Yohane 17 - Ono

Yesuŋo Dokoine Eŋane Qesiŋone More Meŋenkake

¹ Yesuŋo don iwa rawareki qoeki eya wane ŋadino deine potki qeliwo waki iwa yale rake, “Magak, naso mo bomilemaike, ge Giponŋonane qeli ewe zonomine mannom, eya wane Giponŋoneŋo ge yale waka qeli ewe zonomine maine giniyake,

² Onoka waneŋo goŋo kepe baŋem ŋei ŋerep korop eŋane welaene geyakane eŋet biŋek mo ra mangone, eya wane eŋe ŋei ŋerep korop geŋone biŋek sunka mangone, yewa eŋe maine gege togon ma wakone ebongi, naso baŋem ge wakei.

³ Eso gege togon wane kine yemo iwa yale, geŋone biŋek sunka mangone, ŋei magu yewa maine geŋone kine koboboine detluk ganikei, ge Kaisale wele weku, so ge talekanom ketke, Yesu Kristo, eŋe weneŋ detkaikei.

⁴ Na geŋane eŋet biŋek so qeli ewe zonomŋone mo kepeo ŋei ŋerep korop sikan onwaremaile, na urata makalane ra ningone, yemo mo mawe qoe waremaike.

⁵ O Magak! Kepe mi wakonge, naso yewao, na gerop gewe paki, na eŋet biŋek korop okangole, na geŋone qeli ewe zonomŋone yewa ukude kaitŋono koso iwa ninnom. Paki na qeli ewe zonom wekuka mokaka gerop ge more magekole, eya koso ninom mawe paki, na koso gerop gekale.

⁶ “Na geŋane eŋet biŋekŋone yewa kepeo ŋei magu suwaine eŋane keuwo ŋine ŋei sikan one more rawakone, kepeo ŋei magu suwaine edanbe, ge ebu wanok okane ningone, eŋe mo sikan one more, ra wakone geŋone kine edan-waremaile. Eŋe ebu wanok okannom, geŋane biŋek okane more, eŋe geŋane donŋone dere tewekkoi.

⁷ Eso ukude eŋe iwa detmami, yemo iwa yale, kine kine korop na ninwarekone, yemo geŋano ŋineka sari waremaike.

⁸ Biŋek donŋone na ningone, yewa korop eŋe ebonwarewe eŋe dere malipka okangoi. Paki kisi maep don eya wele okange, yewa detlukkoi, so eŋe goŋo welekatne talenannom ketkole yewa weneŋ dere malip kakoi.

⁹ “Na eŋe qesiŋ ongenane rawe paki eŋane meŋen ganmaile, na kepeo ŋei ŋerep eŋe qesiŋ onikenane me eŋane rawe paki mi meŋen ganmaile, ge ŋei ebu wanok okane ningone, yewa eŋaneka meŋen ganmaile, yemo onoka wane, eŋe mo geŋane biŋek.

¹⁰ Naŋane ŋei ŋerep magu ebu gemaile yewa yemo korop geŋane, so geŋone ŋei ŋerep magu ge ma gemaine, yewa yemo korop naŋane, eso eŋe naŋane qeli ewe zonomne kepe ŋei ŋerep sikan onbi kamami. Paki kepe ŋei ŋerep eŋe ŋei ŋerep tego yewa one more, eŋe naŋane eŋet biŋekne mawakei.

¹¹ Na koso kepeo manerop mi gekale, eso iwa yemo geŋano umaile, ŋo eŋe naŋane magu kepo gekei, eŋane ra more meŋen ganmaile. Magak ge koboboine eŋet biŋek ŋonane zonomineŋo wareonnom maineka gekei, eŋet yemo goŋo na ningone, eya wane eŋe wet so magu weku okanikei, ge so na ŋere wet weku eya wane rokop.

¹² Na eŋerop gekole, naso yewao na geŋane eŋet biŋek ŋonane zonomineŋo wareonbe eŋe maineka gekoi, eŋet yewa yemo goŋo na ningone. Na kawet ongole, eso eŋano ŋine maneŋo mi siukke, ŋei weku Yudas eŋe gerep sora wane biŋek raraine. Yemo Kaisale geŋane ekapko don qeqine yewa wane wele wakoniyakane yale okange.

