Matayu 7 - Ono

Ŋei Natne Misuk Dere Wanok-ongei

¹ “Ŋine ŋei natne misuk dere wanok ongei, eso yale okangei, yemo Kaisaleŋo ŋine yaleka baŋ dere wanok ŋuniyake.

² Onoka wane, ŋine ŋei natne dere wanok-ongei, eya wane rokopka Kaisale eŋe ŋine dere wanok-ŋuniyake, so ŋine ŋei natne numa more ebongei, rokop weku eyaka Kaisaleŋo baŋ ŋine numa more ŋiboniyake.

³ Pakimo ge onoka wane kimaŋonane deino gok pamaike, eyamo kamaine, ŋo geŋone deŋono eki sisine metmaike, eyamo mi kamaine me?

⁴ Eki sisine geŋone deŋono metki, ge daleo kima ŋone iwa yale olasikene, ‘Kima, ge detnannom, na deŋono gok metmaike, eya kitowe saketkep?’

⁵ Ge isi ŋei! Eki sisine geŋone deŋono pamaike, eya alakane manom sakesiyake, paki mo ge deŋone maine pore kakene, eso ŋado kimaŋonane deino ŋine gok eya manom sakesiyake.

⁶ “Kine kine kobekine eya kasi misuk ebongei, eŋe yemo weku zinge mo baŋ ŋidosikei, ŋine qoli zenam ŋine berek eŋane soteno misuk birakei, eŋe yemo weku zolipeneŋo baŋ qe barake qe peleke qelomgeu ket siukeyake, pakimo koso zinge ŋinŋine ŋaba-ŋunikei.”

Meŋenka More Kine Kine Maratkakene

⁷ “Meŋen-kanom paki, ge baŋ makene, zuwaŋ mage ge wele baŋ marat-kakene, madetko yatonom, baŋ lalage giniyake.

⁸ Mane eŋe meŋen kamaikeŋo baŋ mayake, so mane eŋe zuwaŋ maikeŋo wele baŋ marat kayake, ŋo mane eŋe madetko yatomaike, eŋe baŋ lalage maniyake.

⁹ Ŋinano ŋine ma magakŋo gipole kasap wane olatki mo, eŋe wesi wanaune maniyake?

¹⁰ Me ma ŋeiŋo gipole zawon wane olatki mo, eŋe koma qotkoine mane maniyake? Midakaka!

¹¹ Ŋine kepe ŋei borikine yalineŋo gipon borasokop ŋine ŋara aboŋ maine ebon okanmami. Magaŋine qeliwo gemaike, oŋo ŋine kine kine maine manerop baŋ meŋenka okanmami, rokopko eŋe eboniyake!

¹² “Iwaŋo yemo Mose wane ra rokop don eya wane kine so propet eŋane don qeturaŋmaike, ŋine ŋei ŋerep natne edo yeye kine kine okan-ŋungei wane wetke rau eŋe okan-ŋunmami, kop yaleka ŋei ŋerep natne eŋe ŋido okan-ongei wane wetke rau ŋine yalewaka okan-ongei.”

Madet Qeka Qekaine

¹³ “Ŋine madet qeka qekaine eyaka waketkei, onoka wane sora gerep wane madet yemo suwaine, so eya wane numa yemo kakapa, yewao ŋei loutneŋo waket ari okanmami.

¹⁴ Ŋo gege wane madet yemo qeka qekaine, so eya wane numa yemo nigagatne, so numa eya oken arikene yemo umatne so wikile teine, eso ŋei ewekine edoka eya maratka waket ari okanmami.”

Eki Mane So Eya wane Woune

¹⁵ “Propet isisine eŋane diyam seleleine makei, eŋe ŋinano sariu onbi, solaeneŋo lama sola okaniyake, ŋo kotoeneŋo yemo kasi zubaine, eŋane koto yale payake.

¹⁶ Ŋine kineene yemo baŋ wakongei, naso eyao detonikei. Eŋe mulap wakelerop yale, eyao wele nenine so simile mi qe okanmaimi.

¹⁷ Eki maine eŋe wele maine qekimo, eki qotkoine eŋe wele qotkoine qeyake.

¹⁸ Eki maine mane eŋe wele qotkoine mi qeyake, so eki qotkoine mane eŋe wele maine mi qeyake.

¹⁹ Eki natne wele maine mi qekei, yemo kitatpi ketki gerepko qakeu ezoyake.

²⁰ Eso yalinao ŋine baŋ propet isisine eŋane tanik manik okangei, eyao ŋine kineene eya detongei so qelaŋangei.”

Na Mi Det-ŋunmaile Ŋaŋae Ŋunmaile

²¹ “Ŋei ŋerep loutneŋo ‘Waom, Waom,’ nora okanmami, eŋe koropŋo qeli gege togon kotino mi waket warekei. Magane qeliwo gemaike, eŋane aŋaine teweke more, urata ma okanmami, edoka weku waketkei.

²² Kaiwe naso yewa bomile sariki, ŋei ŋerep loutneŋo baŋ iwa yale nolale rakei, ‘Waom, Waom! Geŋane eŋetko gora more, ŋene Kaisale wane don edangone, geŋane eŋet gora more, ŋene asu qotkoine loutne esop-onŋem saket ariwarekoi, so masi togogole loutne ma okangone!’

²³ Yale raumo, na baŋ iwa yale edangale, ‘Na ŋine mi detŋunmaile, wiye biranane ari wareu, ŋine borikine mama!’ ”

Mat Mama Etke Mane Dereret Korop Ŋo Mane Dereretine Midaine

²⁴ “Eso ŋei mane eŋe naŋane don iwa dere tewekeyake, eŋe baŋ ŋei mane dereretinerop yale okaniyake. Ŋei dereretinerop mane oŋo matine wesi kutno maki metke.

²⁵ Paki koya suwaine qeki doku qakum suwaine wiyeke, so momo suwaine togogole puwane more, mat eya qe make, ŋo siluŋ mat eya mi makmaŋge, onoka wane mat eya wesi kutno make, eya wane togole metke.

²⁶ “Ŋo ŋei mane eŋe naŋane don iwa dere mi tewekeyake, eŋe ŋei mane qelaŋ yale okaniyake. Ŋei qelaŋ mane eŋe matine gumu gumu kutno make.

²⁷ Paki koya suwaine qeki, doku qakum suwaine wiyeki, momo suwaine puwane, mat eya togoleka qe makmaŋge. Makmaŋgi okmage ket rasu zaŋ zuŋ make!”

Ŋei Ŋerep Eŋe Yesu Kisi Maep Zonomirop Raki Detpi Paki Oŋaene Qaeke

²⁸ Yesu eŋe don iwa korop rawareki qoeki, ŋei ŋerep magu suwaine eŋe kisi maep rarainane detpi paki, oŋaene qaeki welelepkekoi.

²⁹ Eŋe ra rokop don kito ebo ebonkopene, eŋane dereret wane rokopko mi edange, eŋe kisi maep don zonominerop so ewe bibi-inerop edange.