Roma 2 - Ono

Kaisale Wane Wanok Wanok Yemo Koboboine

¹ Kimane, ge ŋei ŋerep natne eŋane solaeno qenom paki, eŋe mo sot korop ra, wanok wanok urata eya mo mamaine baŋ yale ma okanmaŋkene me? Ge mane maŋo geŋone sotŋone maine mi motkekene. Ge ŋei natne eŋane kineene ra wakonnom paki, eŋe okanmami, ge masi yewaka siluŋ okane more, ge goŋomka kineŋone ma wakonmaine.

² Ŋene detmaine, Kaisaleŋo ŋei masi tanik yaline ma okanmami, eŋano wanok wanok urata koboine ma okanmaike.

³ Ŋo ge naŋane kimane, ge masi tanik mide, iwa goŋomka okan warenom paki, ŋei natne eŋeka kineene ma wakoniyake, yale mane misuk raikene! Ge wetke ramaine, ge baŋ Kaisale wane kine ma wakon ma wakon eya baŋ kakak kaikene me?

⁴ Me ge eŋane wet pesek, peyam maine, zok kakapa suwaine okangangi paki, loloŋgane geki, ge dere qewoloŋ okane gemaine. Welekatne ge mo detmaine Kaisale eŋe wet pesek okanganmaike, yemo onoka wane mida eŋe goŋo wetŋone maingekenane raki paki, iwengane gemaike.

⁵ Ŋo siluŋ ge wetŋone togogole mi zinge zingine ma gemaine, eso yalinane ge goŋomka turuŋine marat kaikenane dubuke wa magenom, kakapa suwaine okangi, naso suwaine yewao Kaisale wane sot osi osi, so kine ma wakon ma wakon koboine baŋ wakongi gaeyake.

⁶ Kaisale eŋe baŋ ŋei ŋerep korop gege mageene okane ma gekoi, eya wane rokopko turuŋine eboniyake.

⁷ Ŋei natne eŋe urata maine tako rakot mauluke mamami paki, qeli ewe zonom so bakom mawa mawa, so gege maep marat kaikei wane zuwaŋmami, eŋe yemo baŋ Kaisaleŋo gege togon eboniyake.

⁸ Ŋei natne enŋenaneka wetke ge okanmami, so don wele eya ŋadekkau paki, masi tanik borikine eya mogare gemami, eŋane kuteno yemo baŋ Kaisale wane sot osi osi so busuŋo qakki wayake.

⁹ Pakimo borikine ma okanmami, ŋei yewa korop eŋano yemo baŋ umat so wikile wakon oniyake. Lewine Yuda ŋei so Grik ŋei yalewaka.

¹⁰ Ŋo siluŋ Kaisale eŋe baŋ qeli ewe zonom, bakom mawa mawa, so peyam, yemo ŋei korop urata maine mauluke makoi, yewa eboniyake, lewine Yuda ŋei ebone mo, Grik ŋei yaleka eboniyake.

¹¹ Kaisale eŋe ŋei ŋerep gege mageenane rokopko turuŋine eboniyake.

Ra Rokop Don Eya Mo Kotozo Pake

¹² Qelaŋ ŋei Mose wane ra rokop don mi ma gemami, eŋe borikine mau paki, ra rokop don midaine siukwarekei. Yuda ŋei eŋe ra rokop don ma gemami, eŋe borikine mau, ra rokop donŋo kineene ma wakongi, turuŋine eboniyake.

¹³ Ra rokop don ketŋoka dere qewoloŋ okanmami, ŋei yaline eŋe Kaisalerop ŋei koboine mi gekei, ra rokop donŋo ramaike, yewa keteneŋo dere teweke ma okanmami, ŋei yaline edoka Kaisalerop ŋei koboine gekei.

¹⁴ Qelaŋ ŋei eŋe ra rokop don mi ma gemami, ŋo siluŋ eŋe enŋene wetenane ra rokop donŋo raki, dere teweke okanmami wane rokop okangei, yemo eŋe edomka ra rokop don okangei. Eŋe rara togon mi ma gemami, ŋo siluŋ yale okanmami.

¹⁵ Eŋane okane mama eneŋo sikan ŋonmaike, yemo ra rokop donŋo edangi teweke oka okan, yemo mo Kaisaleŋo kotoeno geke, wane enŋene weteneŋo yaleka kine sikan ŋonmaike, iwa yemo welekatne, enŋene weteneŋo naso natno wet qelot okanon okanmaike, so naso natno ra kitaton okan okanmaike.

