Yakop 1 - Ono

¹ Yakop, na Kaisale so Waom Yesu Kristo wane qelit ŋei, noŋo Kaisale wane ŋei ŋerep, Israel magu 12, ŋine ŋinŋine kepe mat qelige more ket din bun wiri yeo yeo kepe baŋem korop rokopke ge arimami, ŋinane kibi iwa qewe paki kaiwe maine ŋibonmaile.

Mali Malip So Dereret

² Kimakopne! Ŋinano liwe liwek so umat kine mane kine mane korop wakon ŋungi ŋine detpi wet peseinerop so bakominerop okaniyake.

³ Onoka wane ŋine mo detmami, kinekine yalineŋo mali malipŋine ma liwekka okan kamageki ŋadino ŋinano weleine baŋ togole togole wakongi togole more umat me wikile eya maine kaukkei.

⁴ Ŋinano togole togole eya wane weleine wakonluke more kaukŋune ari numa kirop yewaŋo iweŋune ariki, ŋine Kaisale wane numa kinekine mane wane mi ŋaŋaekei, midakaka, ŋine maine sot midaine so wet kuneneŋ okane weku mane geu kopkeu lukeyake.

⁵ Ŋo ŋinano ŋine maneŋo dereret suwaine zuwaŋgi paki eŋe Kaisale maine meŋenkaki oŋo baŋ dereret mawakone ŋiboniyake, onoka wane Kaisale eŋe qomine raraine, so don kutne mane mi ŋedan okanmaikeŋo wet maepkoka korop ma wakone ŋebon okanmaike.

⁶ Ŋo ŋine meŋenkaikei wane okane, Waom detlukka malipka more meŋenkaikei, wet etkeka okane more mida, ŋo mane eŋe wet etkekao meŋenkayakeo yemo, kiwetko dibomŋo teweke sari kalaŋango rasi pokki momoŋo puwangi mida lele arimaike, eŋane meŋe meŋenine eŋe rokop yalewaka okaniyake.

⁷ Ŋei yaline eŋe Waom wano ŋine kinekine mane wele mayakane na baŋ maikale, eya mo eŋe misuk desiyake.

⁸ Eŋe wetine eya mo loutne so wiri yeo yeo pamaike, numa weku mogare kinekine korop mi okan mageyake.

Ŋei Ketkele Wanap So Aboŋ Gorop

⁹ Doku tau taune ŋei mane ketkele eŋe Kaisaleŋo baŋ mawa birakayake eya wane eŋe wet pesek desiyake.

¹⁰ Ŋo doku tautaune ŋei natne aboŋene suwaine, eŋe baŋ Kaisaleŋo maket biraoniyake, eya wane eŋe detpi wetene peseyake, onoka wane, ŋei aboŋene suwaine, eŋe eya wane simileine manerop detlukmami, eya wane eŋe baŋ eki zurauneŋo posi buratke ket okanmaike, yale seuke mida lelekei.

¹¹ Kepe deineŋo saki paki sarainane gereuneŋo eki yewa kuku suluŋgi zokone zuraune eya buratke qake ketki kibi maepine siuke, mida lele okanmaike, rokop yalewaka ŋei aboŋine suwaine eŋe urataene mage more gegeene mi ge kirowone kebago zokone seuke buratke qake ket mida leleyake.

Liwe Liwek Wane Don

¹² Ŋo ŋei mane eŋe liwe liwek so umat kinekineŋo wakon kaki togogole ka okorayake, eŋe wet pesek desiyake, onoka wane, eŋe mo togogole mage liwe liwek eya yuwanka waremaike, eya wane lewine eŋe baŋ gege togon wane marok kibi maepkorop yewa mayake, eyamo Kaisaleŋo ŋei wetene eŋano motpi paki wet maep okanka okanmami, eŋane biŋek qeke.

¹³ Ŋei mane eŋe borikine yalineŋo liwekkaki, iwa yale misuk rayake, “Liwe liwek iwa Kaisale wano ŋine sarimaike.” Borikineŋo Kaisale maine mi liwekkayake, so Kaisale oŋom ŋei mane borikine mayakane mi liwekkayake. Eya midakaka!

