Yohane 14 - Ono

Yesu Eŋe Magak Wano Ari Ari Eya wane Numa

¹ Yesuŋo edane rake, “Ŋine misuk qiseu paki oŋaŋine qaeyake, ŋine Kaisale malipkaikei, so na yale waka malip-nanikei.

² Naŋane Maganane matko urum kotine loutne pamaike, eya wane na mo eya ariwe paki ŋinane numa ma sulukkale. Yewaŋo mi pakirap yemo na don iwa yale mi ŋidanberap.

³ Na ari ŋinane numa ŋine ma sulukewe qoeki, ŋado zinge sariwe paki ŋibu iwenŋune ariwe, ŋine na gekale, yewaoka gekei.

⁴ Mat na arikale, yewao ari lotke lotke wane numaine yemo ŋine mo detmami.”

⁵ Tomasŋo olale rake, “Waom, ge diyao arikene, ŋene yewa mi detmaine. Ŋene mat yewa ari lotke lotke wane numa daleo detkaikene?”

⁶ Rakiso Yesuŋo olatke “Numa, so don welekatne, eya wane kine na, so gege welaine, ŋei mane eŋe numa maneoka Magak wano sari sari, eyamo numa mane mi pamaike, midakaka, naŋanoka wekuku.

⁷ Iwa yemo ŋine mo det nanmami, wane Magane baŋ yale waka detkaikei. Ukude mo ŋine kiyeke more, eŋe welekatne detkemi, so ŋine mo kamami.”

⁸ Pilipŋo olale rake, “Waom, Magak sikan ŋonnom kaŋem. Pakimo yewaŋo dereret so simileze rokopke warekep, ŋene eya wane korop zok ŋaŋaemaine.”

⁹ Rakiso Yesuŋo mainge olatke, “Pilip, na naso kiroroine ŋinerop zok ge sarimaile, ŋo ŋine siluŋ na mi detluknanmami me? Mane eŋe na nan okanmaike, eŋe Magak kamaike. Paki mo ge onoka wane ramaine, ‘Sikanŋonnom Magak kaŋem’?

¹⁰ Ge na mi mane malip nanmaine, Pilip, noŋo Magak wano gemaile, eso Magakŋo naŋano gemaike. Na don ŋidan okanmaile, yewa nae wetnoŋine mi ŋidan okanmaile, Magak, eŋe naŋano gemaikeŋo eŋine urataine ma okanmaike.

¹¹ Ŋine don iwa dere malipnanikei, na Magak wano gemaile, eso Magak eŋe naŋano gemaike. Ŋo midao yemo na urata kine kine korop ma okanmaile, yewa eya detsoroke so malip nanikei.

¹² Na welekakatne ŋidanbe detpi, ŋei mane eŋe naŋane don dere malip kayake, eŋe baŋ na urata mamaile yewa mayake. Welekatne, eŋe baŋ urata kakapa suwaine, na mamaile eya wane rokop yuwane mayake. Onoka wane na Magak wano arikale eya wane.

¹³ Ŋine kine kine yewa me yewa wane rau paki naŋane eŋetne nora meŋenkau na baŋ maikale, paki Magak wane qeli ewe zonom so qelaŋan Gipolano baŋ ma wakoniyake.

¹⁴ Ŋine kine kine mane wane rau paki naŋane eŋetne nora meŋenkau na detŋune more makale.”

Yesuŋo Asu Koboboine Kesiyakane Edange

¹⁵ Ŋine naŋane simile dere wetŋine naŋane motmamiwo, yemo ŋine naŋane don mogare aŋane tewekkei.

¹⁶ Paki na Magak meŋenka more olatpe, eŋe Qesi Qesiŋ mane baŋ ŋiboniyake, yemo don welekatne eya wane Asu, oŋo naso baŋem ŋinerop banine ge ariyake.

¹⁷ Qesi Qesiŋ yewa yemo don wele so mainane Asu Koboboine, kepe ŋei ŋerep eŋe maine mi maikei, onoka wane eŋe maine mi kaikei, me mi detkaikei. Ŋo ŋine yemo eŋe det kamami, yalinane eŋe ŋinerop metmaike, so ŋinane kotoŋino baŋ geyake.

