Titus 3 - Ono

Asu Wanoŋine Wako Wakon Musele Wakongone

¹ Ge ŋei ŋerep magukopŋone don qe wirike edannom so eŋe enŋene ware ware so ŋei waom kopene eŋane eweene kitou paki, aŋaene teweke more kinekine maine yewaka eweke okanikei.

² Edannom, eŋe ŋei mane don qotkoine misuk olasikei. Midaka! Eŋe ŋei peyamine so kima kima gekei. Paki naso baŋem ŋei korop eŋane kaitko wet peserop bororom gege yewa sikanonikei.

³ Ŋene ŋedom atak mane wet qelaŋ okane, aŋa bira wira okangone paki, sot korop okangone. Ŋene yale okanŋem paki, bailalaŋ kinekine eya wane qelit qeqe okane more, qomze qiseki solazane simileka detkone. Ŋene gegeze korop dere worik so wetŋo ŋei natne eŋane aboŋ kinekine enane bailalaŋ oka okan, ŋei eŋe ŋene ŋaba ŋonbi, ŋene eŋe ŋaba onŋem, yewa wane matali onwarekone.

⁴ Ŋo Kaisale ŋenane Mapi Mapitze eŋane kima kima so wet maepŋo yemo ŋenano lotkeke.

⁵ Eŋe ŋene ŋebu seseŋone eŋino biraŋonge, yemo ŋene ŋedom koboboine ge more, urata mane maine makonane midakaka, ŋo yemo eŋine qomine rarainane ŋebu seseŋone saukŋongi, Asu Koboboineŋo wako wakon musele so gege musele ŋebonge.

⁶ Kaisaleŋo Yesu Kristo ŋenane Mapi Mapitze oŋo ŋebu more eŋino biraŋonge, eŋane raki paki, Asu Koboboine zok manerop qe watŋonge.

⁷ Eŋine qomine rarainane ŋene biraŋongi, Kaisalerop koboine ge more sari gege togon wane biŋek okane, eya wane dereret gekenane, yale okanŋonge.

Don Wele Midaine Ŋadekaikene

⁸ Don iwa yemo welekatne, ge sorin borin okane, don yewa korop togoleka ra edanikene, paki ŋei Kaisale malipka okanmami, eŋe maine togole okora wetene don me dereret, iwaoka more, urata wele korop maine maikei, so eya okanbi, ŋei ŋerep korop mauluk on okanmaike.

⁹ Ŋo qelaŋ don wane aŋa soraŋ au au, ŋosa ŋabo eŋane eŋet tego kiroroine mit mit, sorin nagu sorin nagu, so Israel wane Rara Togon don wane kawali qeqe, yewa yemo ge ŋadek kaikene, yewa yemo mi oka okane so wele midaine.

¹⁰ Ŋei maneŋo qepok mapok okangi, ge girem don atak weku me etke olatnom mi detkiso, yemo girem don koso manerop misuk olasikene, qeliŋ kanom eŋineka geyake.

¹¹ Ge detmaine, ŋei yaline eŋe numa mo qeyauke, eso eŋane borikineine mo qe wakonmaike, yemo eŋe sot korop okanmaike.

Don Qoiqoine

¹² Na talekawe Artemis me Tikikusŋo geŋano uyakeo, ge mayakatne Nikopolis yewao sari marat nanikene, onoka wane na koya naso mat yewao gekalane ramaile.

¹³ Ge masuluke more rara togon don wane kine dereret ŋei, Zenas so Apolos ere arikeik wane, qesiŋ otnom numaetne kiyekeik, so osikene ere kinekine korop sola so wet maep wane ŋaŋaemamik, yewa mo korop ma warekeik.

¹⁴ Ŋei ŋerewekopze ebunom, eŋe kito qesiŋ oka okan wane kine detlukeu paki, urata maine maikei, paki sola wane qesi qesiŋ zuwa zuwaŋ wakoniyake, rokop kito qesiŋ okanbi, kisi maep eŋe welerop okaniyake, eŋe gege wele midaine misuk gekei.

¹⁵ Ŋei ŋerep narop gemami, eŋe koropŋo “kaiwe maine” rau geŋano umaike. Ŋenane “kaiwe maine” ramaine, yewa kimakopze mali malip korop gemami, eŋe ebonikene. Kaisale wane Mosopŋo ŋinano korop pawareyake.