Mareko 7 - Ono

Kaisale Wane Gege Eyaŋo Sogi Gege Yuwankamaike

¹ Kaisale wane papa togon welaine ŋei natne, Parisaiyo, so Kaisale papa togon welaine ŋei natne, Skribe, eŋe Yerusalem ŋine sari Yesu wano lewaŋgoi.

² Eŋe Yesu dokoine onbi meteene mi saukeu libe qeke, eŋe yaup ŋara ma nekoi.

³ Parisaiyo so Yuda ŋei ŋerep korop eŋe aso ŋabo eŋane masi eya mogare ge okanmaŋkoi. Eŋe ŋara nekeiwane okane more aso ŋabo ra rokop donŋo mo daleo rake, eya wane rokopko mogare ma more meteene sauke more maine ma ne okan okanmaŋkoi.

⁴ So nalu qole qoleo ari more zinge sari matko ŋara nekeiwane okane more eŋe doku tau more ma ne okangoi. Eŋe kine kine natne aso ŋabo eŋane masi eya korop mogare okan waremaŋkoi. Eŋe lase, kap ŋara mire ne, so kulu papa wane kine kine korop sauke mauluke gemaŋkoi.

⁵ Eŋe Yesu qesonka rakoi, “Onoka wane dokoŋone eŋe asoŋabo eŋane numa tego eya mi mogatmami. Eŋe meteene mi sauke more ŋara yaup ma nemami.

⁶ Rauso, eŋe iwa yale edange, Isaiyaŋo ŋine isi ŋei zok ŋidorake, ŋinane kineŋine ekapko iwa yale Kaisale wane dongo qeke pamaike. ‘Kaisaleŋo rake, Ŋei tego yewa eŋe pieneŋoka naŋane eŋetne nora bukeu waokanmaike. Ŋo, wet derereteneŋo yemo na qeliŋnane more, amaŋ okoramami.

⁷ Eŋe nae yaup eŋetneka nora bukeu waokanmaike. Eŋe aso ŋabo eŋane numa tego yewa kito ebone more raokanmami, iwa Kaisale wane don.’

⁸ Yesu eŋe koso edane rake, Ŋine Kaisale wane don masi koboboine mo qeligeu siuk ŋunmaike? Pakimo, ŋine ŋei ŋinŋine aso ŋabo eŋane don eyaka malipka gemami.

⁹ Yesu eŋe koso edange, Ŋine zok mi detluke more mi kauluke more Kaisale wane don koboboine eyamo matali qetali okane more ŋinŋine asoŋabo eŋane numa tego malipka gemami.

¹⁰ Moseŋo sogino qei bano mo rake, ‘Ŋine nabok magak ere qesiŋore more ge okanikei, Ŋo, ŋei mane eŋe nabok magak don borikine etaniyakeo, eŋe qeu seukeyake.’

¹¹ Ŋo, Kaisale wane papa togon welaine ŋei, ŋerep ŋine don so dereret so kait masi ŋine eya, iwa yale. Ŋei mane eŋe wesi-ineropŋo eŋe naga magaine qesiŋ-osiyakane rayake, ŋo siluŋ ere mi qesiŋ-osiyake, ŋo eŋe isiore more etane ra okanmaike, na mo Kaisale wane biŋek qile.

¹² Ŋine ŋinŋine yalewa okane more ŋei edanbi, eŋe naga magaene mi qesiŋone more, qeliŋ onmaŋkei.

¹³ Ŋine ŋinŋine asoŋabo kito ebo ebon ŋei ŋerep eya edanmami, ŋine Kaisale wane don zonomine mau ket okanmaike. Ŋine kine kine loutne yalewa ma okanmami.

Kine Kine Iwaŋo Maki Ŋei Dienerop Okanmaŋkei

¹⁴ Yesu eŋe koso ŋei ŋerep magu suwaine edoraki sariu edange, Ŋine koropŋo naŋane don iwa dere wetŋino motpi so det-lukkeu.

¹⁵ Ŋine detmami, kine kine iwa diinerop ŋadino pamaike, eyaŋo ŋinane koto ŋine mi maki sigileyake. Ŋo kine kine natne ŋinane wet dereretŋine kotino pamaike, eyaŋo saket more maki wet dereretŋine korop sigile okanmaike.

¹⁶ Ŋei mane eŋe wetineropŋo don iwa det-lukkeyake.

¹⁷ Yale ra more eŋe ŋei ŋerep yewa qeliŋone more eŋine so dokoine eŋe ari mat maneo wa more don rokop rake yewa wane kine desikeiwane qesonkakoi.

¹⁸ Yesu eŋe iwa yale edange, Ŋinane dereretŋineŋo ŋei ŋerep natne eŋane dereret mi yuwan onmaike. Ŋara kine kine korop pamaike, eyaŋo ne more ŋei ŋerep mi sigilekene.

¹⁹ Ŋara yewa wet dereretŋine mi qeduguyake so eyaŋo maki koto ŋine mi sigileyake. Ŋara qomŋino ket more koso kaŋinoka saket ariyake. So Yesu eŋe iwa yale rake, Yesu eŋe ŋara kine kine yewa eŋe korop Kaisale wane kaitko libekaka pamaike.

