Titus 2 - Ono

Ŋei Ŋerep Suwaine Eŋane Don

¹ Ŋo goŋo yemo koboboine gege, yewaŋo doku tautau magu wele, eya wane don edane kito ebonikene.

² Edannom, ŋei suwaine eŋe doku togole mi nene, eya wane sawe so titiinerop gekei, so dereretene warekau, mayakatneka payake. Eŋe mali malipene payake, eya wane rokopko wet maep korop gekei, paki, umat kinekine wakongi, eŋe mi pelekei, eŋe togogole okorakei.

³ Rokop yalewaka edannom, ŋerep suwaine eŋe ŋerep wele gegeene koboboine gekei, paki eŋe kisi qe qeene midaine gekei, me doku togole waiŋ misuk ne gekei, so eya wane qelit qeqe okanikei, eŋe ŋei ŋerep natne natne kinekine maine yewaka kito edanikei.

⁴ Edane more ŋerep sikanonbi, eŋe ŋaokopene so medewekopene wet maep okanonikei.

⁵ Eŋe wet dereretene warekau mayakatneka paki, gegeene libeka payake, so eŋe matene ma suwatke warekau mayakatneka paki, ŋaokopene so medewekopene kito qesiŋ ebuwi paki, ŋaokopene aŋaene tewekkei, yale okanbi, ŋei eŋe Kaisale wane don mi qikkaikei.

Ŋei Qaluwit Eŋane Don

⁶ Rokop yalewaka ŋei qebin onnom, eŋe dereretene masuluke warekaikei.

⁷ Paki, ge goŋom tanik manik kinekine korop mayakatneka okan warekene, ŋei eŋe kau paki, yewaka mogare okanikei, peyam don mauluke more urataine mam paki kito edanikene.

⁸ Don maineka ra edanikene paki, ŋei eŋe don qotkoine mane misuk raikei, don yewaŋo ŋabakopŋone qomene kitopoke gamuo biraongi, eŋe ŋenane don mane qotkoine mi mageu paki raikei.

Qelit Mama Eŋane Don

⁹ Qelit mama eŋe ware ware kopene eŋane aŋaene tewekeu paki, urata kinekine korop maineka mawareu, ware ware kopene eŋe detpi menageyake, eŋe done ene turuŋine misuk maingekei.

¹⁰ Me eŋano ŋine kobu kinekine mane misuk maikei, kobu maikei wane turuŋine yemo eŋe naso baŋem maineka okanikei so bororom gekei. Yale okanbi, eŋane tanik manik mayakatne okanmaine yewaŋo tebakaki, Kaisale ŋenane Mapi Mapitze, eŋane don kito ŋidan okanmaine, eŋane eŋet biŋek ma wiyeyake.

Ŋene Libeka Ge More Kristo Wane Naso Yewa Tomakaikene

¹¹ Kaisaleŋo ŋei ŋerep korop menaŋgenane raki paki, ŋebu sese ŋoniyakane numa mo ma wakonge.

¹² Sese ŋonge, yewaŋo kito ŋedanmaike, yemo ŋene gege borikine so kepe wane masi tanik qotkoine, yewa qeliŋka warekene, paki, ŋene detluke more numa koboboine gesoke ari, Kaisale wane masi tanik yewa mogare kepe iwa wane kutno naso iwao gekene.

¹³ Naso suwaine mosopinerop kaikenane wetke tomaka gemaine, ŋenane Suwaine Kaisale so Mapi Mapitze Yesu Kristo wane qeli ewe zonom baŋ wakoniyake.

¹⁴ Eŋe ŋenane raki paki, gegeine qikka ŋebonge, borikine kine kine korop yewao ŋine makok ŋongi paki, ŋebuki ŋei ŋerep libe qe more eŋine bonepine okane eweke more masi tanik maineka okangenane, yale okanŋonge.

¹⁵ Don eya korop kito edanikene, paki donŋone togogoleka edane ma togole onikene, so donŋone desikei, yewa ra wetonikene. Qeliŋ onnom eŋano ŋine maneŋo ge misuk yuwangane geu ket biraganiyake.