Yuda 1 - Ono

Yudaŋo Kisi Maep Kine Qeke

¹ Yuda, na, Yesu Kristo wane urata ŋei, so na Yakop wane ŋole, so na Zebedi wane gipole, noŋo Kaisaleŋo ŋidora newan ŋungi sari Kaisale Magak wane wet maepko Yesu Kristo ŋo korautŋungi aŋaine teweke gemami, ŋine kibi iwa qe ŋibonmaile.

² Wet menaŋ, peyam so wet maepŋo maine ŋinano watkeware payake.

Isi Don Kito Ebo Ebon Ŋei Eŋane Girem Don

³ Kima maep kopne, na Kaisaleŋo urata maki paki ŋei ŋerep korop ŋebu mainŋone eŋino biraŋonge, eya wane don kisiine qe ŋibonikalane zok nan okanmaike, pakimo ukude yemo don iwa yale qe ŋibonmaile, naso maneo me korop Kaisaleŋo ŋei ŋerep magukoune mali malip wane numa makoboe ŋebonge, yewa isisi ŋei, mali malip wane ŋabaine gemami, edo kito ŋibonikei wane, ŋine togole more mali malip yewa wane diyamine maikei, paki isisi ŋei eŋane don yewa qe esopkau ariyake.

⁴ Ŋei natne Kaisale midaine, eŋe mo sanka sari doku tautau magu keuzo ketkoi, eŋe keuzo maine gemaine, so eŋe doku tautau magu tanik geu paki, kisi maepene midaine okane bailalaŋ urata ma okan okanmami, paki eŋe kine kineene Kaisale wane don maineŋo kawetka more doku tautau tanik so koboine yale ge ma okanmami, Yesu Kristo ŋenane Suwaineze so Waomze weku qaisikka okanmami. Mokaka Kaisale wane ekapko ŋei yaline eŋane don iwa yale qekoi, ŋei yaline eŋe Kaisale wane kaitko seuseu wane biŋek okangoi gemami.

Mokaka Turuŋine Zinge Ebonge Eŋane Don

⁵ Ŋine don kisi mo detwaremami, ŋo na koso yewaka ra qelaŋane ŋidanbe, Waom eŋe Israel ŋei ŋerep Izip kepeo ŋine ebu seseone sarike, ŋo siluŋ eŋane keueno ŋine ŋei ŋerep natne eŋe ŋado aŋaine birau paki donine qelige ŋadekkau, Waomŋo qeliŋongi seukwarekoi.

⁶ So aŋelo ware ware urataene kito qoke more enŋene kepe matene qeliŋkakoi, eŋe papa togon wane mulap togogoleŋo kiye meteene wokomge more qei panaman kotino biraonge, yewao Kaisaleŋo ma peseongi Naso wane toma pamami, Naso yewa bomileki baŋ turuŋine eboniyake, eŋe don urata suwaine Kaisale wano maikei eya wane toma pamami.

⁷ So Sodom, Gomora so mat loli lolik mere arike, eya wane ŋei ŋerewekoune eŋe aŋelo edo okangoi, tanik yalewaka okangoi, eŋe bailalaŋ okane borikine kine kine yau yaup ŋei ŋerep auye ma ariu madoŋ madoŋine zok wakonge, yale okanbi, Kaisaleŋo gerep togongo biraongi ket warekoi, wikile dere gemami, eyamo korop ŋenane girem yewa didiwo detkaŋem paki kaetŋongi, tanik borikine yewa mi okangene.

Waom Don Matali Matali Ŋei Eŋane Don

⁸ Rokop yalewaka Ŋei Matali Matali iwa eŋe kulu kau yewaŋo wetene maingeki enŋene solaene tutule yewa borikine ma okanmami, paki Waom ebu ket biraone more, qeliwo aŋelo qeli ewe zonomenerop eŋe mabaikon okanmami.

⁹ Mokaka, Mikael eŋe aŋelo ŋetneene, ŋo Ŋei Borikinerop Mose wane pareŋinane sorin nagu more Ŋei Borikine rake “noŋo makale”, raki aŋelo Mikael rake, “noŋo makale” raki sori sorin au more Ŋei Borikine don borikine olasiyakane detki, qekake, paki iwa yaleka olatke, “Waomŋo turuŋine giniyake.”

¹⁰ Ŋo ŋei iwa eŋe kine kine korop yewa wane mabaikon okanmami, ŋo eŋe eya wane kine mi detmami, ŋo tanik kine kine korop kineine detmami, yemo osom eŋane rokop dereretene midaine, eŋe yaup wetene ŋoka okangei.

¹¹ Yai, eŋe ge mage daleo okangei? Kainŋo ŋole qe more sot ma wakonge, numa yewa mogare gesokmami. So mane yemo, Balam eŋe Israel wesi wane sowakone more, Kaisale wane kaitko sot ma wakonge, ŋine yale waka wesi aboŋ wane bailalaŋ okane more solaŋine qaisikau sot turuŋ Kaisale wane kaitko okanmami. Koraŋo sogino Kaisale wane urata ŋei Mose yuwankayakane okane more, Kaisale wane don qeki paki sot maratkaki paki seukke. Ŋine yale waka Kaisale wane urata mama ŋetne yuwanka more, numa eyaka gesokeiwo, ŋei yaline, Kaisaleŋo mataliŋungi siukke mida lelekei.

