Roma 7 - Ono

Asu Wane Numa Muselo Gekene

¹ Kimakopne, na rakalane okanmaile, eya ŋine mo detlukmami, onoka wane ŋine koropŋo Mose wane ra rokop don wane kine mo detmami. Ra rokop donŋo ŋei mane eŋe wisika geyake rokop warekaki, eya wane bango geyake.

² Ŋerep mane ŋaunerop, eŋe ra rokop don eyaŋo ŋaune wisika geyakeo, yemo ŋaunano makatakkaki geyake. Ŋo ŋei seukeyakeo, yemo ŋerep eŋe ra rokop donŋo ŋei wano makatakkake eya mo siwotkaki, mulap midaine okanmaike.

³ Ŋo ŋerep eŋe ŋaune wisika geki, ŋei mane mayakeo, yemo ŋerep eya zokit kita kitat orakei, ŋo ŋerep eya eŋe ŋaune seukmaikeo, yemo eŋe ra rokop don eyaŋo mi makatak kayake, eŋe siwot kaki, mulap midaine geyake, paki eŋe ŋei mane mayakeo, yemo eŋe zokit mi kitasiyake.

⁴ Eso kimakopne, ŋine yaleka Kristo wane solainerop ra rokop don wane seukkoi, wane ukude yemo ŋine mo eŋane biŋek okanmami, eŋe seuseuwo ŋine ma wirikkaki wisikae wiyeke, eya wane ŋene weleze maine Kaisale wano wakoniyake.

⁵ Ŋene gege sogine gekone, naso yewao ra rokop donŋo ŋenano borikine makenane simile qotkoine motki, eyaŋo ŋenane solaze korop rokopke urata mawareke, paki ŋene seuke mida sololokke, eya wane wele marat kawarekone.

⁶ Eya wane ukude yemo ŋene ra rokop donŋo koso manerop mi makatak ŋonmaike, mo siwot ŋonmaike, onoka wane ŋene seukkone, yemo atak maneo ra rokop donŋo makatak ŋongi, mulap ŋei okangone, eya wane. Ŋene ukude yemo, ra rokop don sogino qeqine numa eya koso manerop mi mamaine, ŋene Asu wane numa musele eya mamaine.

Rara Togon Don So Borikine

⁷ Eya wane ŋene daleo rakene? Ra rokop don eya oŋomka borikine? Eya Midakaka! Ŋo siluŋ ra rokop don eyaŋo nolatkimo borikine pamaike, eyamo na detmaile. Ra rokop donŋo qom riwe riwe wane don mane mi raki rap, “Ge ŋei kimakopŋone eŋane toran aboŋenane qomŋone mi riwe magekep.” Yale mi raki rap, yemo na eya wane mane mi detpe rap.

⁸ Borikine eya yemo, ra rokop donŋo nagaine mere qesiŋkaki, wet dereretne rikukkaki, qom riwe riwe kine kine loutne wetno wakon okanmaike. Ra rokop donŋo mi paki rap, yemo borikine eŋe siu siukine paki rap.

⁹ Na noŋom sogino ra rokop don midaine gekole, naso yewao wisika gekole, ŋo ra rokop don sarike, naso yewao yemo borikineŋo wisikae wiyeke.

¹⁰ Pakiso na seukkole, so ra rokop donŋo gege ma wakoniyakane raraine, eyamo na iwa yale kamaile, seuseu ma wakonge.

¹¹ Borikineŋo nago nagongo rabidan geki paki, ra rokop don wane ra more isinange paki, borikineŋo nekuki seukkole.

¹² Eso eya wane yemo iwa yale, ra rokop don eŋineka yemo sigeine, so ramatok don eŋe sigeine, koboboine, so maine.

¹³ Pakimo daleo, kine kine maine iwaŋo nekuki seukkole me? I Midakaka! Eya yemo borikineŋo yewa okange, borikine kineine wakon lukeyakane, don maine eyaŋo tingo wakongi, borikine eyaŋo waraŋkaki seuseu naŋano sari wakonge. Eya yemo borikine qotkokoine eya wane kineine didiwo wakoniyakane, yale okange. Pakiso ra rokop donŋo borikinane kine sikan ŋonmaike, yemo zok qotkokoine manerop.

Kiye Meteze So Wet Solaze Korop Borikineŋo Mat Urum Mawareke

¹⁴ Ŋene iwa yale detmaine, ra rokop don yemo Waom wane donso Asu wane piwitne, ŋo na yemo kepe wane piwitne, eya wane na borikinane mulapŋo luk-nanmaike so eya wane qelit mama yale bira-nangoi.

¹⁵ Na kine kine okanmaile, eya wane kine mi detmaile, na yeye mane makalane nangi, mi ma okanmaike, ŋo siluŋ eya wane tungo yemo qikka okanmaile, so mi makale so nekalane raraine, na yewa ma okanmaile.

¹⁶ Na yeye mane makalane, walukmaile, walukewe yewaŋo sikan-nanokanmaike, yemo ra rokop donŋo maine, eya wane na detpe weleka Waom wane don maine okanmaike.

¹⁷ Eso yalinane na weku noŋom kine kine iwa bile maine eya welekatne mi okanmaile, yemo borikine kotono watke pamaike, eyaŋo rikuk-nangi paki qebin-nangi ma okanmaile.

¹⁸ Na detmaile, masi koboboineŋo naŋane kiye meteno so koto solano mat urum ma mi gemaike, ŋei dereret eyaŋoka pamaike. Yeye kine kine maine eya okangalane wetke okanmaile, ŋo na maine mi okan okanmaile.

¹⁹ Na tanik manik maine okangalane det okanmaile, eya mi okan okan maile. Eya wane tungo yemo masi tanik qotkoine, mi okangalane detokanmaile, yewa okan okanmaile.

²⁰ Ŋo na masi tanik mane mi oka okane, eya okanmaileo, yemo kine iwa yale wakonmaike. Na noŋom masi tanik yewa mi okanmaile. Midakaka. Yemo borikine kiye meteno so wet solano rokopke pa waremaike, yewaŋo okan okanmaike.

²¹ Eso yalinane na kawemo, ra rokop don iwa eŋe urata mamaike, na tanik manik maine okangalane rawe, eyaka qotkoineŋo wakonnan okanmaike.

²² Naŋane qomneŋo yemo Kaisale wane ra rokop don yewa dere simile okan okanmaile.

²³ Ŋo siluŋ na kawemo, ra rokop don kine mane eyaŋo naŋane kiye meteno so wet solano urata mawaremaike, ra rokop don mane yewa eyaŋo Kaisale wane ra rokop don simile naŋane wet dereretno pamaike, eyarop kawali yaku more, ŋaba nagumamik. Paki eyaŋo neu luknane more, borikinane ra rokop don, eyaŋo solane korop rokopke ware urata ma okanmaike, yewaŋo mulapko biranan okanmaike.

²⁴ O, na ŋei wet pesekne midaine! ŋei maŋo solane iwaŋo neu seuseuwo bira naniyakane makok naniyake?

²⁵ Kaisale bakomine kitomaile, Waomze Yesu Kristo wane ra more mo siwot nange! Iwa yemo naŋane tanik manik, na noŋomka yemo, na maine Kaisale wane ra rokop donka weku wet dereretneŋo qelitine qeki, nae solaneŋo eyaka borikinane ra rokop don eya wane qelitine qe okanmaike.