Yohane 13 - Ono

Yesuŋo Dokoine Eŋane Kiyeene Saukke

¹ Kaiwe weku mere mo Waomŋo Yuda ŋei Loloŋonge, eya wane Peyada mesikei wane naso mo bomileke. Yesu eŋe iwa yale detke. Eŋine nasoine mo bomile maikane eŋe kepe iwa qeliŋgi paki, Magak wano koso ariyake. Oŋo naso baŋem eŋine ŋei ŋerep magukoune iwa kepeo gekoi, eŋane zok okankake. So eŋe dokoine eŋane okankake, eyamo baŋ arimage, eŋine seuseu yewao sikan-ongi qoeke.

² Yesu eŋine so dokoine eŋe rarapko ŋara mire ne metkoi. Ŋei Borikineŋo, Yudas, Saimon Iskariot, eŋane gipole eŋe Yesu liweka don isisi okanka more ŋaba eŋane meto birakaki maikei wane kotino don mo motke.

³ So Yesu eŋe iwa yale detke, Magakŋo zonom korop mo nae meteno ninge, eya eŋe mo detke. So eŋe koso iwa yale weneŋ detke, eŋe Kaisale wano ŋine ketke, so eŋe koso Kaisale wano zinge wayake.

⁴ Eso Yesu eŋe zakeo ŋara qelige wiyeki paki momo takotine solaino suwaine yewa kito qokke. Pakiso sola rato ratok kebaŋino piseke.

⁵ Pakiso doku qakki simen kude maneo ketkiso kiyeke dokoine eŋane kiyeene saukki paki sola rato ratokine kebaŋino pake yewaŋo makoke ratokonge.

⁶ Yale okan one Saimon Petoro wano sariki oŋo olale rake, “Waom, ge naŋane kiyene yale waka saukkenane okanmaine me?”

⁷ Rakiso Yesuŋo mainge olale rake, “Ge ukude na masi iwa okanmaile eya mi detmaine, ŋo siluŋ baŋ ŋado detlukkene.”

⁸ Petoroŋo rake, “Ge naŋane kiyene mi saukkene, eya mida so midakaka togogole!” Rakiso Yesuŋo mainge olatke, “Na geŋane kiyeŋone mi saukkale, yemo ge naŋane medep so ge narop maine mi gekene.”

⁹ Olatkiso Saimon Petoroŋo rake, “Waom, kiyeneka weku misuk saukkene! Meteretkene so lewene weneŋ saukenom!”

¹⁰ Yesuŋo olale rake, “Mane eŋe doku tauyakeŋo yemo koso misuk takotke, tauyake so eŋe kineŋoka tauyake, ŋo solaine eya korop mo qelaŋan wareyake, pakimo diine mida leleyake, ŋine koropŋo diŋine midadaine. Korop ŋine maine, ŋo ŋei wekuŋo yemo maine mida.”

¹¹ Yesu eŋe ŋei maŋo isikaki maikei, eya mo detke, yalinane eŋe rake, “Korop ŋine diŋine midaine libeka. Wekuŋo dirop.”

¹² Yesu eŋe dokoine eŋane kiyeene saukki qoeki eya wane ŋadino momo takotine solaino eya koso biraki waki zinge ari zakeo metmetino pese ket metke. Metki paki qeson one rake, “Ŋine na musele iwa kine kine okanŋunmaile eya wane kine maine detmami me?

¹³ Ŋine kito ŋibo ŋibon so Waom nora okanmami, eya yemo maine. Onoka wane, ŋo na yeŋina gemailane maine nora okanmami.

¹⁴ Na ŋinane Waom so Kito ŋibo ŋibon, eso eya wane na kiyeŋine saukmaile, eya wane ŋine ŋidomka yale waka kiye sau sauk okannagu gekei.

¹⁵ Noŋo numaine okanbe paki sikan-ŋunmaile, ŋine yale waka eya wane rokop okane gekei.

¹⁶ Na ŋidanbe detpi, qelit medep maneŋo ŋei Waominane rokop yuwanka gege eya mo mi pamaike, me qelit urata mayakane biraka birakaine, maneŋo talekake eŋane rokop mi yuwan kayake.

¹⁷ Ukude ŋine kine kine na okanmaile, eya wane kine welekatne iwa mo detkamami, ŋine yewa okan nagu gekeiwo yemo ŋine baŋ wet pese maratkaikei!

¹⁸ “Na korop ŋinane mi ramaile, na ŋei diyawa mo ma wakon ongole eŋe detonmaile. Ŋo Kaisale wane ekapko iwa yale ramaike eya wane weleine welekatne wakoniyake, ‘Ŋeiwa narop mere ŋara nike, oŋo zinge koso kine ma wiye ŋabanane more ebene lagulok naniyake.’