¹⁴ Ŋo ŋei mane eŋe liwe liwekŋo liwek kamaike, yemo eŋine wetneŋo borikine mayakane bailalaŋ wetke tebaka gemageki liwekka okanmaike,

¹⁵ eŋine wetineŋo bailalaŋ wetke mage mageki, yewaŋo ŋatke more medep mamaike, yemo eŋetine borikine, eso borikineŋo suwa ariki paki medep mamaike, yemo eŋetine seuseu.

¹⁶ Kima maepkopne ŋine misuk dere siuke more isinagukei.

¹⁷ Asu wane aboŋ kinekine maine, so Asu bakom kinekine qelaŋanerop yemo qeliwo ŋine sari okanmaike, eyamo Kaisale, qeli qelaŋan, ma wakon ma wakon welaine, eŋano ŋine sari okanmaike, eŋano main qein me qe lawe pilik me kupkeki panaman wako wakon eya mo mi pamaike.

¹⁸ Kaisale eŋe eŋine wetinane don weleŋo ŋei ŋerewekoune ma wakonŋonge, ŋei doku tautau magu ŋene magak okane, alakane ŋei so kinekine natne korop ma wakonge, eŋane keueno numa maikenane yale okanŋonge.

Don Dere Teweke Okanikene

¹⁹ Kima maep kopne, ŋine iwa yale detpi! Ŋei korop ŋine don dereret wane yemo ikopka ewek warekei, ŋo don wet gereune rop rara so sot osi osi wane yemo dere umarekei.

²⁰ Ŋei mane sot osi osiŋo Kaisale wane masi tanik koboboine yewa mi maratka more ma sorokka ma yau okanmaike.

²¹ Eya wane ŋine ŋidom tanik kinekine diinerop so qeguŋ maguŋ oka okan, yewa korop mapap ka warekei, paki Kaisale wano ketluke bororom ge more kisi maep don koto ŋino mot okanmaike, eya ma nogankaikei, eyaŋo asu oŋa oŋaŋine maine ma menaŋkayake.

²² Kaisale wane kisi maep don ket ŋineŋoka dere koto ŋine misuk isi kaikei, ŋine dere malipka luke more wele koto ŋino wetkeu, wa ketki, malip kau koto ŋino met lukki dere teweke urataine mogare maikei.

²³ Ŋei mane eŋe kisi maep don desiyake, ŋo kotino paki eya wane wele ŋei deŋo kakao mi ma wakone ketŋoka dere mi ma malipka nogan kalukeyake, eŋe yemo ŋei maneŋo wikingo ma kaitine daleo eya aeke kamaike, so eŋe mo koso nigetkamaike, eŋe yale.

²⁴ Eŋe kaitine wikingo aek luluk wareki paki qelige arimaike, pakimo mi azongi eyaka kaitine niget kamaike.

²⁵ Ŋo ŋei mane eŋe rara togon don wele, ŋei siwot ongi mayakatne gege, don eya kaululukka detluke, takorakot malipka magemaike, paki yaup dere qewoloŋ mi okanmaike, eŋe dere tewek, ŋei deŋo kakao, eya weneŋ tingo ma okanmaike, ŋei yewa eŋe yale okanmaikane, Kaisaleŋo eŋe baŋ mosop kaki sotine midaleleki ululuŋ geyake.

²⁶ Ŋei mane eŋe eŋinane detki kisi maep inerop okanmaike me? Ŋei yewa eŋe belakaminane diyamine mi maki paki ma waluk kayake, yemo ŋei eya wane kisi maep magegeine eyamo wele midaine okaniyake, paki eŋe oŋomka kotine isi kayake.

²⁷ Kaisale Magakŋo kisi maeprop koto libeka, sot midaine gege wane detmaike yemo iwa yale, madu wanap so kosi mala, wikile wakile kutno wet borik korop geu, ware one kito qesiŋ ebukei, so kepeo borikine pamaike, eyaŋo koto ŋine maki sigileyakane diyamŋine ma warenagu gekei, eyaŋo mo wele so maine.