Yohane 7 - Ono

Yesu Eŋe Ari Naso Suwaine Kake Paki Zonom Mama Matko Wa Metke

¹ Eya wane ŋadino kaiwe mama natne Yesu eŋe Galili kepeo lolike arike. Eŋe Yuda kepeo ariyakane mi kake, onoka wane, Yuda ŋei ŋetne eŋe qekei wane okangoi, eya wane.

² Yuda ŋei eŋane Seli Kise eya wane taboŋ met met wane nasoine mo bomileke.

³ Pakiso, Yesu ŋolekoune eŋe olale rakoi, “Ge mat iwa qeligenom paki Yuda kepeo arinom, geŋone dokoŋone eŋe urata korop kuneŋine ge mamaine, eya kaikei.

⁴ Ŋei mane eŋe ŋei ŋerep koropŋo detkaikei wane raki paki, urata sanka mi ma okanmaike. Ge kine kine yaline makenane ramaine, yemo ge didiwo okoranom paki, kepe baŋem ŋei ŋerep eŋane deo manom, eŋe geŋane kine desikei!”

⁵ Eŋine ŋolekoune eŋe yale waka done dere mi malip kakoi, paki eŋe yale wane eŋe don eya rakoi.

⁶ Eya wane Yesuŋo doneene turuŋine mainge edane rake, “Naŋane naso yemo mi bomile sarimaike. Naso natne korop yemo ŋinane naso.

⁷ Kepe ŋei ŋerep eŋe ŋine maine mi qaisik ŋunikei, ŋo na yemo qaisik nanmami, onoka wane gege mageene borikine yewa tako rakot ra wakone edanbe, eya wane qaisik nanmami.

⁸ Ŋine ŋidom ari taboŋ met met wane naso yewa kau, ŋo na yemo taboŋ met met iwao mi arikale, onoka wane naŋane nasone mi bomile sarimaike, eya wane.”

⁹ Yesu eŋe don yalewa edange, Pakiso eŋe Galili kepeoka toma geke.

Yesuŋo Seli Kise Wane Taboŋine Met Met Yewao Ari Metke

¹⁰ Yesu ŋolekoune eŋe Seli Kise wane taboŋine met met eya mesikei wane alakane arikoi. Pakiso Yesu eŋe yale waka ŋado eŋineka arike, eŋe didiwo mi arike, eŋe sanka arike.

¹¹ Yuda ŋei ŋetne eŋe Seli Kise taboŋine metkoi, yewao Yesu zuwaŋkakoi. Paki qesone rakoi, “Eŋe diyao gemaike?”

¹² Ŋei ŋerep magu suwaine eŋe eŋane donka saŋepka zok ra mogatkoi, pakiso, ŋei ŋerep natne edo rakoi, “Eŋe ŋei maine.” Rauso natne eŋe rakoi, “Mida, eŋe ŋei wet ma siuk okan okanonmaike.”

¹³ Ŋo siluŋ maneŋo eŋane don suwaineka didiwo mi rake, onoka wane eŋe Yuda ŋei ŋetne eŋane kaetongi yale okangoi.

¹⁴ Seli Kise wane taboŋine metpi, keuwo okangi Yesuŋo Bakom urumgo waki, paki kiyeke ŋei ŋerep kisi maep kito edange.

¹⁵ Pakiso, Yuda ŋei ŋetne eŋe zok manerop oŋaene qaeki rakoi, “Ŋei iwa eŋe kibi urumgo mi wake, ŋo daleo okane more, kisi maep wane kine zok detlukmaike?”

¹⁶ Rauso Yesuŋo edane rake, “Na kisi maep wane kine kito ŋidan maile, yemo naewo ŋine mida. Iwamo talenangi ketkole, Kaisale wano ŋine sarimaike.

¹⁷ Ŋei mane eŋe eweke more, Kaisale wane don dere tewekeyakane, naso eŋe baŋ na kisi maep don kito ŋidanmaile, eya wane kine iwa desiyake, na don kito ŋidanmaile, yewa mo Kaisale wano ŋine sarimaike, me na nae dereretko ŋine sarimaike.

¹⁸ Ŋei mane eŋine dereretino ŋine don ŋidaniyake, eŋe oŋomka eŋine eŋet biŋekine ora mawakaikei wane okaniyake, ŋo ŋei mane eŋe talekaki ketke, eŋane eŋet biŋekine ora mawa kayake, ŋei yewa eŋe wawaineine midaine. So eŋano isi don mane mi pamaike.

