Yohane 18 - Ono

Yesu Ma Lukkakoi

¹ Yesu eŋe meŋe meŋen iwa meŋenkaki qoeki mat yewa qelige dokoine eŋerop arikoi. Eŋe ari Kidron doku roino yuwane ket kito erinat wakoi. Kepe yewao eu mane pake, eso Yesu eŋine so dokoine eŋe eu yewa wane kotino waketkoi.

² Yudas Yesurop kima isi isi okangi makei, eŋe eu yewa mo detke, onoka wane naso baŋen Yesu eŋe eu yewa ari dokoine marat onmaŋke.

³ Yalinane Yudas eŋe eu koto arike. Eŋerop ebuki arikoi, yemo kawali ŋei magu mane so bakom urum wane diyam gege tebe ŋei, eŋe pris suwaine edo biraonbi arikoi, so Parisi natne, eŋe kawali aboŋ weneŋ peike arikoi, eso lam so kiwa weneŋ makoi.

⁴ Yesu eŋe masi kine kine korop daleo wakon kayake eya mo korop detwareke. Eso eya wane eŋe osoeno ari qesonone rake, “Ŋine ma zuwaŋkamami?”

⁵ Eŋe donine mainge more rakoi, “Ŋene Yesu Nasaret welaine zuwaŋ kamaine.” Yesu eŋe doneene turuŋine mainge edane rake, “Na iwa.” Ŋo Yudas, balip matiwan, kima isisi ŋei, eŋe yewa eŋerop weneŋ okorake,

⁶ Eŋe dere okorau, Yesu eŋe edane rake, “Na iwa.” Raki eŋe ŋade ŋade ari more kepo ket rasu pakoi.

⁷ Yale okanbi Yesu eŋe koso manerop qeson one rake, “Ŋine ma zuwaŋkamami?” Eŋe rakoi, “Yesu Nazaret mat welaine.”

⁸ Yesuŋo edange, “Na mo ŋidanile, na iwa. Ŋine na zuwaŋ nanmamiwo yemo natne iwa eŋe qeliŋonbi ariu.”

⁹ Yesu eŋe iwa rake yemo alakan meŋenka rake, eya wane wele wakoniyakane iwa rake. “Magak, ge ningone eŋano ŋine weku mane mi qeliŋkawe siukke.”

¹⁰ Saimon Petoro eŋe pilaŋ mageke, Eya wane eŋe maki paki Pris Suwainane qelit medep qe more ketne woninoken yewa kito qokke. Qelit medep eya eŋetine Malkus.

¹¹ Yale okangi, Yesuŋo Petoro olatke, “Pilaŋŋone yewa koso biranom kaweuno wetekep! Ge Maganeŋo wikile naso more ninike, yewa mi makalane wetkemaine me?”

Yesu Anas Wane Kaitko Birakau Okorake

¹² Kawali ŋei magu enŋene so ware wareene weneŋ so Yuda ŋei eŋane tebe ŋei edo Yesu ma muga mugaŋo lukkakoi.

¹³ Pakiso mikepka Anas wano ma arikoi. Eŋe Kaiyapas wane atpine, eŋe koma yewao Pris Wawaine geke.

¹⁴ Kaiyapas oŋo Yuda ŋei edane rake, “Ŋei weku oŋo maine ŋei ŋerep korop eŋane turuŋene seukeyake.”

Petoroŋo Yesu Bisopkake

¹⁵ Saimon Petoro so medepine mane ere Yesu ŋadino mogare arikoik, medepine mane yemo Pris Wawaineŋo eŋe mo det lukkake, eya wane ere Yesurop Pris Wawainane sen koto waketkoik.

¹⁶ Ŋo Petoroŋo yemo mat ŋadino madet osino metke, medepine mane, Pris Wawaineŋo detlukkamaike, eŋe koso zinge sari sen ŋadino saket more madetko ŋerep mane okorake, eŋe olatki paki Petoro wetinat senkoto iwenka waketke.

¹⁷ Ŋerep madet ware ware oŋo Petoro olale rake, “Ge ŋeiwa eri wat na eŋane dokoine eŋano ŋine mane iwa ge me?” Petoroŋo rake, “Midaka, na mida.”

¹⁸ Kepe momoine okangane qelit medep so tebe ŋei eŋe koropŋo gerep puwanbi zeki, lolikka more qenagare okorakoi, Petoro eŋe waketki pakiso, eŋerop okora gerep qenagatke.

Pris Wawaineŋo Yesu Qesonkake

¹⁹ Pris Wawaine eŋe Yesu dokoine eŋane so ŋei ŋerep don dereret natne kito ebo okanmaŋke, yewa wane qesonkake.

²⁰ Qesonkaki, Yesuŋo iwa yale mainge olatke, “Na naso baŋen don didiwo ra ŋei ŋerep edan okanmaŋkole, naŋane kito ebo ebonne yemo korop lewa lewaŋ urumgo so bakom urumgo Yuda ŋei sari qeturaŋ-maŋkoi, yewao didiwo edan maŋkole. Na don mane sanka qe wazae mane siu siuko mi ramaŋkole.

²¹ Paki mo ge onoka wane na qeson-nanmaine? Ŋei ŋerep pa don edanbe det okangoi, eŋe qeson onnom, na don ra okangole yemo korop edo mo detmami.”