¹⁹ Na don iwa kine kine eya mi wakongi, na ukude ŋidanmailane ŋado wakoniyake. Eso ŋado baŋ welekatne wakoniyake, naso yewao ‘Ŋine na ma, eya mo detluknanikei, yemo iwa yale, na noŋomka yalewa gewakale!’

²⁰ Na welekatne ŋidanbe detpi, ŋei mane eŋe noŋo talekawe ariki, eŋe ma kima okan kayakeŋo, na yale waka kima okannaniyake, so mane eŋe na kima okan naniyakeŋo, talenangi ketkole eŋe weneŋ kima okaniyake.”

Yesu Eŋe Yudas Rawakonkake

²¹ Yesu eŋe don iwa raki qoeki, eya wane ŋadino asuineŋo zok manerop umareke. Paki suwaineka didiwo ra wakone rake, “Na rawe detpi, ŋinane keuwo ŋine maneŋo na neu ŋei ŋaba nanmami, eŋano bira naniyake.”

²² Yale raki dokoine eŋe deeneŋo weku weku aekeu kere pora okangi, don iwa maŋane ramaike rau paki ŋaŋae metkoi.

²³ Dokoine eŋane keuwo ŋine medep mane Yesuŋo eŋane simile kamageke, eya mo Yohane eŋe Yesu wane osino metke.

²⁴ Eŋe Saimon Petoroŋo eŋe lewetineŋo qesikane kait masi okanka rake, “Qeson-kanom, eŋe don iwa ŋei maŋane ramaike.”

²⁵ Rakiso Yohane eŋe sorodoge kere Yesu wane osino mere qesonka rake, “Waom ŋei yewa ma?”

²⁶ Qesonkakiso Yesuŋo rake, “Na kasap suroko qe muruge manbe neyake, ŋei yewa wane ramaile.” Yale raso kasap sisine mane maso suroko qe muruŋgi paki Yudas, Saimon Iskariot wane gipole mange.

²⁷ Mangi nekiso, yewaoka Ŋei Borikeneŋo Yudas wane wetino ketke. Pakiso Yesuŋo olale rake, “Kine kine okangenane wetkemaine, yewa esatkamde okannom!”

²⁸ Ŋara zakeo metkoi, eŋano ŋine maneŋo Yesu eŋe daleo wane don iwa Yudas olatke eya wane kine eŋe mi detkoi.

²⁹ Yudas eŋe wesi kite ware geke, yalinane dokoine natne eŋe wetke rakoi, eŋe ari peyada wane ŋara mane qole sariyakane Yesu eŋe olatmaike, me kine kine natne ŋei ŋerep aboŋene midaine eboniyakane olatmaike.

³⁰ Yudas eŋe kasap neki paki, yewaka wiye arike. Pakiso ruwo kereke.

Yesuŋo Ra Rokop Don Musele Dokoine Edange

³¹ Yudas eŋe biraone ariki, eya wane ŋadino Yesuŋo rake, “Ukude ŋei Wawainane Gipolane kibi qelaŋanine wakonmaike, Paki eŋane ramo Kaisale wane kibi qelaŋan ukude wakonmaike.

³² So eŋane ramore Kaisale wane kibi qelaŋan wakonmaikeo yemo Kaisale oŋom ŋei Wawainane Gipolane kibi qelaŋanine wakoniyake, mi azoŋgi ikopka ma wakoniyake.

³³ Medewekopne, na naso kiroine ŋinerop zok mi gekale. Ŋine na baŋ zuwaŋnanikei, Yuda ŋei edangole yewaka koso siluŋ iwa ŋine ŋidanbe, ‘Na arikale yewaka ŋine maine mi sarikei.

³⁴ Na ra rokop don mane musele ŋine ŋibonmaile, wet maep okannagu gekei, noŋo wet maep okan ŋungole yale waka ŋidomka wet maep okan nagukei.’

³⁵ Ŋine wet maep oka okan nagu geu, ŋei ŋerep korop eŋe ŋune detpi naŋane dokone okanikei.”

Yesu Eŋe Petoroŋo Bisop Kayake Eya Olatke

³⁶ Saimon Petoroŋo Yesu qesonka rake, “Waom, ge diyao arikene me?” Rakiso Yesuŋo olatke, “Na arikale numa yewao ge maine mi mogatnane sarikene. Ŋo baŋ ŋado yemo mogatnane sarikene.”

³⁷ Yale olatki Petoroŋo qesonka rake, “Waom, na onoka wane iwaka geŋane ŋadeŋono mi sarikale? Na geŋane rawe paki seuk-kalane mo ewekmaile!”

³⁸ Yesuŋo donine turuŋine mainge olatke, “Ge welekatne naŋane ranom paki seukkenane ewekmaine me? Na welekatne golatpe detnom, ge atak karewe na mi detkamaile, ra bisopkenom tiyak bokayake.”