¹⁹ Ŋine sogino Moseŋo ra rokop don ŋibonge, ŋo siluŋ ŋinane keuwo ŋine maneŋo ra rokop don yewa mane mi tewek okanmaike, paki mo ŋine onoka wane na nekukei wane okanmami me?”

²⁰ Ŋei ŋerep magu eŋe mainge olale rakoi, “Ge asu qotkoineŋo koto ŋono ket gemaike, maŋo gekuki seukkenane okanmaike me?”

²¹ Yesuŋo edane rake, “Na urata kakapa weku ŋei mane ma menaŋ kakole, paki mo ŋine korop oŋaŋine qaeke. Pakimo, eya wane ŋine na nekukei wane okanmami?

²² Onoka wane Moseŋo gipolekop ŋine solaene sisine kitatkei wane ra ŋunge mane, yemo Moseŋo mida, yemo ŋinŋine aso ŋabokopŋine edo masi eya mo kiyekkoi, eya wane ŋine baŋ medewekopŋine baŋ zonom ma taboŋ met met naso yewao solaene sisine kitasikei.

²³ Medep mane zonom ma taboŋ met met naso yewao solaine sisine kitasikeiwo, Mose wane ra rokop don yewa baŋ mi qe barakkei me? Paki mo ŋine onoka wane noŋo zonom mama nasoo ŋei mane mawe menaŋge, eya wane ŋine naŋane sotŋine osimaike?

²⁴ Ŋine deŋineŋo kine kine one more, misuk one wanok onikei, ŋine kine kine one wanok onikei, yemo masi tanik bile me koboboine gege, eyaŋo wele okaniyake.”

Ŋei Ŋerep Koropŋo Yesu Wane Kine Desikei Wane Qesongoi

²⁵ Ŋei ŋerep natne Yerusalem ŋine eŋe kau Yesuŋo kine kine make so okange, eya wane eŋe rakoi, “Ŋei iwa ŋei ŋetne edo suwaine qekei wane zok ra okanmami, iwa mo daleo?

²⁶ Kau! Eŋe lewa lewago don ra okanmaike, paki mo eŋe don olale mi rawetka okanmami! Eya welekatne ŋei ŋetne eŋe detkamami, eŋe Mesiya kaki wane?

²⁷ Ŋo ŋei iwa wane wako wakon matinane kine ŋene koropŋo detka waremaine, ŋo Waomŋo ŋeiwa Mesiya birakaki sariyakane ra rokop donine rake, eya wakongi, ŋei maneŋo eŋane kine eya maine mi desiyake.”

²⁸ Yesu eŋe Bakom Urumgo kisi maep don kito edane okora don suwaineka iwa yale ra edange, “Ŋine welekatne na detnanmami, so na matne diya ŋine sarikole eya detmami me? Ŋo siluŋ na noŋomka mi sarikole, na maganeŋo talenangi sarikole, eya mo welekatne, ŋo ŋine eya mo maine mi detluk kamami.

²⁹ Ŋo na yemo, na eŋe detluk kamaile, onoka wane, na eŋerop gema gewe mo, oŋo talenangi sarikole.”

³⁰ Paki, eŋe don eya dere more ma lukkakei wane okangoi, ŋo siluŋ ŋei maneŋo metine bira solaino mi uwakake, onoka wane makei wane nasoineŋo mi bomileke.

³¹ Ŋo siluŋ ŋei ŋerep magu suwaine eŋano ŋine loutneŋo malipka rakoi, “Mesiya sariyakane, Kaisaleŋo nasoine mo sogino ra more ra rokop donine rake, wane yewaŋo sariyakeo, eŋe ŋei iwaŋo masi kine kine togogole mamaike, eya korop baŋ oŋo yuwanka more, masi kine kine natne wawaineka ma wareyake me?”

Eŋe Tebe Ŋei Biraonbi Yesu Ma Lukkakei Wane Sarikoi

³² Ŋei ŋerep magu eŋe Yesu wane don kine kine loutne saŋepka auye qeuye okane ramageu, Parisi eŋe detkoi, paki eŋe so Pris ŋetne Suwaine, eŋe au more tebe ŋei natne taleongoi, eŋe ari Yesu ma lukkakei wane.

³³ Pakiso Yesuŋo rake, “Na nasomde nigatne bamgoka ŋinerop gekale, ŋo na baŋ zinge Magak talenangi ketkole, eŋano koso arikale.

³⁴ Ŋine baŋ zuwaŋnanikei, ŋo ŋine baŋ mi marat nanikei, onoka wane na mat gekale, yewao ŋine mi arikei.”

