Yohane 4 - Ono

Yesuŋo Samariya Matko Ŋine Ŋerep Mane Don Olatke

¹ Parisi eŋe Yesu wane iwa yale detkoi, “Eŋe dokoine zok loutne ebuki paki doku tau-ongi Yohane wane magu yuwan-onmami.”

² Iwa, Yesu oŋom ŋei mane doku mi taukake. Dokoine edoka weku tau-ongoi.

³ Yesu eŋe Parisi don rakoi, yewa detki paki, Yuda qelige more koso Galili kepeo zinge arike.

⁴ Eŋe numaine ari more Samariya kepeo lotkeyake.

⁵ Eŋe ariki paki Samariya wane matine suwaine mane, eŋetne Sikar, yewa lotkeke. Mat yewa yemo mo sogino Yakopŋo gipole Yosep kepe mane mange, yewa wane osino pamaike.

⁶ Yakop wane doku lom mane eŋe yewa okoramaike. Yesu eŋe numa arikane zonomine midaki, doku lom meuno pese ket metke, kepe deine mo oŋa bango metki, naso yewao.

⁷ Samariya ŋerep maneŋo doku osiyakane sarike, paki mo Yesuŋo olale rake, “Doku mane ninnom newe.”

⁸ Yesu dokoine eŋe ŋara qolekei wane matko ariu, Yesu eŋe eŋineka mere ŋerep yewa doku wane qesonkake.

⁹ Ŋerepŋo olale rake, “Ge Yuda ŋei, ŋo na Samariya ŋerep, daleo wane noŋo doku ginbe nekenane nolatmaine?” Yuda ŋei so Samariya ŋei eŋe lase pelet wane titiine okane lase wekuwoka mi ne okane gekoi, eya wane ŋerep eŋe yalewa ra Yesu olatke.

¹⁰ Raki mo Yesuŋo mainge olatke, “Ge siluŋ Kaisaleŋo onokaka kine kine manerop wawaine gin okanmaike, so ŋei iwa maŋo doku mannom neyakane golatmaike, yewa detkene ra, yemo ge maine doku wane qeson kanom, mo eŋe doku gege togoninerop maine gingi nenom rap.”

¹¹ Raki mo ŋerepŋo olatke, “Suwaine, ge lase ŋone midaka, ŋo doku lom yemo kiroroine, ŋo gege togon doku wamo diya ŋine osikene?

¹² Ŋenane qerakze Yakopŋo doku lom iwa ŋebonge, eŋine so gipolekoune, so lama bulamakau koune eŋe korop doku iwa ŋine ne gekoi. Goŋo Yakop wane rokop maine yuwankaikene me?”

¹³ Yesuŋo mainge olatke, “Mane eŋe doku iwa neyake, eŋe baŋ koso doku wane manerop seukeyake.

¹⁴ Ŋo mane eŋe doku eya noŋo baŋ manbe neyake, eŋe baŋ ŋado koso doku wane manerop mi seukeyake, Midakaka. Doku eya noŋo baŋ ŋei mane manikale yewaŋo kotino gege wane doku deine malotke maniyake, so gege togon maniyake.”

¹⁵ Yale olatki mo ŋerepŋo rake, “Suwaine, doku yewa ninnom! Paki na koso doku wane manerop mi seukkale, me doku osikalane iwa koso mi sari okanikale.”

¹⁶ Raki Yesuŋo olatke, “Ari ŋaoŋone olatnom paki mo koso iwa zinge sarinom.”

¹⁷ Ŋerepŋo rake, “Na ŋaone midaine.” Yesuŋo mainge olatke, “Ge ŋaoŋone midaine ramaine, eyamo welekatne ramaine.

¹⁸ Ge ŋaokopŋone mete mane 5 ebukone, so ŋeiwa mane eŋerop ukude gemamik, eyamo welekatne geŋane ŋaoŋone me mida. Ge don welekatne nolaline.”

¹⁹ Ŋerepŋo rake, “Suwaine, na mo detmaile, ge propet.

²⁰ Naŋane esep milop kopne Samariya ŋei eŋe bonaga iwao Kaisale meŋenka okangoi, ŋo Yuda ŋei ŋido wa mo ramami, ŋene Yerusalem matko yewaoka Kaisale meŋenka okanikene.”