¹⁸ “Na maine mi biraŋune more qeliŋunbe, ŋinŋineka bonep ŋerep medep naga magaene seuseune magak midaine, wanap yale ŋinŋineka gekei, midakaka, na baŋ koso zinge ŋinano sarikale.

¹⁹ Nasomde bamgo nigatne ŋei ŋerep kepeo ŋine eŋe koso na manerop takotke more, mi nanikei, ŋo ŋine yemo baŋ nanikei, so na gege togon gemaile, yale waka ŋine baŋ gege togon gekei.

²⁰ Naso yewao ŋine na Magak wano gemaile, yewa ŋine baŋ desikei, so na Maganano gemaile, so ŋine naŋano gemami, ŋo noŋo yale waka ŋinano gemaile.

²¹ Mane eŋe naŋane pi so ra rokop donne dere malip kayake so teweke ma geyake, ŋei yewa oŋo na wet maep okannaniyake. Mane eŋe na wet maep okannan okanmaike, eŋe naŋane Maganeŋo baŋ wet maep okan kayake, Na yale waka eŋe baŋ wet maep okankaikale, so nae kinene sikanka more, ra wakone manikale.”

²² Yesu eŋe don yalewa raki, Yudas mane, Yudas Iskariot, eya mida, eŋane wasine oŋo Yesu qesonka rake, “Waom, ge daleo wane geŋone kineŋone eya ŋenanoka ma wakonikene, ŋo ge geŋone kineŋone yewa mo kepe ŋei ŋerep natne eŋano yemo maine mi ma wakonikene?”

²³ Pakimo, Yesuŋo donine turuŋine eya mainge olatke, “Mane eŋe na wet maep okannan okanmaike, eŋe baŋ naŋane don dere teweke mageyake, paki naŋane Maganeŋo eŋe baŋ ŋei yewa wane siminkaki, wet maep okan kayake. Eso naŋane Magane so na, ŋere baŋ eŋano sarite eŋerop naso baŋem weneŋ mere kito okane gekene.

²⁴ Mane eŋe naŋane simile dere wet maep mi okan nanmaike, eŋe naŋane don dere tewek mi okanmaike. Don ŋidanbe det okanmami, yewa mo naewo ŋine midakaka, yemo Magakŋo talenangi ketkole, eŋano ŋine sari okanmaike.

²⁵ “Na ŋinerop gewe paki don kine kine iwa yemo mo ŋidan warekole.

²⁶ Qesi Qesiŋ ŋine, Asu Koboboine eŋe Magakŋo baŋ talekaki naŋane eŋetko zonom ŋiboniyakane kesiyake, oŋo baŋ kine kine korop ŋidane kito ŋibon okaniyake, so wetŋine malotkeki noŋo don kine kine korop ŋidan okanmaile, yewa detwarekei.

²⁷ “Na biraŋunbe wet pesek ŋinano payakane na qikka ŋibonmaile, na nae wet pesek ŋine ŋibon maile. Na peyam wet pesekŋine ŋibonmaile yemo kepeo ŋei ŋerep edo ŋibon okanmami yale okane mi ŋibonmaile. Ŋine qiseu paki oŋaŋine misuk qaeyake, ŋine misuk kaet okanikei.

²⁸ Na don iwa yale ŋidanbe ŋine mo derimi, ‘Na mo biraŋune arimaile, ŋo siluŋ ŋinano baŋ koso zinge sarikale.’ Ŋine wet maep okan nanbirap, yemo na Magak wano arikale, eya wane ŋine wetpese detpirap, onoka wane Magakŋo naŋane wawainene gemaike eya wane eŋe wet pese suwaine ŋiboniyake.

²⁹ Kine kine iwa wele korop mi wakongi, na don iwa alakane ŋidanmailane welekatne wakongi ŋine maine malipnanikei.

³⁰ Na don kiroine zok ŋine mi ŋidanikale, onoka wane, kepe iwa wane ŋei waom mo sarimaike, eŋe zonomine midaka, naŋane kutno maine mi wayake.

³¹ Ŋo siluŋ kepe ŋei ŋerep eŋe na Magak wet maep okanka okanmaile, yewa detluk warekei. Kine yalinane na urata don ra ninge, eya wane korop ma waremaile. “Eso maine ŋine wiyeu, ŋene mat iwa qelige ariŋem.”