Matayu 8 - Ono

Yesuŋo Ŋei Mane Kubetine Seleleine Maki Osike

¹ Yesu eŋe bonagao ŋine ketki, ŋei ŋerep magu suwaineŋo ŋadino arikoi.

² Ŋei mane kube rubet eŋe Yesu wano sari more, wawetine qe umi ketki paki rake, “Suwaine, ge naŋane simile ganmaikeo, yemo maine neunom menaŋgale.”

³ Yesuŋo metine bira, so solaino make, pakiso olatke. “Na simile nanmaike, ge kubetŋone mo iwa osikep!” Rakiso eŋe eyaka kubetine piradaŋgi libe qe osike.

⁴ Pakiso Yesuŋo olale rake. “Detnom! Ge ŋei mane misuk edangene, ge siluŋ pris wano koboine ari sikankanom, solaŋone ganiyake, pakiso Moseŋo rake, yale soe soep mitnom, ŋei ŋerep eŋe gane more, ge solaŋone mo osike, eya desikei.”

Yesuŋo Roma Ware Ware Mane Wane Qelit Medep Mane Ma Menaŋkake

⁵ Yesu eŋe Kaperneyam matko ari waketki, Roma kawali ŋei eŋane ware ware maneŋo maratkaki paki, mapik kayakane olale rake.

⁶ “Suwaine, naŋane qelit medepne, eŋe matko zomakaki pamaike, eŋe kiye metine seuseune okanmaike, wikile zok manerop detmaike.”

⁷ Rakiso, Yesuŋo olatke. “Na baŋ ariwe paki, mawe menageyake.”

⁸ Raki, kawali ŋei eŋane ware wareŋo mainge olale rake. “O, mida suwaine, na ŋei maine mida, eya wane ge naŋane matko misuk sarikene, ge yaup iwa mere donŋoka ranom menageyake.

⁹ Na yaleka, ŋei suwaine wawaine kiqa ŋuruŋ ŋuruŋ enerop, eŋet biŋek suwaine, eŋane bango ketkele gemaile, so na kawali ŋeikopne ebuwe, eŋe naŋane bango gemami. Wane, na eŋano ŋine mane wane rakale, ‘Ari!’ Rawe eŋe ariyake, so mane eriwa wane rakale, ‘Sari!’ Rawe eŋe sariyake. So na qelit medep wane rakale, ‘Iwa manom!’ Rawe eŋe eya mayake.”

¹⁰ Yesu eŋe don eya dere welepke more, ŋei ŋerep ŋadino arikoi eŋe edane rake, “Na rawe detlukeu, na mali malip iwa yaline Israel ŋinane keuwo ŋine mane wano mi ka okanmaile.

¹¹ Eya wane iwa detpi! Ŋei ŋerep loutneŋo kepe deine samaikeo ŋine, so ketmaikeo ŋine, baŋ sari more, ŋara nene zakeo qeli gege togon kotino pese ket, Abraham, Isak, so Yakop, eŋerop weneŋ mesikei.

¹² Ŋo ŋinano ŋine Yuda welaine ŋei ŋerep natne qeli gege togon kotino waket gekei wane Waom eŋe mo ma wakon-onge, ŋo eŋe baŋ ebu biraongi, panaman koto qeinat ket more, yewao baŋ aroke ŋet warik warik ki gekei.”

¹³ Pakiso, Yesuŋo ware ware olale rake, “Matko arinom, pakimo ge naŋane don detluke malip-kamaine, eya wane welewa eyamo wakon-ganiyake.” Pakiso nasomde eyaka ware ware wane qelit medep menaŋkake.

Yesuŋo Ŋei Ŋerep Loutne Ma Menaŋonge

¹⁴ Yesu eŋe Petero wane matko arike, eso eya kaki Petero sewenine eŋe zoma kaki papaino pake, zoma gereunerop qeke.

¹⁵ Eŋe ka more zoma eya don togole okanka ŋerep metino maki, so zomaŋo qeliŋka arike, paki mo ŋerep eŋe wiyeki paki so ŋara surok mire mauluke Yesu so dokoine ebongi nekoi.

¹⁶ Kepe qoeki, ŋei ŋerep eŋe ŋei ŋerep loutne asu qotkoineŋo kotoeno ket gekoi, eya ebu Yesu wano sarikoi. Yesu eŋe asu qotkoine eya donŋo ra esopongi saket warekoi paki, zoma-onge eya korop ma menaŋ-onwareke.