²¹ Yesuŋo ŋerep olale rake, “Ŋerep, ge naŋane don iwa dere malip kanom. Naso mane pamaike yewa bomileki ŋei eŋe bonaga iwao me Yerusalem matko Kaisale Magak mi meŋenkakei.

²² Samariya ŋei ŋine ma meŋenka okanmami, eyamo mi detlukmami. Ŋo Yuda ŋei yemo detlukka more meŋenka okanmaine. Onoka wane Kaisaleŋo ŋei ŋerep ma menaŋ oniyakane numa yemo Yuda ŋei ŋenano sarike.

²³ Ŋo naso mane baŋ sariyake, yemo mo iwa bomilemaike, yewao ŋei ŋerep meŋe meŋen gorop gemami, eŋe baŋ Magak wele meŋenka lukkei paki, eŋe weteneŋo Asu wane zonomgo so don welekatne, eya wane rokopko Magak baŋ meŋen-kaikei. Meŋe meŋen korop yewa ŋei ŋerep yaline edo Magak meŋen-kakei wane eŋe ra okanmaike.

²⁴ Kaisale eŋe Asu, eya wane meŋen-kaikei wane raso, ŋei ŋerep yewa eŋe weteneŋo Asu wane zonomgo weneŋ don welekatne eya wane rokopko okan okan me masi mayakatne okane more meŋenkakei.”

²⁵ Pakimo ŋerepŋo Yesu olale rake, “Na detmaile, Mesiya, eŋetine mane Kristo baŋ sariyake. Eŋe sariyake naso yewao kine kine korop baŋ oŋo ŋedan wareyake.”

²⁶ Raki so, Yesuŋo olatke, “Na mo iwa! Noŋo don iwa golat maile.”

²⁷ Yale olale okoraki so dokoine eyaka zinge sarikoi paki, so maratkau ŋerep don olatke, eya wane zok oŋaene qaeke. Ŋo siluŋ eŋano ŋine maneŋo olale mi rake, “Ge onokaka makenane? Me qesonka rakoi,” Ge onoka wane eŋerop don aumamik?

²⁸ Paki so ŋerep eŋe doku laseine yewa qeliŋgi metkiso zinge matko ari ŋei ŋerep edane rake,

²⁹ “Ŋine sari ŋei mane kau, eŋe sogino kine kine okangole makole, yewa korop ra wakone nolat waremaike, Kaisale eŋe sogino ra rokop donine ŋei mane sariyakane rake, eya wane wele, eŋe Mesiya mane?”

³⁰ Yale ra edangi so eŋe mat qelige so, Yesu wano sarikoi.

³¹ Naso yewaoka dokoine eŋe Yesu taleka rakoi, “Kito ŋebo ŋebon, ge siluŋ ŋara mane nenom!”

³² Yesuŋo mainge edange, “Na ŋara natne nekalane ma gemaile, ŋine eya wane kine mi detmami.”

³³ Raki so dokoine eŋe edomka auye qeson nagu rakoi, “Ŋei maneŋo ŋara kaki mane mo masari manimi mane?”

³⁴ Yesuŋo dokoine edane rake “Naŋane ŋara yemo talenange, eŋane aŋaine tewekkale so urata makalane ninge yewa ma warewe qoeyake.

³⁵ Ŋidom iwa yale ra okanmami, ‘Meso etke so etke (4) qoeki, ŋara wele wakoniyake.’ Noŋo ŋidanbe, ŋine kaŋ qae more deŋine pore euwo kauluke kau, ŋara wele mo menaŋmaike paki, qesoŋgenane naso mo bomilemaike!

³⁶ Ŋei ŋara wele lokakeyake, eŋe eya wane lewine mayake, Paki mo ŋara wele peike magukeyake, yewa mo gege togon wane biŋek okaniyake. Yale okangi, ŋeiwa ŋara metke, eŋe so ŋara wele lokake magukke ere weneŋ orodoŋ oi bakom kitokeik.