¹² Ŋei yaline eŋe sigit diinerop, ŋinane ruwo ŋara nene lewa lewaŋ ŋino ŋara soep wane batneka sari sarine gamuene midaine, ne bat oka okane, yale. Eŋe weku enŋeneka warenagu okanmami, ŋei yaline eŋe kezoŋ momoŋo tewekone arimaike, paki koya mi waraŋka sarimaike wele midaine, yale. Eŋe eki wele qeqe nasoeno wele mi qe okan mami, paki ŋodoenerop lokake qakŋem pa seuk okanmami, eya wane rokop.

¹³ Eŋe kiwet dibomineŋo suwamaike yale, Borikine kine kineene gamuinerop yewa wane sopolopotne didiwo wakon okanmaike yale. Eŋe serekin edo qeliwo yau yaup ari okanmami yale, ŋei yaline eŋane mat urum yemo di panaman papa togon, yewao naso baŋem gekeiwane Kaisaleŋo biŋek qe ebonge.

Enokŋo Nasoo Turuŋine Maratkaikenane Done Ra Wakonge

¹⁴ Adam wane doko ŋosa ŋabokoune wakone sarimage atak siks (6) okangi Enok wakonge, pakimo Enokŋo mokaka ŋei borikine yaline eŋane don iwa yale ra kineene ra qelaŋane edange, “Kau! Waom eŋe baŋ aŋelo magukoune koboboine, tausen magu suwaine eŋerop lotkekei,

¹⁵ lotke more, ŋei ŋerep korop kineene ma wakon wareyake. So ŋei Kaisale midaine borikine mama, eŋe borikineenane turuŋine makoke ebon wareyake, ŋei Kaisale midaine, borikine mama eŋe sigit borikine korop okangoi, so masi tanik borikine mi oka okane yewa korop ra ma okane Kaisale ŋabakakoi!”

¹⁶ Ŋei yewa eŋe naso baŋem qauŋ qauŋ kito more, ŋei natne bokaon okan okanmami, eŋe borikine kine kine wane simile dere more eya mogare ari okanmami, eŋe wawaine don rau paki enŋene solaene mawa nagu okanmami, eŋe ŋei natne kelok okanone more aboŋ kine kineene yaup ebuma okanmami.

Girem Don

¹⁷ Ŋo kimakop, ŋine yemo Waomze Yesu Kristo wane aposolokoune edo don rakoi, yewa dere malipkaikei.

¹⁸ Eŋe iwa yale ŋidangoi, “Baŋ Naso qoeyakane okangi ŋei natne wakone more Kaisale bat mau paki tenikŋunikei, paki Kaisale midaine gege, enŋene numaene borikine yewa mogare geu paki Kaisale ŋadekkaikei.”

¹⁹ Ŋei yaline eŋe doku tau tau magu mapok qepok okanon okanmami, eŋe kepe ŋei eŋane dereretka mogare ge okanmami, paki Asu Koboboine midaine wet seuseune gemami.

²⁰ Ŋo kimakop, ŋine yemo naso baŋem mali malip koboine wele yewaŋo nabok okanŋungi takorakot togole ge arikei, paki Asu Koboboinane zonomgo naso baŋem meŋenka gekei.

²¹ Yale, okanbi paki Kaisale wane wet maepko bororom gekei, so Waomze Yesu Kristoŋo wet peseinane gege togon ŋiboniyakane tomaka gekei.

²² Ŋei natne wet etkeka gemami, eŋane wet borik desikei.

²³ Paki mapitone more gerep bolam koto ŋine ebuwi sakesikei, so ŋei natne eŋane wetŋine weneŋ boriki enŋenane eweene kito more mapit onikei, paki takot laplapene borikineeneŋo maki panaman oka okane, yewa qikka kakakkaikei, yewa yemo Kaisale wane kaitko me deino mo kine kine yaline eŋe korop panaman so borikine okan waremaike.

Bakom Meŋe Meŋen

²⁴ Waomzeŋo kito qesiŋ okanŋune more wareŋune lukki, mi ket rasukei, eya wane mi ŋaŋaemaike, paki ŋibuki sot midaine so oi bakom gorop qeli ewe zonominane kotino ari lotkekei, Kaisale weku, eŋano lotkekei.

²⁵ Eŋe Kaisale weku, eŋe Waomze Yesu Kristo wane ra more qesi qesiŋze gemaike, eŋe eŋetine mawakaikene, kibi qelaŋan so qeli ewe zonominerop, Ŋei Waomze weku gemaike, eŋe zonomine kakapa, so kine kine korop qeli kotino so kepe kutno pa waremaike eya wane lewet. Eŋe mokaka geke, so ukude gemaike, so baŋ naso baŋem takorakot ge ari geyake! Weleka.