Pilipi 1 - Ono

Paulo Eŋe Pilipi Edo Eŋerop Okoralukkoi Wane Bakom Kitolukke

¹ Paulo so Timoti, Yesu Kristo wane qelit ŋeitkine. Ŋeto Kaisale wane ŋei ŋerep Pilipi matko Kristo Yesurop weneŋ qeturage magu weku gemami, so doku tau tau magu ŋetneekopene so qesi qesiŋkopene ŋinane kibi iwa qe ŋibonmaite.

² Kaisale Magaze so Waom Yesu Kristoŋo wet menaŋ so peyam ŋine ŋiboniyake.

³ Na naso baŋem ŋinane ra wetkewe paki, Kaisalene bakomine kito okanmaile.

⁴ So naso baŋem na ŋine qesiŋŋuniyakane korop meŋenka okanmaile, yemo na wet pesekrop bakom kito meŋenka okanmaile.

⁵ Na ŋinane wetpesek zok detmaile, onoka wane, ŋine mikepka kaiwe weku eyao narop qesiŋnane more, don maine kisi maep urata, eya ma sari mageu mo ukude okanmaike.

⁶ Eso na eya wane iwa yale detlukmaile, Kaisale eŋe urata maine iwa ŋinano kiyeke, makeŋo takotke ma ari mageki, Kristo Yesu lotkeyake kaiwe naso eyao urata qoeyake.

⁷ Ŋine naso baŋem qomŋunbe naŋane kotono gemami! Eso eya waneka na ŋinane detpe menaŋgi, iwa yale wetke okanmaile. Ŋine koropŋo narop weneŋ urata wane mapit nanmami, eyamo Kaisaleŋo wet maepinane mosop ra ninge, eya makoi, mulap urumgo metmaile, naso iwao so yaup gekole, naso yewao na kisi maep don qesiŋ kakole so togoleka ra qelaŋanmaile.

⁸ Kaisaleŋo detki, na don welekatne ramaile. Na ramaile naŋane wetneŋo ŋinane zok manerop pamaike, yemo korop Kristo Yesu eŋine kotino ŋine sarimaike, paki na ŋunikalane zok nanmaike.

⁹ Na ŋinane meŋenka okanmaile, yemo iwa yale, ŋinane wet maepŋo takotke more manerop suwa leule okaniyake, so wet dereret wele so dere wesakmaine, eya weneŋ kotoŋino suwa payake.

¹⁰ Paki ŋine baŋ eweke more tanik manik kine kine mayakakatne eya kaulukke more makei. Mau paki, ŋine baŋ Kristo lotkeyake, Kaiwe Naso yewao korop koto ŋine libe libe qelaŋan gorop so sot midaine koboine okane gekei.

¹¹ Ŋinane gege ŋine yemo baŋ mainane wele mayakatne, eya yemo baŋ Yesu Kristo eŋe oŋom maine makoboe ma louleki moriyan suwaine wakongi, eya wane ŋei ŋerep eŋe kau, paki Kaisale qeli ewe zonominane manerop, baŋ bakom kito qem mawa okane mawakakei.

Yesu Wane Ra More Gekene

¹² Kimakopne, iwa yale desikei, masi tanik naŋane solano wakonge, eyaŋo welekatne peyam don leŋ kayakane mida, eyaŋo qesiŋka more don maine eya maki suwa ariyake, so togole pa wayakane.

¹³ Kine iwa yale, Sisa, Roma kepe eya wane ware ware suwainane urum kotino kawali ŋei eŋane ware ware, so ŋei natne korop iwa eŋe mo detmami, na iwa mulap urumgo metmaile, eyamo onoka wane mida, na Kristo Yesu wane qelit ŋei okangole, eya wane.

¹⁴ Eso na mulap urumgo metmaile, eyaŋo yemo kimakopze natne korop zonom manerop ebongi Waom malip-kamami, paki eŋe naso baŋem togole more kaet midaine Kaisale wane don eya ra qelaŋanmami.

¹⁵ Welekatne, ŋei natne naŋane ŋaba eŋe onbi, na eŋet suwaine ninmami, paki eŋe eya wane det worik okane more neu maket birananmami, so kine eya wane eŋe Kristo wane kisi maep don eya ramami, ŋo ŋei natne edo yemo wet dereretene bile so maine paki kisi maep don eya wet maepko ra okanmami.

¹⁶ Ŋei eya eŋe mo detmami, na iwa mulap urumgo metmaile, yemo don maine iwa ma togolekalane Kaisaleŋo urata ra ninge, eya wane eŋe wet maep okan nanbi paki, peyam me wet maep don eya ra wakonmami.

