Roma 16 - Ono

Paulo Eŋe Roma Matko Kima Kima Gekoi Eŋane Oi Bakomene Okange

¹ Na kiyaroze Pebe, eŋe Senkriya doku tau tau magu mapikone gemaike, eŋane ŋidanmaile.

² Eŋe u lotkeki, ŋine Waom wane ra more Kaisale wane ŋei ŋerep gemami, eya wane eŋe ma more ma suwatkaikei, so eŋe kine kine mane wane zonom ziyage ŋaŋaeki, ŋine zonom natne maine qesiŋkaikei. Onoka wane yemo ŋerep eya eŋe ŋei ŋerep loutne kima maine qesiŋon okange, so na yaleka weneŋ okannange.

³ Na oi bakom okanbe paki don motpe Prisila so Akwila, urata ŋei kimatkene, Kristo Yesu wane urata mapiknan okanmamik, erano arimaike eya etanbi.

⁴ Ere naŋane ra more gege etne qaisik kakoik, eya wane na erane wet menaŋ detore gemaile, so noŋoka weku Midakaka, qelago ŋine doku tau tau magu korop eŋe weneŋ erane wet menaŋ detotmami.

⁵ Oi bakomne eya yaleka doku tau tau magu, erane matko lewaŋ okanmami, eŋano weneŋ motpe arimaike, eya weneŋ edangei. Oi bakomne motpe kima maepne Epainetus eŋano arimaike, ŋei weku eŋe Asiya provins eya ŋine, oŋo lewine Kristo detlukkake.

⁶ Oi bakomne motpe Mariya wano arimaike, eŋe ŋinane urata togole zok make.

⁷ Andronikus so Yuniyas erano oi bakomne motpe arimaike, Yuda ŋei kimatkene, ere mulap urumgo narop weneŋ metkoik, ere aposolo eŋane keuweno eŋetetne pamaike, so eto alakane Kristo wane kisi maep don detkoik, na erane ŋadeetno detkole.

⁸ Naŋane oi bakomne motpe Ampliyatus wano arimaike, naŋane kimamaepne, Waom wano tako rakotse pamaike.

⁹ Oi bakomne motpe Urbanus wane arimaike, ŋenane urata ŋei kimaze, Kristo wane uratao mapiknagukone, so Stakis, kima maepne, eŋano weneŋ motmaile

¹⁰ Apeles wano oi bakomne weneŋ motmaile, eŋe Kristo wane ŋei wele eya wane welaine mo wakonge. Oi bakom ne motpe Aristobulus wane rem qiyekoune eŋano arimaike.

¹¹ Herodion wano oi bakomne motpe arimaike, eŋe Yuda ŋei kimane, so kisi maep dereret kimakopne Narsisos wane rem qiyekoune eŋane weneŋ motmaile.

¹² Naŋane oi bakomne motpe Tripina so Triposa erano arimaike, ere Waom wane urata togole mamamik, so kima maepne Persis, eŋe Waom wane urata zok manerop make, eŋano weneŋ motmaile.

¹³ Na oi bakomne motpe Rupus wano arimaike, eŋe ŋei maine, Waom wane urata mauluke maki paki, eya mogare ge okanmaike. So eŋane nagaine, eŋe na eŋine gipole yale bororom okannange.

¹⁴ Na oi bakomne motpe Asinkritus, Plegon, Hermes Patrobas, Hermas, so doku tau tau magu natne korop kimakopene eŋerop gemami eŋano arimaike.

¹⁵ Pilologus, so Yuliya, Nereus so kiyarine, Olimpas so Kaisale wane ŋei ŋerep magu eŋerop weneŋ korop gemami, ŋinane oi bakomne motpe sarimaike.

¹⁶ Kima gege wane oi bakom eyaŋo lulu zam zam okan nagukei. Kristo wane doku tau tau magu korop gemami edo oi bakomene korop ŋinano motpi sari waremaike.

Urata Ŋei Isisine Eŋane Girem Rake

¹⁷ Kimakopne, na qebin ŋunmaile, ŋine ŋei natne ŋinano qepok mapok don okanbi, ŋinano pori porip wakoniyake, so ŋei natne mali malipene ma qororoŋgei, ŋei yewa eŋane diyam seleleine maikei, eŋe kisi maep don kito ŋibongoi, yewa ŋabakau paki, wetŋine mau siukeyakane, eŋe kakakone kaet arikei.

¹⁸ Ŋei natne masi tanik yaline ma okanmami, eŋe Kristo ŋenane Waomze eŋane qelitine mi qe okanmami, eŋe enŋene solaenane simile eya mogat okanmami. Eŋe donene kelo kelok simile teine raulukeu paki, kelok more, ŋei maine isione eŋane dereretene ma siuk okanmami.

¹⁹ Kisi Maep don dere tewek maine okanmami, eya wane kisiine eya matko matko ariki, ŋei ŋerep koropŋo detwarekoi, eya wane na ŋinane wet pesek zok detmaile. Na ŋido dereret korop okane more, kine kine maine eya wane qomŋine ewekeyake, ŋo kine kine borikine eya wanemo qomŋine umareyake, eya misuk desikei.

²⁰ Paki Kaisale ŋenane peyamzane welaine, oŋo mi azoŋgi Ŋei Borikine baŋ ŋinane kiyeŋinane bango la pelekki kesiyake. Waomze Yesu Kristo wane mosopŋo ŋinano payake.

²¹ Timoti, naŋane urata ŋei kimane, eŋe oi bakomine ŋinano motki sarimaike, so Lusius, Yason, so Sosipater, Yuda ŋei kimakopne, eŋe yaleka oi bakomene ŋinano motpi sarimaike.

²² Na Tertius, kibi iwa Paulo wane aŋao ŋine detpe paki, qemaileŋo doku tau tau magu oi bakom okanŋune more ŋibonmaile.

²³ Naŋane ware ware Gaius, eŋane matko doku tau tau magu eŋe lewaŋ okanmami, eŋe oi bakom okan ŋune more motki sarimaike. Erastus, mat suwainane wesi mato matok, so ŋenane kimaze Kuwartus, ere oi bakometne more ŋebonmamik.

²⁴ Waomze Yesu Kristo wane mosopŋo korop ŋinano pawareyake. Weleka.

Kaisale Meŋenka More Mawakaikene

²⁵ Ŋene Kaisale eŋetine ora mawakaŋem! Eŋe qesiŋŋune more ma togoleŋungi mali malipŋino gesoke togole okoramami, kisi maep don maine ŋidangole, eya wane kopko, don kisi yemo Yesu Kristo wane, so eya yemo don sane wele, eya mokaka kine motkeki, naso kiroroine pa sarike,

²⁶ wane ukude yemo don sane wele, yewa mo propet edo qe more didiwo ma qelaŋane motkoi pamaike, paki gege togon Kaisale donine rake, eya wane rokopko raŋem suwa ariki, kepe baŋem ŋei ŋerep magune magune ge arimami, eŋe korop detwarekoi, eya wane eŋe korop maine detluk kaikei, so tewekkei.

²⁷ Kaisale eŋe weku, eŋe eŋineka dereret korop. Eŋano Yesu Kristo wane ra more bakom kito mawakaikene, naso baŋem naso baŋem! Weleka.