Roma 12 - Ono

Ŋine Wet Solaŋine Gege Wane Ra More Seukeyakane Detŋem Paki Kaisale Wane Sunka Manikene

¹ Eya wane kimakopne, ŋene detŋem Kaisale wane qom pesek kakapa suwaine manerop ŋenano pamaikane, na wet qelot don iwa yale ŋine ŋidanbe detpi, ŋine wet so solaŋinane gege eya wane bakom ra more seukeyakane detpi paki solaŋinane gege eya Kaisale qik-ka more sunka manbi, eŋane qelit qeki kaki menageyake eya yemo bakom kito kito so meŋe meŋen mali malip eya wane weleŋine maine okan-kakei.

² Gege mageŋineŋo kepe iwao ŋei kisi maep midaine gemami, eŋane tanik misuk gekei. Siluŋ Kaisale detkau, oŋo kotoŋino don saŋep okanŋungi, wet dereretŋine mainge lukkei. Pakimo ŋine maine ewekeu paki, Kaisale wane masi eya detkakei, eyaŋo masi maine, so masi eya Kaisale eŋe siminka okanmaike, so masi eyaŋo eŋe koboboine.

³ So onoka wane mida, Kaisale wane bakom lewine midaine na ninge, eya wane na ŋine korop ŋidanbe, ŋine ŋinŋinane detpi, misuk wawaine okaniyake. Eya wane turuŋine yemo wetŋine makesikei, paki wet bonep bonep Kaisaleŋo mali malip darap ŋibonge, eya wane kopko kineŋine ma wesake det nagukei.

⁴ Ŋene kebaŋze weku yewao piwitne piwitne koune yemo loutne. Piwitne loutne iwa eŋe urata kine mane kine mane ma okanmami.

⁵ Yalewaka, ŋene ŋei ŋerep loutne, kebaŋze yemo Kristo wano qeturaŋŋem weku lelemaike. So ŋene korop mane ŋo mane qeturaŋ wareŋem piwitne piwitne eyaŋo kebaŋ weku yale okanmaike.

⁶ Kaisale eŋe ŋenane wetine suwaine pake, eya wane eŋe dereret kine kine ŋebonge, eyaŋo eŋine bakom okanmaike. Eya wane ŋene Kaisale wane don kisi raikenane, bakomine okanŋongeo, yemo ŋene mali malipze magemaine, eya wane rokopko raikene.

⁷ Qelit qeqe wane zonom pa ŋebonmaikeo, ŋene qelit qekene. Kito eda edan wane zonom pa ŋebon maikeo, ŋene kito edanikene.

⁸ Ŋei ŋerep natne edane ma togole onikenane zonom pa ŋebonmaikeo, ŋene yale okan onikene. Mane eŋe ŋei natne kito qesiŋ okan oniyakane wetke mage maikeo, yemo yobonka paki qesiŋ oniyake. Mane eŋe ŋetne geyakane ra mangoiwo, yemo eŋe urata togogole mayake. Mane eŋe mauluk mauluk urata mayakeŋo, yemo eŋe wet peseko mayake.

Mauluk Mauluk Wane Don

⁹ Kima mauluk onbe rau paki, solaŋoka misuk wet maep okan-nagukei, ŋine wetŋo so qomŋine deineŋo ma qot-nagu more korop mauluk-ongei. Masi tanik borikine eya ŋadek-kaikei, tanik manik maine eya yemo malilipka gekei.

¹⁰ Ŋine wet maep okan nagu more, Kristo wano kima kima okanikei, paki ewe kito kito okan nagukei wane sori soringo okanikei.

¹¹ Urata togogole maikei, paki bau wawa misuk okanikei. Wet solaŋine koropŋo Waom qelitine qekei.

¹² Tomaka gege eyaŋo wareŋungi, wet peseko gekei, paki wikile qom boriko geu paki, meŋe meŋen urata naso baŋem ma arikei.

¹³ Kimakop ŋine aboŋ midaine gemami eŋe ŋinano ŋine aboŋ natne ebonikei, so ŋei lobo sariu, ŋine matŋine lalage ebonikei.

¹⁴ Kaisale olatpi ŋingu kito okanikei, ŋei yewa mosop oniyake, so, olatpi mosop-oniyake, misuk sowak-oniyake.

¹⁵ Wet pese okanbi, ŋine qesiŋ one eŋerop wet pesek okanikei, arokeu, ŋine ŋei yewa qesiŋ-one eŋerop arokkei.

¹⁶ Ŋinŋinane ŋunmaike, kop yalewaka ŋei kimakop ŋine eŋane ŋuniyake. Ŋinŋinane detpi misuk wawaine okaniyake, ketkele eŋerop kima okane more, urata maikei.

¹⁷ Ŋei mane eŋe masi borikine okanŋungi, ŋine turuŋine masi borikineka misuk okan kaikei. Ŋei edo detpi masi maine okaniyake, eyaka eŋane kaitko okangei.

¹⁸ Yeye kine kine korop oka okan wane kop okanmaike, eyaka okane more, ŋei korop eŋerop kima okane peyamgo gekei.

¹⁹ Kimakopne, ŋine masi borikine okan ŋunbi, ŋidomka turuŋine misuk mapokkei. Eya okangei wane turuŋine yemo qeligeu, Kaisale wane busuineŋo eya makokeyake, eya wane Kaisale wane ekapko iwa yale ramaike, “Sot mako makok yemo noŋo makokkale, noŋo baŋ turuŋine mainge ebonikale, Waomŋo ramaike.”

²⁰ Eya wane turuŋine yemo Kaisale wane ekapko iwa yale ramaike, “Geŋane ŋabaŋone eŋe ŋara wane seukki, ŋara gumekaikene, doku wane qomine sererekki, doku mannom neyake, yale okane more, baŋ ŋaba eya gamu suwaine mayake.”

²¹ Borikineŋo detkanom ge misuk yuwan ganiyake, eya wane turuŋine yemo masi maine so koboboine eyaŋo borikine yuwankaikene.