³⁷ Yale okangi mo, don iwa yale welekatne okaniyake, ‘Ŋei maneŋo ŋara qe met okan okanmaike, ŋo maneŋo ŋara wele lokak okanmaike.’

³⁸ Na euwo ŋine ŋara wele lokakkei wane taleŋunbe arikoi, ŋara yewa ŋidom waetnane urataine mi makoi. Ŋei natne edo ŋara urataine yewa makoi ŋo ŋine yemo yaup eŋano ŋine ŋara wele lokak okanmami.”

³⁹ Mat yewa ŋine Samariya ŋei ŋerep loutneŋo ŋerep wane donkisi dere more Yesu malip kakoi, onoka wane ŋerep eŋe edane rake, “Eŋe tanik kine kine mo sogino okane gekole, eyamo korop nolat waremaike.”

⁴⁰ Eso Samariya ŋei ŋerep eŋe mo eya Yesu wano sari more eŋerop geyakane ma walukkakoi. Paki so Yesuŋo eŋerop mat yewao kaiwe etke geke.

⁴¹ Paki so Yesu eŋe wet menaŋ don edangane ŋei ŋerep loutneŋo dere malipkakoi.

⁴² Paki ŋerep olale rakoi, ŋene ukude malip kamaine, eya mo goŋoka don kisiine ra ŋedanine eya wane ka mida, yemo ŋene ŋedom ketzeŋo donine detkamaine, so ŋene iwa yale weneŋ detlukmaine, eŋe welekatne kepe baŋem ŋei ŋerep korop ma menaŋon wareyake.”

Yesuŋo Yuda Ware Ware Mane Wane Gipole Ma Menaŋkake

⁴³ Kaiwe etke yewa geki qoeki eya wane ŋadino Yesuŋo eya qelige Galili kepeo arike.

⁴⁴ Yesu oŋom iwa yale rake, “Propet mane eŋe eŋine kepe matino geki ewine mi kitokei.”

⁴⁵ Yesu Galili kepeo ari lotkeke naso yewao ŋei ŋerep eŋe kima okankakoi, onoka wane eŋe Waomŋo Loloŋonge, eya wane peyadaino zonom mama nasoo peyada mesikei wane Yerusalem matko, masi so urata kine kine zonom mama peyada naso maki kakoi, eya wane yale okankakoi.

⁴⁶ Eso Yesu eŋe mo koso zinge Kana matko Galili kepeo alakan dokuŋo raki qeinge wain okange yewa arike. Ware ware mane yewa geke, eŋane gipole zoma suwaine okankaki, Kaperneyam matko pake.

⁴⁷ Ware ware eŋe detki Yesu mo Yuda kepeo ŋine Galili kepeo arike. Eso eŋe moya Yesu wano ariki paki, Kaperneyam matko weneŋ ari, gipole ma menaŋ kayakane olatke. Gipole mo seukeyakane okane pake.

⁴⁸ Yesuŋo olale rake, ŋine masi suwaine so urata kuneŋineka kau paki, malip nangei, ŋo mi kau paki, yemo mi malip nanbi rap, ŋo yaup yemo midakaka.”

⁴⁹ Ware wareŋo mainge olatke, “Suwaine, narop esat arite, medepne mo seukeyakane okanmaike.”

⁵⁰ Yesuŋo olale rake, “Arinom, medep ŋone baŋ wisikaeyake!” Paki so ŋei eŋe Yesu wane don dere malipka so arike.

⁵¹ Matko ariyakane ariki qelit medewekoune mo numao don ma ari olale rakoi, “Medepŋone mo maine okane gemaike!”

⁵² Eŋe qesononge, “Ma nasoo giponne zoma qeliŋkeke? Eso eŋe rakoi, ‘Yemo wan kilok yatne kepe zingeki, eyao zoma qeliŋkeke.’ ”

⁵³ Yale rau magaine eŋe detke naso yewaoka Yesuŋo olale rake, “Geŋane giponŋone baŋ wiye geyake.” Paki so eŋine so magukoune eŋe korop Yesu malipka warekoi.

⁵⁴ Iwa yemo urata togogole Yesuŋo Yuda kepeo ŋine Galili kepeo sariki paki maki atak etke okange.