¹⁷ Eŋe yewa okange, yemo propet Isaiyaŋo don mane sogino iwa yale rake, eya wane weleine wakoniyakane eya make. Eŋe oŋomka ŋenane zomaze ŋebu mawareke, so zoma kine kineze korop raki aŋaine teweke bira-ŋone ariwarekoi.

Ŋei Ŋerep Eŋe Yesu Olale Ŋadino Mogatkaikei Wane Ramami

¹⁸ Yesu eŋe ŋei ŋerep loutneŋo sari lolikkau ongi paki, eri doku namuŋ nat arikei wane dokoine edange.

¹⁹ Pakiso, ra rokop don wane kito ebo ebon maneŋo Yesu wano sariki paki rake. “Kito ŋebo ŋebon, na mo ewekmaile, ge yewao me yewao arikene, na weneŋ gerop arikale.”

²⁰ Yesuŋo mainge olatke, “Kasi zubaine eŋe aŋapenerop kulu pamami, so naŋi eŋe matenerop, ŋo Ŋei Wawainane Gipole, eŋe yemo matine midaine, diyawao ket paki paki zonom mayake?”

²¹ Ŋei mane, eŋine dokoine eŋane keuweno ŋineŋo Yesu olale rake. “Suwaine, mikepka qeliŋnanom, na zinge ari magane seukke dukkawe paki, baŋ zinge ŋadeŋono koso sarikale.”

²² Yesuŋo mainge olatke. “Yeine ŋadeno sarinom, paki seuseune gege qeliŋonnom, eŋe edomka seuseune-kopeene dukongei.”

Yesuŋo Momo Suwaine Ma Pesekake

²³ Yesu eŋe seki kutno waki, so dokoine eŋe eŋerop weneŋ arikoi.

²⁴ Ariu yewaka momo suwaineŋo sari doku namuŋ eyao qe talekaki, dibom suwaine tepke wiye more qakki, seki somekake. Ŋo Yesu eŋe kulu pake.

²⁵ Dokoine eŋe eŋano ari ma wirikkau wiyeki olale rakoi. “Waom qesiŋ-ŋonnom, ŋene mo midakenane okanmaine!”

²⁶ Yesuŋo edane rake, “Ŋine mali malipŋine nigagatne! Onoka wane zok kaet-ŋunmaike?” Yale edangi paki wiye more, momo so dibom don etane rawot-otki, momo eyaka giriŋ doŋ mane ket kaloŋ suwaine, qe dumene pake.

²⁷ Ŋei eŋe eya kau paki welelepke more rakoi, “Yai, ŋei iwa eŋe ma? Yaline eya wane momo so dibom ere aŋaine tewekmamik!”

Yesuŋo Ŋei Etke Erane Asu Qotkoine Esoponge

²⁸ Yesu eŋe sari Gadara ŋei eŋane kepeo doku namuŋ nat paromine eya lotkeke, pakiso ŋei etke eto maratkakoik, ere ŋei dukon dukon kem pareŋ papaene eya ŋine saket sarikoik. Ŋei etke eya ere asu qotkoine loutneŋo koto etno ket gekoi, eya wane ere zok zubaine okanbik, ŋei ŋerep maneŋo numa eyaka mane mi ari okangoi, eŋe erane kaet okangoi.

²⁹ Ere esatka aroke rakoik. “Kaisale wane Gipole, ge ŋere daleo okan-ŋotkene? Ge naso koboine mi bomileki, ŋere wikile alakane ŋepon genane sarimaine me?”

³⁰ Berek magu mane eŋe abaran mida, osop ŋara ne gekoi.

³¹ Asu qotkoine eŋe Yesu togoleka olale rakoi. “Ge esop-ŋonnom saketkeneo, yemo tale-ŋonnom ari berek magu yewa eŋane kotoeno kesikene.”

³² Yesuŋo edange ariu. Rakiso, eŋe saket more ari berek eŋane kotoeno ketwarekoi. Pakiso berek magu yewa eŋe sora wazaino biririke ari, so doku namuŋ koto ketpi ma qorok onwareke.

³³ Ŋeiwa berek wareone gekoi, eŋe biririke mat suwaino ari ŋei ŋerep don kisi korop edangoi, so ŋeiwa asu qotkoinerop ere daleo okangoik, eya wane don kisi weneŋ edangoi.

³⁴ Pakiso, ŋei ŋerep koropŋo mat suwaino ŋine Yesu kakeiwane arikoi. Ari kau pakiso kaetongi kepeene eya qelige ariyakane olatkoi.