Matayu 2 - Ono

Kepe Sasaino Ŋine Ŋei Dereret Korop Edo Sari Yesu Maratkakoi

¹ Yesu eŋe Betlehem matko, Yudiya kepeo wakonge, nasoine Herot eŋe ŋei waom geke, yewao ŋei natne serekin dapot one more, kineene detone gegekoi, edo kepe sasaino ŋine Yerusalem matko sarikoi.

² Paki qesone rakoi, “Medep musele wakonmaike, Yuda ŋei eŋane ŋei waom eya diyawa ŋene eŋane serekinine kepe sasainoken sa wakikene, eso ŋene eya wane bakomine kitokenane sarimaine.”

³ Ŋei waom Herot eŋe don eya dere more qiseke, so Yerusalem matko ŋine ŋei ŋerep natne eŋe yaleka dere qisekoi.

⁴ Paki Herot eŋe Pris suwaine so ra rokop don numa kito ebo ebon ŋei edoraki, sari weku woka qeturageu qesonone rake, “Mesiya eŋe mat diyao wakoniyake.”

⁵ Eŋe olale rakoi, “Betlehem matko, Yuda kepeo, Propet eŋe iwa yale qeke,

⁶ ‘Betlehem matko, Yuda wane kepe, ge Yuda ware ware eŋane keuwo ŋine ketkele midaka, ŋinano ŋine ŋetne mane baŋ sariyake, oŋo naŋane ŋei ŋerewekopne Israel baŋ alakane sikan-oniyake.’ ”

⁷ Eso Herot eŋe kepe sasaino ŋine ŋei sarikoi, eŋe edoraki ariu sanka lewage, naso diyawao serekinba wakonge desiyakane qeson-onge.

⁸ Pakiso iwa yale edaneso biraongi Betlehem matko arikoi, “Ariu paki, bororom kauluke medep eya zuwaŋ-ka kau paki sari na nolatpi dere so, na yaleka maine ari more ka so noŋo karep bakomine kitokale.”

⁹ Don iwa edangi, dere so eŋe yeropka arikoi, numao ariu paki serekin kakoi, serekinba kepe sasaino wakongi kakoi, so mogare sarikoi, serekin weku yewaka kakoi. Ka more serekin eyaŋo koso alakangi, so eŋe kama kama ari mage medep pake, mat eya wane kutno doŋ mane metke.

¹⁰ Eŋe Serekin kau paki, wetene peseki, oi bakom suwaine okangoi!

¹¹ Eŋe mat koto wau paki, so Yesu medep so nagaine Mariya otkoi. Eŋe otpi paki wawetene qe wet pesek suwaine dere, umi qe more bakomine kitokoi, pakiso, kiteene makoke bakom okan-kakei wane kine kine ma sarikoi, eya mangoi, so gol, so eki kelokine qoune simile, so kelok qoune simile eya korop mangoi.

¹² Pakiso Kaisaleŋo kulu kuluwo Herot wano koso mi zinge arikei wane girem edange. Eso eŋe zinge more, numa maneoka mateno arikoi.

Yosepŋo Yesu Medep So Mariya Iwenotki Izip Kepeo Arikoi

¹³ Eŋe ariu so, Waom wane aŋelo maneŋo kulu kuluwo Yosep wakonka more olale rake, “Wiyenom paki, medep so nagaine epunom Izip kepeo ariu paki, eya ge mageu, noŋo rawe dere so baŋ koso zinge sarikei, Herot eŋe wet togon okane more baŋ zuwage medep qeki seukeyakane ramaike.”

¹⁴ Yale olatki, so Yosep eŋe wiye more, medep so nagaine epuki, so mat qelige goigoka Izip kepeo arikoi.

¹⁵ Ari eya ge mageu, Herot seukke. Yale okangi, so don mane Waomŋo propet mane wane wetno motki don rake, eya wane wele wakonge. Don iwa yale rake, “Na medepne orawe, Izip kepeo ŋine koso wiye sarike.”

Herotŋo Raki Medep Nigatne Korop Engu Warekoi

¹⁶ Herot eŋe iwa yale detke, kepe sasaino ŋine ŋei lobo sarikoi, eŋe na isi-nangoi yale detki paki, sotine zok osike, paki eŋe don motki kawali ŋei eŋe Betlehem matko so mat osop osop pa arike, eyao medep ŋei komaene etke so eŋane bano medep abubuwo korop engu warekoi. Eŋe ŋei lobo kepe sasaino ŋine sari serekinba wakonge, eya wane nasoine olatkoi, eya detki paki, eya wane kop okange.

¹⁷ Numa iwa okanbi Propet Yeremaiyaŋo don mane rake, eya wane wele yewa wakonge,

¹⁸ “Rama matko ukat wakongi detmami, nem kuwasuruk so aro uŋalan wakonmaike. Rahelŋo qerakkoune Yuda wane tego eŋane ra more arokmaike, eŋe arokmaike, so baŋ mi mau kopkeyake, onoka wane eŋe korop seuseuneka.”

Yosepŋo Mariya So Yesu Medep Izip Ŋine Epuki Zinge Sarikoi

¹⁹ Herot seukki, ŋadino Waom wane aŋelo maneŋo kulu kuluwo Yosep Izip eyao wakonkake,

²⁰ Paki olale rake, “Ge wiyenom paki, medep eŋine so nagaine epunom, koso zinge more, Israel kepeo ariu, onoka wane medep qekei wane rakoi, ŋei eya eŋe mo seukkoi.”

²¹ Yale olatkiso, Yosep eŋe wiyeki paki, medep eŋine so nagaine epukiso eŋe koso zinge Israel kepeo arikoi.

²² Eŋe ari detki, gipole Arkelaus eŋe mo magaine Herot wane tungo koso Yuda kepeo ŋei waom geke, pakiso Yosep eŋe Betlehem matko geyakane kaetkake so eŋe yale okangiso aŋeloŋo koso manerop kulu kuluwo wakone more olatki, so eŋe eya ŋine wiye koso Galili kepeo arikoi.

²³ Ariki paki matine mane eŋetine Nazaret eyao matine maki paki, eya gekoi, pakiso naso yewao propet edo don mane iwa yale qekoi, “Eŋe baŋ Nazaret welaine orakei,” eya wane wele eya wakonge.