Roma 6 - Ono

Borikinane Seukkone Ŋo Kristo Wano Wisikae Gekene

¹ Pakimo ŋene daleo raikene? Ŋene borikine kotinoka takotke geŋem, Kaisale wane qom borikŋo maine baŋ suwa ariyake?

² Yale Midakaka! ŋene borikinane seukkone, ŋo daleo ŋene koso eya wane kotino takotke ge arikene?

³ Ŋine welekatne iwa detpi, ŋene peyam doku taukone naso yewao Kristo Yesu wano takotkekone, ŋene payam doku tauŋem paki, eŋane seuseuino weneŋ takotke seukkone.

⁴ Ŋene doku tau more, Kristorop weneŋ seukkone, paki Kaisaleŋo eŋerop dukŋonge, eya yemo Magak wane qeli ewe zonomine qelaŋan gorop, yewaŋo Kristo seuseuwo ŋine ma wirikkaki wisikae wiyeke, rokop yaleka ŋene maine gege musele mane gekene.

⁵ Ŋene eŋerop makatake weku okane, eŋe seukke yale seukkoneo, yemo numa weku yewaka ŋene baŋ eŋerop makatak nagu weku okanŋem, eŋe okange yale, ma wirikŋongi wisikae more wiyekene.

⁶ Ŋene iwa yale detmaine, ŋenane tanik manikze sogine eya mo Kristorop qeki eŋane kibego seukke, eya yemo borikinane zonomŋo rokop ŋonge, eya qe mataliki maine siukeyakane paki, ŋene koso borikinane qelit qeqe manerop mi qekenane yale okanŋonge.

⁷ Ŋei mane seukeyake, eŋe borikinane zonomgo ŋine siwotkaki ariyake.

⁸ Ŋene Kristorop weneŋ seukkoneo, yemo ŋene yale detlukkene, ŋene baŋ eŋerop weneŋ yaleka gekene.

⁹ Ŋene mo detmaine, Kristo eŋe seuseuwo ŋine ma wirikkaki wisikae wiyeke wane, eŋe baŋ mane mi seukeyake. Seu seu eŋe zonomine manerop mi pamaikane, mi maket birakayake.

¹⁰ Seu seu eya eŋe seukke, yemo borikine atakine atakine makone, eya wane eŋe atak weku seukki qoeke, eso eŋe gegewa iwa gemaike, yemo eŋe Kaisale wane ra more gemaike.

¹¹ Numa weku yewaka ŋinŋinane yaleka wetkekei, yemo borikinane seukkone, yale okanmaike, ŋo wisika gege yemo Kaisale wane, Kristo Yesurop qeturaŋ nagu gemaine, yale okanmaike.

Borikinane Qelit Mi Qekene

¹² Borikineŋo solaŋine siu siukinerop, iwao ŋei waom okan ŋuniyakane raki, misuk detkakei me solaŋineŋo borikine makei wane rikuk ŋungi, eya misuk detkakei.

¹³ Me kiye mete solaŋine natne kine kine qotkoinane mi qebinkau borikinane qelit qeyake, eya wane turuŋine yemo ŋine Kaisale wane uratao waket warekei, paki seuseuwo ŋine ma wirik ŋungane, kiye mete solaŋine Kaisale sunkau, kine kine maine koboboine eya wane qelit qeyake.

¹⁴ Borikineŋo ŋine ŋei waom misuk okan ŋuniyake, ŋine ra rokop don wane bango mi gemami, midaka, ŋine Kaisale wane qom borik eya wane bango gemami.

Qelit Qeqe Koboboine Okane Gekene

¹⁵ Eya wane ŋene daleo okangene? Ŋene maine koso borikine makene. Eya midakaka, onoka wane, ŋene ra rokop don wane bango mi gemaine, ŋene Kaisale wane qom borik wane bango gemaine so ŋene eŋane biŋek okangone.

¹⁶ So ŋine iwa yale mo detkei, ŋine koto so solaŋine qeliŋkau, ŋei mane wane qelit qeqe okaniyake. Ŋo ŋine borikinane qelit qekeiwo, yemo ŋine eya wane weleine seuseu marat-kakei. Yale wane ŋine aŋa tewe tewek okangeiwo, yemo eya wane weleine yemo ŋine ŋei koboboineŋo biraŋunge, ŋine Kaisalerop weneŋ gekei.

¹⁷ Ŋo bakom kito kito yemo Kaisale wane biŋek okaniyake! Onoka wane, ŋo ŋine mo borikinane qelit qeqe okangoi, ŋo siluŋ ŋine koso mo ŋibu zinge Kaisale eŋine don wele eya maratka makoi, eya wane ŋine naso iwao eya dere tewekmami.

¹⁸ Ŋine borikino ŋine siwotŋungi, koboboine gege eya wane qelit qeqe okangoi.

¹⁹ Na ŋei ŋenze wet dereretze pamaike, eyaka mogare don iwa ramaile, yemo onoka wane wet dereretŋine pelekakatne pamaike, eya wane. Naso maneo ŋine wetŋine so solaŋine qeliŋkau, kine kine diinerop so qotkoine eya wane qelit qeqe okangoi, eya yemo qotkoinane. Rokop yalewaka ŋine ukude kotoŋine so solaŋine korop qeliŋkau, koboboine gege eya wane qelit qeqe okaniyake, eya yemo koboboinane.

²⁰ Ŋine borikinane qelit qeqe gekoi, naso yewao koboboine gege eya wane mulap mane mi pa ŋibonge.

²¹ Ŋine naso yewao kine kine okane gekoi, eya wane wele onokaka maratkakoi, ukude masi yewa wane ŋine gamu gamune okanmaike? Masi kine kine eya wane wele yemo seuseu!

²² Siluŋ ukude yemo ŋine mo borikinane mulapko ŋine siwot-ŋunge, eya wane ŋine Kaisale wane qelit qeqe okanmami, ŋinane weleŋine maratkamami, yemo wet kuneneŋine gege, eya motpi eŋanoka wat watko payake, paki eya wane weleine yemo gege togon maratkakei.

²³ Borikinane lewine yemo seuseu makene, ŋo Kaisale wane bakom lewine midaine eya wane wele yemo gege togon maratka more, Kristo Yesu ŋenane Waom, eŋerop tako rakot ge arikene.