Yohane 9 - Ono

Yesuŋo Ŋei Mane Deine Pilik Pilikine Wakonge Eŋane Deine Ma Lotkeke

¹ Yesu eŋe numa ariki paki ŋei mane nagainane kotino ŋine depilik wakonge, eŋe maratkake.

² Eŋine dokoine edo qesonka rakoi, “Kito ŋebo ŋebon, maŋane sotŋo maki, ŋei iwa eŋe de pilik wakonge? Eŋine sotŋo me naga magaine erane sotŋo maki de pilik wakonge?”

³ Yesuŋo mainge edane rake. “Eŋe deine pilikke, yewa eŋine sot wane me naga magaine erane sot wane mida. Eŋe de pilik wakonge, yemo Kaisale wane zonom togogole, eya wane kine de pilik yewa wane solao wakongi kaikei wane yale wakonge.

⁴ Ukude mo kepe qaemaike, eya wane ŋene Waom wane urata maikene, na oŋom tale nangimo, na sarikole, ruwo kereyakane okanmaike, ŋeiŋo ruwo urata maine mi maikei.

⁵ Na kepo gemaile, naso yewaoka noŋom kepe baŋem eŋane kiwa okane qelaŋan onikale.”

⁶ Yesu eŋe don iwa raki paki eya wane ŋadino mekatine kepo sopotkeke paki, mekatine yewa keperop manigingi, nalek okangiso, nalek yewa mawa de pilik ŋei wane deino qedeŋge.

⁷ Pakiso, olale rake, “Ari kaitŋone Siloam Namugo saukenom.” Doku namuŋ wane eŋet eya wane kine Ono dongo, “Talekake.” Raki so, ŋei yewa eŋe ari dokuwo kaitine saukke, paki zinge sariki, deine toeki potki lotkeki, kine kine korop kawareke.

⁸ Eŋine kimakoune so ŋei natne mo alakan kau mere, ŋei ŋerep wesi aboŋ kine kine mangei wane meŋen one geke, eŋe rakoi, “Ŋeiwa mere wesi wane ŋei ŋerep meŋen one geke, iwa me? Eŋe daleo?”

⁹ Natne eŋe rakoi, “Eŋe weku eya,” ŋo natne eŋe rakoi, “Mida eŋe midakaka, iwa mo eŋe qou qouka, ŋei mane kamaine, eŋe eŋine mida!” Yale rauso ŋei yewa eŋe oŋom edane rake, “Na welekakatne, nae iwa.”

¹⁰ Eŋe qesonka rakoi, “Deŋone daleo okane lotkike?”

¹¹ Rau so eŋe edane rake, “Ŋei eŋetne Yesu oŋo nalek liwage more mawa deno qedeŋgi paki, nolale reke, ‘Ari Siloam doku lomgo kaitŋone saukenom.’ Raki so na arile, ari kaitne saukewe, yewaka dene iwa toeki pot lotke porile.”

¹² Eŋe qesonka rakoi, “Ŋei yewa eŋe diyao gemaike?” Eŋe edane rake, “Na mi detmaile.”

Parisi Eŋe De Pilikŋo Deine Pot Lotkeke Eya Wane Qesonkakoi

¹³ Pakiso, eŋe ŋeiwa de pilik geke, eŋe ma Parisi eŋano arikoi.

¹⁴ Yesu eŋe nalek liwage more, de pilik wane deine qedeŋgi lotkeke, kaiwe eya yemo zonom ma taboŋ met met naso yewao.

¹⁵ Parisi eŋe koso daleo okangi paki deine lotkeke, eya wane manerop qesonkakoi, qesonkau edane rake, “Eŋe nalekŋo deno qedeŋgi, na namugo ari kaitne saukile, eya wane na dene iwa maine pore kamaile.”

¹⁶ Parisi natne eŋe rakoi, “Ŋei yewa urata iwa meke, eŋe Kaisale wano ŋine mi sarike, yalinane eŋe zonom ma taboŋ met met, eya wane ra rokop don yewa mi mogatmaike.” Ŋo natne eŋe rakoi, “Ŋei mane eŋe borikine mamaŋo kait masi togogole iwa yaline Kaisale midaine daleo makirapŋ eya midaka!” Pakiso eŋe edomka poripke magu etke okangoi.

¹⁷ Eso Parisi eŋe ŋeiwae deine pilik pilipine geke, eŋe koso manerop qesonka rakoi, “Ŋeiwa yewa geŋane deŋone maki menagike, ge eyamo eŋane daleo wetkemaine?” Pakimo eŋe doneene turuŋine mainge edane rake, “Eŋe propet mane.”

¹⁸ Eya welekatne Yuda ŋei ŋetne eŋe ŋei yewa eŋe welekatne de pilik wakone gekeŋo, koso deine maine potki lotkeke, eya eŋe kau paki, eya wane eŋe detpi wele mi okangi malipkakoi. Paki eŋe ŋei yewa de pilik wane naga magaine etorau sarikoik.

¹⁹ Pakiso qeson ore rakoi, “Iwa ŋirane medep me? Ŋire ramamik, eŋe de pilik wakonge, eya mayakatne, ŋo eŋe daleo okangi paki mo, koso iwa deine maine potmaike?”