²² Yesu eŋe don iwa raki, diyam gege eŋano ŋine tebe ŋei mane yewa okorake, oŋo mete tabeŋo qeki paki rake, “Goŋo Pris Wawaine don yaline olatmaine me?”

²³ Yesuŋo mainge olale rake, “Na don qotkoine ramaileo, yemo ŋei ŋerep iwa daleo ramaile eya edannom. Ŋo siluŋ na don rele yemo don maine, Paki mo ge onoka wane nekumaine?”

²⁴ Eso Anasŋo taleongi, Yesu mulap wokom kakoi, siloke more so iwenka Kaiyapas, Pris Wawaine eŋano ma arikoi.

Petoroŋo Yesu Koso Manerop Bisopkake

²⁵ Petoro eŋe yewaka gerep qanagare okorake, eso natne eŋe qesonka rakoi, “Ge ŋeiwa eriwat wane medep mane iwa ge me?” Ŋo Petoro eŋe bisopkeki paki rake, “Midaka, na eŋane medep mida.”

²⁶ Pris Wawainane qelit mama medep mane, eŋane weŋem sotak ŋei mane, eya Petoroŋo ketne nat pilaŋŋo kito qokke, oŋo rake, “Ge eŋerop euwo genom na mi ganile me?”

²⁷ Koso manerop Petoroŋo rake, “Midaka, na mida.” Yale rakiso yewaka tiyak mane bokake.

Yesu Pailat Wane Kaitko Okorake.

²⁸ Eŋe Yesu Kaiyapas wane matko ŋine mau paki Pailat wane matko ma arikoi, eya mo tutupko so sakoka yewao, Yuda ŋei eŋe ware ware wane matkoto mi wakoi, onoka wane eŋe edomka sauke mauluknaguwi paki Kaisaleŋo loloŋ onge eya wane Peyadaino ŋara weneŋ maine mere nekeiwane yale okangoi.

²⁹ Eso Pailat eŋe qeinat ketki paki qeson one rake, “Ŋine ŋei iwa onoka wane dongo birakamami?”

³⁰ Eŋe iwa yale mainge rakoi, “Eŋe sot mane mi okangirap yemo ŋene eŋe geŋano mi ma sariŋem rap.”

³¹ Pailatŋo edane rake, “Ŋine ŋidomka mau paki ŋin ŋine ra rokop Don ŋinane rokopko dongo birakau.” Yuda ŋei eŋe mainge rakoi, “Ŋene ŋei mane mi qeŋem seukeyakane mo rawet ŋonge.”

³² Masi iwa wakonge, yemo Yesu eŋe seuseu daleo seukeyakane rake, don eya wane weleine wakoniyakane yale wakonge.

³³ Pailat eŋe mat koto zinge waketke, paki Yesu oraki waki qesonka rake, “Ge Yuda ŋei eŋane ŋei Waom me?”

³⁴ Yesuŋo mainge olatke, “Qeso qeson iwa geŋono ŋine sarimaike me ŋei natne edo naŋane ra golatmami?”

³⁵ Raki Pailatŋo olatke, “Ge naŋane ramaine eŋe Yuda ŋei? Iwa yemo geŋone ŋei kopŋone so ŋetne kopene pris edo ge naŋano geu sari biraganimi. Ge onokaka makone?”

³⁶ Yesuŋo rake, “Naŋane ŋei waom gegene eyamo kepe iwa wane biŋek mida, naŋane ŋei waom gegene eyaŋo kepe iwa wane biŋek ra yemo ŋei-kopne eŋe mapit-nanbi, Yuda eŋe baŋ na maine mi neuwi-rap, yemo midaka, ŋo iwa yemo na kepe iwa wane waom midakaka!”

³⁷ Eso Pailatŋo qesonka rake, “Paki mo ge ŋei waom me?” Yesuŋo mainge olatke, “Mo goŋom ramaine, na ŋei waom. Na wakonbe paki kepeo sari lotkekole, yemo kine weku iwa yale wane, don wele ra qelaŋan galane ketkole. Ŋei mane eŋe don wele kima okanka okanmaikeŋo yemo naŋane don det okanmaike.”

³⁸ Pailatŋo qesonka rake, “Don wele eya mo onokaka? Kepe ŋeika eya wane don wele mane daleo det kayake? Don korop wele midaine!” Pakiso Pailat eŋe koso qeinat Yuda ŋei eŋano ketki paki edane rake, “Na eŋane sot mane dongo birakaikenane mi marat kamaile.”

Yesu Seukeyakane Pailatŋo Rakokkake

³⁹ Ŋo ŋinane masiŋine mane ma ge okan okanmami, yemo na loloŋon loloŋon Peyadao naso baŋem mulap ŋei mane ŋinane siwotka ŋibon okan okan maŋkale. Wane ŋine Yuda ŋei waom siwotka ŋibonikalane ŋunmaike me?

⁴⁰ Eŋe aro koli boka kito kaŋ kuroŋ suwaine manerop kakapa okane more, qazom romatkeu dumengi mainge olale rakoi, “Mida, eŋe midaka! ŋene Barabas siwotka ŋebonikene!” Barabas eŋe ŋei enguki paki aboŋene kobu mamaŋke.