³⁵ Yuda ŋei ŋetne eŋe edomka auye rakoi, “Eŋe diyawao ariki ŋene zuwaŋka mi marat kaikene? Eŋe Grik eŋane mat suwaine pa arimaike, yewao Yuda ŋei gemami eŋano ariyake, paki mo Grik ŋei kisi maep don kito edaniyake me?

³⁶ Eŋe ramaike, ‘Ŋine baŋ zuwaŋ nanikei, so ŋine baŋ mi marat nanikei,’ so, ‘Na mat gekale, yewao ŋine mi arikei,’ Kine daleo wane don yewa ramaike?”

Yesuŋo Rake Na Gege Togon Wane Doku Deine

³⁷ Taboŋ mere eŋet kisi maep oka okan naso yewa kaiwe qoi qoine metkoi. Naso yewaŋo naso suwaine okanmaike. Kaiwe yewao Yesuŋo wiye okoraki paki, suwaineka boka rake, “Ŋei mane eŋe dokuinane seukki paki naŋano sari doku neyake.

³⁸ Kaisale wane ekapko iwa yale ramaike, ‘Ŋei mane eŋe na malip naniyakeo, yemo eŋane kotino ŋine gege togon wane doku deine matkine qake ket sik salalak qe payake.’ ”

³⁹ Yesu malip kakoi, ŋei yewa edo Asu maikei wane don iwa rake, naso yewao Asu mi ebonge, yemo onoka wane mida, Yesuŋo don eya rake, eŋe qeli ewe zonomine kotino mi wake, so Asu mi birakaki ketke, mida, baŋ seukki paki qeliwo wake, naso yewao, Asuŋo doku tau tau magu eŋano ket zonom ebonge.

Ŋei Ŋerep Poripke Magu Etke Okangoi

⁴⁰ Ŋei ŋerep magu suwaine eŋano ŋine loutne edo don iwa raki detkoi, paki eŋe rakoi, “Ŋei iwa, eŋe welekatne propet Kaisaleŋo birakaki, kepo sariyakane rake, tomaka gemaine, eŋe mo iwa!”

⁴¹ Natne eŋe rakoi, “Iwa mo Mesiya welekatne!” Ŋo natne eŋe rakoi, “Mesiya eŋe baŋ Galili kepeo mi wakoniyake! Eŋe mat yauwine okanmaikane, eya maine mi wakoniyake, midakaka.

⁴² Kaisale wane ekapŋo ramaike, yemo baŋ Mesiya eŋe Dawit wane ŋosa wili wiliine eŋane keuwo ŋine, so eŋe baŋ Betlehem matko, Dawit mat geke, yewao wakoniyake.”

⁴³ Eso ŋei ŋerep eŋe wetene wiri poripke magu etke okangoi, yemo Yesu wane rau paki,

⁴⁴ natne eŋe ma lukkakei wane okangoi, ŋo siluŋ ŋei maneŋo metine bira solaine mi uwakake.

Yuda Ŋei Ŋetne Eŋe Yesu Mi Malipkakoi

⁴⁵ Tebe ŋei eŋe koso zinge Pris ŋetne Suwaine so Parisi eŋano arikoi. Pakiso, eŋe qeson one rakoi, “Ŋine onoka wane mi ma sarimami?”

⁴⁶ Tebe ŋei eŋe mainge edane rakoi, “Ŋei maneŋo sogino ŋei iwa don ramaike, yalewa mi rake!”

⁴⁷ Rauso, Parisi eŋe qeson one rakoi, “Eŋe ŋine yale waka wet masiuk okanŋunike me?

⁴⁸ Ŋine detpi, ŋenano ŋine ŋetne mane, me Parisi maneŋo eŋane don dere malip kamaike me? I, Midakaka!

⁴⁹ Ŋei ŋerep magu eŋe malip kamami iwa, eŋe Mose wane ra rokop don yewa mi detmami, eya wane eŋe Kaisale wane sowa yewa wane bano waketmami!”

⁵⁰ Eŋano ŋine mane Nikodima, ŋei yewa oŋo alakan Yesu kayakane arike, oŋo edane more rake,

⁵¹ “Ŋenze ra rokop don wane rokopko, ŋene ŋei mane yaup dongo mi birakaikene, ŋene mikepka kineine detkaikene, so eŋe sot okange yewa kaulukkene.”

⁵² Eŋe mainge rakoi, “Eya maine, ŋo ge yale waka Galili ŋine me? Ekap dapot lukenom paki, kine desikene, propet mane Galili kepeo ŋine sari sarine, eya mo mane mi pamaike.”