Roma 4 - Ono

Abrahamŋo Mali Malip Wane Numa Gesoke Ŋebonge Yewaka Gesokkene

¹ Abraham, ŋenane solaoken qerakze, ŋene eŋane daleo raikene? Eŋe daleo okange?

² Eŋe tanik manik maine okangi Kaisalerop koboboine birakakeo, yemo eŋe eya wane maine eŋine mawa nagukirap. Ŋo siluŋ eŋe Kaisale wane kaitko mi mawa naguke.

³ Eya wane Kaisale wane ekapko yale ramaike, “Abraham eŋe Kaisale detlukkake, so onoka wane mida, mali malipine eya wane raki paki, Kaisale eŋe detkaki, ŋei koboboine okange.”

⁴ Ŋei mane urata mayake, eŋe lewine qolekaikei, lewine qolekamami, eya eŋe yaup wet pesek wane bakom okan kamami, mi okanmaike. Eya yemo eŋe urata mamaike, eya wane lewine okanmaike.

⁵ Ŋo ŋei mane eŋe mali malip mageyake, eŋe urata mi mayake, eŋe Kaisaleŋo ŋei borikine mama raki, sotene midaine okanmami, eŋe detluk kayake, yemo eŋe mali malipine eya wane raki paki detki, koboboine okangi, eŋinerop birakaki geyake.

⁶ Dawit eŋe Kaisaleŋo ŋei mane urata natne mi mama geki, Kaisaleŋo wet pesek okankaki paki, ŋei koboboine ra more mayake, eya wane eŋe wet pesek desiyake, don iwa yale rake,

⁷ “Wet pese desikei ŋei yewa eŋane borikineenane turuŋine Kaisaleŋo qelige ebonge, eŋane borikineene mataliki siukke!

⁸ Wet pese desiyake ŋei eya wane borikineine Waomŋo baŋ mi motki payake!”

⁹ Ŋei wetpese desikei wane don, Dawit eŋe rake, yewa eŋe ŋeiwa solaene piwitne kitatkoi eŋane rake me? Mida, eyamo eŋe ŋeiwa solaene piwitne mi kita kitatne eŋane weneŋ rake. Ŋene Kaisale wane ekapko don iwa yale detmaine, “Abraham eŋe Kaisale detlukkake, so onoka wane mida, eŋine mali malipinane raki paki, Kaisaleŋo detkaki, ŋei koboboine yale okange.”

¹⁰ Naso diyawao iwa wakonge? Iwa eŋe alakan me ŋado Abraham solaine piwitne kitatke naso yewao? Iwamo alakan wakonge, ŋado solaine piwitne kitatkoi, yewao mida.

¹¹ Eŋe solaine piwitne ŋado baŋ kitatkoi, pakiso eŋane sola kita kitatine, yewaŋo yemo oŋa oŋa, eyaŋo kine qe wakonge, onoka wane mida, Abraham wane mali malipinane ra more, Kaisaleŋo detkaki, eŋe alakan ŋei koboboine okangi, ŋado eŋe solaine piwitne kitatkoi, eso eya wane Abraham eŋe lewine alakane, ŋeiwa korop diyawa edo Kaisale detluk kamami, eŋane magaene okange paki, Kaisaleŋo detki menaŋgi, eŋe solaene piwitne mi kita kitatneŋo siluŋ detongi, eŋe ŋei koboboine okangei.

¹² Eŋe yaleka ŋeiwa solaene piwitne kita kitatne, eŋane magaene weneŋ okanmaike, onoka wane eŋe solaene piwitne kita kitatne eya wane mida, ŋo yemo iwa yale wane, eŋe gege wekuka mali malip korop gekei, ŋenane magaze Abrahamŋo alakan gege geki, ŋado eya mo yale solaine piwitne kitatkoi.

Kaisale Wane Don Yemo Mali Malip Wane Ra More Wele Maratkaikene

¹³ Kaisaleŋo Abraham eŋine so doko ŋosakoune mali malip weneŋ qeli so kepe suwaine eya eŋane leleyakane biŋek qe more edange warekaikei. Don iwa edange, yemo onoka wane Abrahamŋo ra rokop don tewekkane mida, eŋe detlukaki, eya wane raki paki, Kaisaleŋo detkaki, ŋei koboboine okange.

¹⁴ Kaisaleŋo ra rokop don tewek okanmami, eŋe biŋek qe eboniyakane don edangirap, yemo ŋei eŋane mali malipŋo wele midaine okangirap, pakimo Kaisale wane don sap saune okangirap.

¹⁵ Ra rokop donŋo Kaisale wane sot osi osi tebakaki sariyake, ŋo ra rokop don mane yewa mi payakeo, yemo ra rokop don dere ŋade ŋadek, eya mi payake.

¹⁶ Biŋek qe more don eda edan, eya yemo mali malipŋo pekeine motke, eya wane biŋek qeqe don, eya yemo Kaisale wane bakom lewine midaine Abraham wane doko ŋosakoune korop eŋane biŋek okan waremaike. Ra rokop donka dere tewekmami, ŋei yewa eŋaneka mida, ŋo yemo ŋeiwa diyawa edo Abrahamŋo okange, yale detluk kamami, eŋane weneŋ okanmaike. Abraham yemo eŋe mali malip korop ŋenane magaze okanmaike.

¹⁷ Eya wane Kaisale wane ekapko iwa yale ramaike, “Na kepe baŋem ŋei loutne eŋane magaene geukole.” Eso eya wane biŋek qeqe don, eya yemo Kaisale wane kaitko maine okanmaike, Abrahamŋo eŋe detlukkake, Kaisale oŋo ŋei seuseune eŋe gege ma wakone ebon okanmaike, so eŋane donŋo raki, kine kine mi wakongoi, yewa wakon wareyake.

¹⁸ Abraham eŋe dere qekaki paki, siluŋ eya detlukkake, so eya wane dereret geke, eso eŋe yale okangi paki, “Kepe baŋem ŋei korop eŋane magaene okange.” Kaisale wane ekapŋo don iwa yale ramaike, eya wane rokopko, “Geŋane doko ŋosakopŋone eŋe baŋ iwa serekin magu yale loutne manerop okangei.”

¹⁹ Eŋe komaine mo wan handret (100) maratka yakane okange, ŋo siluŋ eŋine mali malipineŋo mi pelekke, naso eŋe solaine zokongi, solainane wetkekeo, me Saraŋo medep mi ebuke, yewao.

²⁰ Eŋine mali malipineŋo mi qeliŋkake, so eŋe Kaisale wane biŋek qeqe don olatke, eya wane wet etkeka mi okange, eŋine mali malipineŋo zonom qewatkake, pakiso eŋe Kaisale mawakake.

²¹ Eŋe Kaisaleŋo biŋek qe more don olatke, eya maine baŋ okaniyake, eya mo detlukkake.

²² Abraham eŋe yale okangane, mali malipinane raki paki, “Kaisaleŋo detkaki, eŋe ŋei koboboine okange.”

²³ Donba “Eŋe detkaki, ŋei koboboine okange,” eya yemo eŋaneka bonep mi qekoi.

²⁴ Eŋe ŋenane yaleka weneŋ qekoi, ŋene eŋe Yesu Waomze seuseuwo ŋine ma wirikkaki wiyeke, eŋe detluk kakeneo, eŋe detŋongi, ŋene ŋei koboboine okangene.

²⁵ Eŋe seukeyakane sunka ebonge, onoka wane ŋenane borikinane ra more, so eŋe ma wirikkaki wiye more biraŋongi, Kaisalerop ŋei koboboine gekenane, yale okange.