²⁰ Eŋane naga magaine ere rakoik, “Ŋere detmaite, eŋe ŋerane giponse, so ŋere detmaite, eŋe de pilik wakonge,

²¹ Ŋo daleo okangi paki, deine maine pore kamaike, eya yemo ŋere mi detmaite, me maŋo deine ma lotkike, yewa ŋere yale waka mi detmaite. Eŋine qesonkau, eŋe mo medep suwaine, so eŋe oŋom kineine maine ŋidaniyake!”

²² Naga magaine ere Yuda ŋei ŋetne eŋane kaet otki, don yewa rakoik, onoka wane, Yuda ŋei eŋe doneene iwa yale rau paki, mo ra togolekoi, “Ŋei mane eŋe Yesu wane eŋe Mesiya Kaisaleŋo kepe ŋei turuŋze qekokeyakane ra birakake rayakeo, eŋe Yuda Bakom Lewa Lewaŋ urumgo ŋine esop-kaŋem sen ŋadino kesiyake.”

²³ Kine yalinane naga magaine ere rakoik, “Eŋe mo medep suwaine okangane, eŋe eŋine qesonkau!”

²⁴ Eŋe koso atak mane qesonkau atakine etke (2) okange, eŋe ŋei eya de pilik wakonge eŋe orau, sariki olale rakoi, “Ge ra togolenom, Kaisale wane kaitko, so ge don welekatne raikene! ŋene detmaine, ŋei iwa eŋe borikine mama.”

²⁵ Ŋeiwa eyaŋo mainge edange, “Na mi detmaile, eŋe borikine mama, me mida. Na weku detmaile, yemo na dene pilik pilikine gekole, ŋo ukude mo dene pore kamaile.”

²⁶ Eŋe qesonka rakoi, “Eŋe daleo okanganike? Eŋe daleo okane more deŋone malotkike?”

²⁷ Eŋe mainge edane rake, “Na mo ŋidanile, ŋo ŋine don eya desikei wane bauŋine wamaike. Pakimo ŋine koso onoka wane don manerop loutne desikei wane ramami? Ŋine yale waka eŋane dokoine okangei me?”

²⁸ Parisi eŋe sorinka rakoi, “Ge geŋoneka ŋei yewa wane medepine mane, ŋo ŋene yemo Mose wane dokoine.

²⁹ Kaisaleŋo Mose don olatke, eya mo ŋene detmaine, ŋo ŋei yewa eya mo ŋene mi detkamaine, eŋe diyao ŋine sarike!”

³⁰ Ŋeiwa de pilikŋo deine menaŋge, eyaŋo doneene turuŋine mainge edane rake, “Iwa mo ŋine don kine mane ramami! ŋei eyaŋo naŋane dene malotkeke, ŋo ŋine ramami, ŋene mi det kamaine, eŋe diyao ŋine wakonge.

³¹ Ŋene iwa yale detmaine, Kaisale eŋe ŋei borikine mama eŋane doneene mi det okanmaike, ŋo ŋei maine eŋe eŋane ewine kitoki paki, eŋane aŋaine teweke more, eŋe modat kayakeo, eŋe Kaisaleŋo donine maine desiyake.

³² Mokaka qei kino kepe wakonge naso yewao ŋineka pa sake gemage ukude naso iwao eŋe yale waka, ŋei mane nagaine kotino ŋine de pilik wakone geki, ŋei maneŋo deine malotkeke, eya wane don kisi mane mi paki, det okanmaine.

³³ Eya wane, ŋei yewa eŋe Kaisaleŋo mi birakake me Kaisale wano ŋine mi ketke ra, eŋe urata yaline mane mi makirap.”

³⁴ Eŋe Parisi eŋe don eya dere more mainge olale rakoi, “Eya daleo? Ge nagaŋoneŋo borikinerop geukane, ge borikine mama gekone, ge sari ukude weneŋ yale waka gemaine, paki mo ge ŋene kito ŋedangenane okanmaine me? Midakaka!” Yale rau paki, Yuda wane kisi maep lewa lewaŋ urumgo ŋine ma birakau qeinat ketke.

Wetŋo De Pilik Gege

³⁵ Ma birakau qeinat ketki, Yesu eŋe detke, paki ari maratka more olale rake, “Ge Ŋei Wawainane Gipole detka more, malip kamaine me mida?”

³⁶ Raki ŋeiŋo mainge rake, “Suwaine, Ŋei Wawainane Gipole yewa ma? Nolatnom detpe paki, na eŋe maine malip kaikale!”

³⁷ Yesuŋo olale rake, “Ge eŋe mo kamaine, ge eŋerop don iwa aumamik.”

³⁸ Ŋei yewaŋo rake, “Waom, na malip ganmaile!” Yale raki pakiso, Yesu wane kino wawetine kepo qe umi ketke.

³⁹ Pakiso Yesuŋo rake, “Na ŋei kineene ma wakonikalane kepo ketkole, eya wane, de pilikŋo deene potpi maine lotkeyake, ŋo deene maine pore gemamiŋo, weteenane deine pili pilikine okangei.”

⁴⁰ Parisi natne eŋe wene? Yesu osino okorau paki detpi, Yesu eŋe don yewa rake, paki eŋe qesonka rakoi, “Ge ŋenane weneŋ de pilik ramaine me?”

⁴¹ Yesuŋo edane rake, “Ŋine sot wane de pilik gege ra, yemo borikine midaine geu rap, ŋo ŋidom ramami, ‘Ŋene deze weneŋ maine potmaine,’ yewa wane kine yemo ŋine sot korop gemami.”