are laria leikilai.

⁵⁵ Mea eau lahara la kivikakilava e mari arula, hare eapapo leikilai. Are laria leikilai.

⁵⁶ E opore haela e, e va meahaiapo i kaia ila ve ihova mureakive ore. Ehovealeve e ma hoa ve ihova mureakive haveva ha?

⁵⁷ Ehovealeve e elarelare mai ehoe heheavakive haveva ha?

⁵⁸ A i iri haela ila hareho heheavaki haela ve leia la aukilava a va arero elavelave okiharo ve havila leikive, are aro heheavaki haela ve ita oropa lai auki ave, kai heheavaki haela aro uvi muru gavana haela avaraki ave, uvi muru haela aro uvi muru havahu paraeaki ave.

⁵⁹ Ara aro maeaive — a va aireaki leia ve kihoau va ka aiai a kavale hareho iele le leikilai.