¹³ Na iwa mo geŋano umaile, eya mo naŋane wet peseŋo eŋane kotoeno ket more maine naewo wat watko pamaike, rokop eyaka eŋano payake.

¹⁴ Na geŋane don ebonbe mageu kepe wane biŋek ŋei edo qaisikon okanmami. Onoka wane, na kepe wane biŋek me wet dereret mane mi magemaile, eya wane, eŋe yale waka kepe wane biŋek, me wet dereret mane mi magemami wane eŋe yale okanonmami.

¹⁵ Na kepeo ŋine ebukenane rawe paki mi ramaile, me eya wane mi meŋen ganmaile, ge qesiŋone more ware-onnom, maineka geu, ŋei borikineŋo mi matali oniyake, na eya wane ra more meŋen ganmaile.

¹⁶ Eŋe kepe wane biŋek me wet dereret mi magemami, na yale waka kepe wane biŋek me wet dereret mane mi magemaile.

¹⁷ Geŋane don yemo welerop na eya wane ramaile, donŋone yewaŋo weteno motnom, eŋe koboine geŋone biŋek okangei, geŋane don yewaŋo yemo wele.

¹⁸ Goŋo na talenannom kepeo sarikole, so na ŋei ŋerep eŋane keuweno urata makalane ketkole, yale waka noŋo eŋe kepeo ŋei ŋerep eŋane keuweno ge urata mau, geŋane eŋet biŋekŋone wakoniyakane taleonmaile.

¹⁹ Ŋo na qesiŋ ongalane na noŋomka eŋane rawe paki, gegene geŋano motmaile, eya yemo eŋe welekakatne yale waka don wele yewaŋo ebuki geŋane biŋek ŋei wele, okane gekei.

²⁰ “So na ŋei yewa eŋaneka rawe paki mi meŋen ganmaile, midakaka, na meŋen ganmaile yemo geŋone kisi maep donŋone kepe ŋei ŋerep edanbi eŋe don eya dere more na malipnanikei wane ra more weneŋ meŋen ganmaile.

²¹ Na eŋe wetene koropka weku more, ge Magak weku yalewa ra gekei wane meŋen ganmaile. Magak! Goŋo na wetŋoneŋo qotnan okanmaine, ŋo noŋo ge yale waka wetneŋo qot gan okanmaile, yale waka eŋe ŋere ŋetsarek weteneŋo qotŋosikei wane meŋen ganmaile. Eŋe wet weku okane gekei, yale okane kepeo ŋei ŋerep kito edanbi eŋe goŋo na tale nannom ketkole, yewa baŋ detluke malip nanikei.

²² Ge qeli ewe zonomŋone so eŋet biŋek suwaine na ningone, na qeli ewe zonom weku yewaka eŋe ebongole, eya wane eŋe wet dereret wekuka gekei, ge so na ŋere wet dereret wekuka gemaite yale waka eŋe gekei.

²³ Na eŋano ge more, wetŋo qot onmaile, eso goŋo na yale waka qotnan mainane eŋe weteneŋo edomka yale waka siwap nagu weku okanbi paki, eŋe kepeo ŋei ŋerep kito edanbi, eŋe goŋo talenannom ketkole, eya maine desikei, so goŋo na wet maep okan ongene, yale waka eŋe wet maep okan onmaine.

²⁴ Magak! ŋei ŋerep yewa eŋe goŋo na ningone, edo na gekale mat yewaoka narop weneŋ gekei wane nanmaike, paki eŋe naŋane qeli ewe zonom qelaŋan maine kaikei, qeli ewe zonom qelaŋan so kibi maep ge na ningone yewa, onoka wane, ge kepe mi ma wakongone, naso yewao na wet maep okan nangone.

²⁵ Magak ge koboboine! Kepe baŋem ŋei ŋerep eŋe ge mi det ganmami, ŋo noŋo yemo ge detganmaile, so dokone iwa eŋe detmami, goŋo na talenannom ketkole.

²⁶ Na geŋane eŋet biŋek so don kisiŋone ra qelaŋane edanbe detkoi, so na baŋ koso eŋerop takotke ge more, ma wakon lukkale. Paki eŋe edomka kimakopene wet maep okan nagukei, onoka wane, geŋone wet maepŋone naŋano pamaike, eyaka sikanonbe, eŋano pa wareyake, so na wetneŋo qotone more eŋerop gekale.”