¹⁷ Ŋei natne eŋe yemo Kristo mi detlukka more, eŋe enŋene eŋet biŋek mawa maŋkei, so eŋe takotke more, Yesu wane don weneŋ ra okanmami, eŋe dereretene koboboine maine paki mi ra okanmami, mida, eŋe masi eyamo naŋane ra more koso umatne takotke mulap urumgo metkalane ra ninmami.

Paulo Eŋe Gege Wane So Seuseu Wane Weneŋ Okankake

¹⁸ Eyaŋo mi borimaike! Na wet pesek detmaile, yemo masi kine kine loutne, masi qotkoino ŋine me masi maine ŋine eŋe Kristo wane don yaleka weneŋ ra wakon okanmami, eso na eya wane takotke baŋ wet pesek manerop desikale.

¹⁹ Na koso wet pesek detkale, onoka wane mida, na mo detmaile ŋinane meŋe meŋen so Waomŋo qesiŋ naniyakane qesi qesiŋ Asu Koboboine Yesu Kristo wano ŋine meŋenkau birakaki sarimaike, eyaŋo qesiŋnangi na baŋ qeka maka midaine ululuŋ gekale.

²⁰ Na detluk kamaile, so wetneŋo teba kamaile, yemo na uratane makalane mane mi pelekkale, me gamu mane mi makale. Siluŋ naso baŋem so naso iwao naŋano baŋ togole togoleŋo watke payake. Paki na solane so kotone weneŋ korop teba-kawe, Kristo wane bakom mawa mawa baŋ, na wisika gekaleo me seukkaleo, naso yewao wakoniyake.

²¹ Gege eyamo onokaka? Kristoŋo gegene okanmaike, ŋo seukkale eyaŋo yemo kine kine lewine suwaine manerop gege togon waraŋ-kaki sari niniyake.

²² Ŋo na wisika kepeo gekaleo, yemo ŋei eŋano qesiŋone urata mawe weleloutne wakonmaike, ŋo siluŋ na numa daleo okanikale, yemo mi detmaile.

²³ Na nat so nat eretnarek malip nanmamik, na gege iwa qeli gewe paki, Kristorop gekalane zok manerop nanmaike, eyaŋo yemo manerop kine kine weku mane okanmaike.

²⁴ Ŋo siluŋ na ŋinane ra more wisika gemaile, yewaŋo yemo zok manerop wele, okanmaike.

²⁵ Na uratane ŋine qesiŋ-ŋuni-kalane ŋinano pamaike, eya yemo mo dere malipka lukmaile, yale. Wane namo detmaile, na baŋ ŋinerop ge more qesiŋ ŋunbe mali malipŋine togoleki, oi bakom kitokei.

²⁶ Eso na ŋinano koso manerop u gewe, ŋine naŋane batne manerop okanbi paki, gegeŋine Kristo Yesu wano motpi paki, bakomine kito ma waka okankakei.

Lipaŋ Nagu Qeturage Okorau Paki Wetŋo Kawali Qekei

²⁷ Iwa yemo kine kine wele, eya wane ŋine gege ŋine koboine, Kristo wane kisi maep don maine eya mogare, eyaŋo ramaike, eya wane rokopko geulukkei, paki na ŋinano eweke more sari ŋunikale, me mi sari ŋunikaleo, yemo na don kisi ŋineka baŋ detpe, ŋine togogole more wet weku motpi paki okorakei, so kawali orodoŋ dereret weku motpi paki qekei, yale okanbi, ŋei ŋerep mali malipŋine kisi maep don mainane motpi payake

²⁸ Pakimo, na baŋ ŋinane iwa yale det ŋunikale, eŋe kimakopene edo okanonbi, baŋ kaet maine mi okanikei, ŋo ŋabakop ŋine eŋe ŋunbi, ŋido kaet midaine okanbi, kau paki eŋe iwa yale desikei, “Ŋene baŋ pelekkene!” Ŋo ŋine yemo Waom Kaisale oŋom qesiŋ ŋungi, eŋine zonomgo paŋ kito togole okarakei.

²⁹ So ŋine iwa yale detpi, Kaisaleŋo ŋine masi maine okan-ŋunge, yemo Kristo wane qelitine qe more, detlukka malipkakei waneka midakaka, ŋine eŋane eŋet biŋek wane ra more wikile weneŋ desikei wane rakok-ŋunge.

³⁰ Sogine ŋine nanbi, na kawali eya qekole, na kawali yewao gekole, so kawali weku eyaka na iwa qewe, ŋine mo detmami, so ŋine wikile eya detmami, yemo iwa yale, ŋine mo naŋano takotkeu, ŋine narop qeturage weku okane more, kawali weneŋ qekene.