¹⁶ Eso yalinane, na kisi maep Don Maine ra okanmaile, eya wane rokopko baŋ naso qoeki, yewao wakoniyake, yemo Kaisale eŋe baŋ Yesu Kristo talekaki, ŋei wetŋo kine kine sanka wetke ma gemami, eŋane kineene ma wakon wareyake.

Mose Wane Ra Rokop Donŋo Yuda Ŋei Ŋerep Qesiŋoniyake Me Mida

¹⁷ Ge daleo? Ge goŋomka eŋetŋone Yuda ŋei aranagu maine, ge ra rokop dongo makatake okoranom paki, na Kaisale wane kine detlukmaile ra, sola mawa mawa okan okanmaine.

¹⁸ Ge kine kine onokaka makenane, Kaisaleŋo wetke ginmaike, eya ge mo detmaine, so ge ra rokop don mo detkonane, masi koboboine eya wane ganmaike.

¹⁹ Paki ge iwa yale detmaine, ge de pilik maine numa alakane ebonikene, so panaman koto gemami, eŋane kiwa okane qelaŋan okanikene.

²⁰ So ŋei wet qelaŋine, eŋe maine edane makoboe okan onikene, so medep nigatne wet gemami, eŋane kito ebon ebon okanikene, ge mo detlukmaine, ge ra rokop don korop eya wane dereret so don wele eya wat watko pa ginmaike.

²¹ Ge ŋei natne kito edan okanmaine, ŋo geŋone mo onoka wane mi kito alat nagu okanmaine? Ge ŋei edane ra okanmaine, “Kobu misuk makei,” ŋo ge goŋom siluŋ kobu ma okanmaine.

²² Ge ra okanmaine, “Ŋao ŋanom ŋire zokit misuk kitasikeik,” ŋo goŋom siluŋ zokit kitat okanmaine? Ge lopio ŋadek kamaine, ŋo ge siluŋ lopio urumgo ŋine kine kine kobu ma okan maine?

²³ Ge na Kaisale wane ra rokop don magemaile ranom paki, mawa nagu okan maine, ŋo ge siluŋ eŋane ra rokop don qe barakenom paki, Kaisale wane kutno gamu mot okanmaine me?

²⁴ Eya wane Kaisale wane ekapko iwa yale ramaike, “Onoka wane Yuda ŋei ŋinane ra more qelaŋ ŋei eŋe Kaisale wane eŋetine qotkoine ora okanmami.”

Asu Wane Kibi Ŋei Kotoo Paki Wele Rakene

²⁵ Ge ra rokop don tewekkeneo, yemo solaŋone kita kitatne yewaŋo welerop okaniyake, ŋo ge ra rokop don yewa dere ŋadekkeneo, yemo sola ŋono kibi kitatkone, yewa wele midaine okaniyake.

²⁶ Ŋo ŋei qelaŋ mane eŋe solaine kibi mi kitatke, ŋo siluŋ ra rokop donŋo ramaike, yewa tewekeyakeo, eŋe Kaisaleŋo baŋ solaino kibi kitatke yale orayake?

²⁷ Eso yalinane Yuda ŋei ŋine baŋ qelaŋ ŋei edo kineŋine tilekkei, onoka wane ŋine ra rokop don yewa qe barakkoi, ŋine ra rokop don qekoi yewarop gemami, so solaŋino kibi mo kitatkoi, ŋo eŋe yemo solaene kibi mi kitatkoi, eya wane.

²⁸ Maŋo Yuda ŋei welekatne okanmaike, welekatne solaino kibi mo kitatkeŋo me? Solaŋoka Yuda ŋei gemaike, eŋane solaino kibi mo kitatke oŋo Yuda ŋei wele mi okanmaike.

²⁹ Wetŋo Yuda ŋei gege, eyaŋo Yuda ŋei wele okanmaike, eyamo eŋane kotino kibi mo kitatke, eya yemo Kaisale wane Asu Koboboinane urata, eya ra rokop don kibiwo qeqine, eya wane urata Midakaka! Ŋei iwa eŋe Kaisaleŋo mawakayake eŋe ŋei edo mi mawakaikei.