²⁰ Pakiso, eŋe rake, Kine kine ŋei wet dereret kotino pamaike, eyaŋo saket more maki ŋei ŋerep wet dereretŋine korop sigile okanmaike.

²¹ Ŋei ŋerep wet dereretko pa more saket maki ŋei ŋerep dirop okan okanmaine, yemo iwa, edo dereret qotkoine detokanmami, so ŋei ŋerep natewen qaluwit wenip yau yaup ma okanmami, so ŋei naka pilaŋŋo engumami me kine kineŋo matalionbi seuke okanmami, kobu ma okanmami,

²² Ŋei mane eŋe ŋei mane wane ŋanomine kobu ma okanmaike, bailalaŋ okan okanmami. Ŋine masi tanik kine kine natne korop okan okanmami, isi kine kine ma okanmami, wawaine masi kine kine okan okanmami, bau wawa masi kine kine ma okanmami, qe baik ma baik don ra okanmami, wawaine don kine kine ra okanmami, doku togole ne more qelaŋ qelaŋine okane numa kine kine mau bori okanmaike.

²³ Masi tanik kine kine qotkoine korop iwaŋo ŋei ŋerep wet dereretko pa more eyaŋo saket maki ŋei ŋerep kotoze dienerop okan okanmami.

Ŋerep Mane Eŋane Mali Malipine Togole

²⁴ Yesu eŋe yewa qelige eya ŋine wiye Tire matko ari lotke more, mat mane wane kotino ari waket siuke metke, onoka wane ŋei ŋerep edo esatka eŋano mi sari lewaŋgei wane. Ŋo siluŋ dalino siuke metkirap.

²⁵ Mida! Ŋerep mane mat yewa ŋine eŋe Yesu mo detkaki metke. Ŋerep yewa eŋe borasine asu qotkoineŋo matalikaki metke, eya wane ŋerep yewa eŋe ikopka sari Yesu wane osino kino ket pese wawetine qeke.

²⁶ Ŋerep yewa eŋe tego maneo ŋine, qelaŋ ŋerep, eŋe Yuda wane tegoo ŋine mida. Eŋe Ponisiya tegoo ŋine, kepe mat eya wane welaine, eyamo Siriya kepeo. Eŋe Yesu wano ari seleleine qe meŋenka more rake, Borasone asu qotkoineŋo matalikaki metmaike. Ge esopkanom!

²⁷ Yesu eŋe olale rake, Ŋene mikepka medep ŋara gumeonŋem. Ŋene medep eŋane ŋara maine mi biraŋem kasimde eŋano ariyake.

²⁸ Yale rakiso, ŋerep eŋe mainge rake, Waom, ge don wele ramaine, ŋo medep eŋe ŋara ne okanmami, naso yewao sisine kepo ketki kasi eŋe medep eŋane ŋara sisine eya weneŋ ne okanmaŋkei.

²⁹ Pakiso, Yesu eŋe ŋerep olatke, Ge yale ramaine, eya wane maine zinge arinom borasoŋone asu qotkoine eya mo qeliŋ-kamaike.

³⁰ Yale ra olatki, ŋerep eŋe zinge matko ari kaki borasine eya asu qotkoineŋo mo welekatne qeliŋka saket ariki, eŋe maine papaino kulu pake.

Yesu Eŋe Ŋei Mane Aŋa Ketine Won Wole Ma Menaŋkake.

³¹ Yesu eŋe wiye Tire qelige more Sidon kepe so Mat Suwaine Meteetke (10) kepe keuwoka ratoke ari Galili doku namugo lotkeke.

³² Ŋei natne eŋe ŋei mane done mi raraine so ketine won wole eya Yesu wano iwenka sari, oŋo metine more ma menaŋ-kayakane olatkoi.

³³ Pakiso, Yesu eŋe ŋei yewa maki eretneka ŋei ŋerep magu yewa qeliŋone amaŋ ari mere so Yesuŋo ŋei yewa wane ketino metine boineŋo qesikane more, mekatine boino sopotke belakamino motke.

³⁴ More so qeliwo potki waki wetine aroke saki, rake, Epata! Don eya wane kine iwa yale. Ketŋone so aŋaŋone lotkeuk!

³⁵ Yale raki ŋei yewa dereretine lotkeki korop detkake. So belakamine umareke, eya ewekki don maine rake.

³⁶ Yesu eŋe sari ŋei ŋerep magu yewa rawetone more rake, Masi iwa mamaile, eya wane don kisi misuk rau suwa ariyake. Yale ra naso baŋem rawetone okanmaŋke, ŋo, eŋe soringe takotke eŋane don kisi rau suwa arimaŋke.

³⁷ Ŋei ŋerep korop eŋe oŋaene qaeki rakoi, Urata kine kine natne welekatne wakonmaike. Ŋo, Yesu eŋe ŋei ketine won wole eya maki lotkeki don detlukmaike. So eŋe ŋei aŋaine umatne so mawon mawole, eya maki don ramaike. Eyaŋo ŋene kaŋem zok manerop menaŋ-lulukmaike.