Pilipi 3 - Ono

Koboboine Eya Wele

¹ Kimakopne, don qoi qoine iwa yale rawe qoekep, Waomŋo ŋine wet menaŋ manerop ŋibongi, wet pesek desikei. Don alakan qe ŋibongole, eyaka eseŋake koso qe ŋibonikalane mi detpe qekamaike, eso eyaŋo ŋine maine kito qesiŋ okan ŋuniyake.

² So ŋine diyam seleleine maikei, ŋei borikine eŋe kasi zubaine yale, eŋe kisi maep urata matali matali ŋei, eŋe ŋenane ramami, ŋene korop solaze kitare more, Israel eŋane rokop okani-kenane.

³ Eya welekatne ŋene mo sola kita kitat mane makone, eyamo Kristo Yesu mali malipko sola kita kitat wele, yewa makone, onoka wane ŋene mo Kaisale eŋine Asuineŋo oi bakom kito meŋenka okanmaine, so gegezeŋo Kristo Yesu wano makatak okanmaine. Ŋene mali malipze solao mi motŋem pa okanmaike. Yewa ŋedo Kristo wano takotke more sola kita kitat wele eŋetne malipka malipka eya magemaine.

⁴ Na kine kine yaline eya malip kawe ra, yemo maine okanbe rap, ŋo ŋei natne eŋe solao-ken maine malip-kakei wane wetkekei wo, yemo noŋo eyamo kinerop eya wane solao-ken numa yale oken manerop wetkekale.

⁵ Na solane kitatkoi, yemo wakone pawe, sodane weku so kaiwe karewe okangiso, kitatkoi, na Israel ŋei eŋano ŋine wakongole, paki, na rara togon wane numa eya mo modat lukkole, na Benyamin wane tego ŋine, na Hibru ŋei eŋane weŋem tutule, so naga magane ere yaleka. Na Yuda rara togon numa, eya wareka-kolane na Parisi eŋane tego gekole.

⁶ So na sorin borin okane, Waom wane urata makalane detkole, eya wane na doku tau tau magu ŋabaone more matali qetali ebukole. Ŋei maneŋo na rara togon don wane numa mogatkole, eya wanoke desiyakeo, yemo na sot midaine, yalewa ŋei mane eŋe rara togon don wane numa eya dere wanok okane mogasiyakeŋo, eŋe ŋei wele.

⁷ Namo rele, na sola wane numa eya mogat kakole, yemo na ŋei natne maine yuwan onikale, ŋo siluŋ yeye kine kine eya koropna maine dapotpe wele okange, wane iwa yemo Kristo wane rawe paki detpe, wele midaine okanmaike.

⁸ Yeye kine kine eya waneka mida, na Kristo Yesu wane detpe Waomne okanmaike, eŋane rawe paki, yeye kine kine korop kepe wane aboŋ eya qeliŋ warekole, na eya yemo korop detpe sino qotkoine okanwareke, wane Kristoŋoka weku maine malilipka gekale.

⁹ So eŋerop weneŋ qeturage gemaile, na noŋomka rara togon don numa teweke more, koboboine gege eya wane mi nanmaike. Na iwa yemo Kristo detlukka more mali malip wane ra more ŋei koboboine gege eya wane nanmaike, koboboine sot midaine gege, eya yemo Kaisale wano ŋine sari okanmaike, so eya yemo mali malip wane kutno kito pa okanmaike.

¹⁰ Na Kristo weku detluk kakalane nanmaike, so eŋine seuseuwo ŋine wiye wiyeinane zonomine naŋano wakongi, eŋe wikile detke, eya na weneŋ desikale, so eŋe yale okane seuseuino takotke more seukkale. Na eŋane wikileo takotkemaile, yemo na Yesu Kristo detlukka more malip kamaile eya wane.

¹¹ Na yale okane tebaka ari magewe, seuseuino ŋine baŋ ma wirik nangi, wisikaekale.

Ŋene Kiyek Kiyekino Ŋine Biririke Ari Dagoino Lotkekene

¹² Na mo biririk mage dagop qoi qoino lotke mo yuwangole, me mo menaŋgole, na yale mi ramaile, na tako rakot ka biririke ari maile, yuwane more gege togon lewine maikalane, ŋo eya wane ra more, Kristo Yesuŋo yemo mo neu malip nange.

¹³ Kimakopne, welekatne, na dagop qoi qoine eya mo yuwangole yale mi wetkemaile, kine kine weku na okanmaile, eya yemo kine kine ŋadeno pamaike, gege soginane aboŋ eya yemo ŋadek kamaile, eso qomnoken gege musele pamaike, eya marat kakalane, yemo kauluke biririkmaile.

¹⁴ Eso na dagop qoi qoino pokup okoramaike, yewaokenka koboine togogoleka biririke arimaile, yemo yuwane more lewine makalane, eya yemo Kaisaleŋo Kristo Yesu wane raki paki gege biŋek qeki pamaike, eya wa marat kakalane raki paki nora tebanange.

¹⁵ Ŋene korop suwa warekone, ŋo dereretze eya motŋem, ŋei dereret yale bile so weku maneka payake, kine kine weku eya waneka ka mogare gekene, ŋo natne ŋine wet mane ŋei isisine eŋane isisiwo ari more wetkekeiwo, yemo Kaisaleŋo baŋ wetŋine ma qelaŋangi detlukkei.

¹⁶ Ŋo numa so tanik manik weku gesoke sarikone, so makone, iwa gemaine, numa weku eyaka mogare gesoke arikene.

Ŋene Qeli Mat Eya Wane Weleine

¹⁷ Kimakopne, ŋine korop naŋane numa so tanik manik eya takotke mogare arikei, ŋene numa so tanik manik wele eya sikan ŋungone, wane ŋei natne eŋe numa eya mogare mo gemami, eya one more eŋe mogatone arikei.

¹⁸ Na don iwa yemo atak loutne mo alakanka ŋidangole, so iwa yewaka eseŋake koso ŋidanbe, dene dokune weneŋ ketmaike, ŋei loutneŋo Kristo eŋe kibego seukke so wisikae wiyeke, eya wane ŋabaine okanmami.

¹⁹ Ŋei yewa eŋe arimage, gege-ene sora gerepko ezoki qoeyake, onoka wane, eŋe solaenane simileŋo Kaisale-ene okanmaike, eŋe kine kine gamui-nerop eya wane batne zok okanmami, so eŋe wet dereretene yemo motpi, iwa kepe wane aboŋ, eya waneka zok manerop pamaike.

²⁰ Ŋene, yemo qeli mat wane biŋek so weleine, so ŋei ŋerep maguko-une, eso eya wane ŋene Mapi Mapikze Waom Yesu Kristo qeliwo ŋine sariyakane batneka toma kamaine.

²¹ Eso eŋe baŋ eŋine zonomŋo maingeki, solaze pelekakatne iwa umat kine kine ariyake paki, ebuki eŋine solaine qelaŋan wagi waginerop yale okangei, pakimo zonom yewaŋoka qesiŋ-kaki, yeye kine kine korop kepe so qeli kotino maki eŋine bango sari wareu oŋom baŋ tako rakot naso baŋem wareoni-yakane.