Mareko 3 - Ono

Yesu Eŋe Ŋei Mane Metine Marap Maraune Ma Menaŋkake

¹ Naso maneo, Yesu eŋe koso zinge ari Kaisale Wane Lewa Lewaŋ Urum koto waketke. Ŋei mane yewa metke, eŋe metine nat paromineŋo setneka marap maraune.

² Ŋei natne eŋe Yesu kau sariki diyamine mau paki, iwa yale rakoi, “Yesu eŋe Qezarek Nasoo zoma ŋei metine marap maraune iwa maine ma menaŋ kayake me mida. Eŋe ma menaŋ kayakeo, yemo ŋene Yesu dongo birakaikene.”

³ Yesu eŋe zoma ŋei yewa metine borikine, eŋe olale more rake, “Ge meteŋone borikine, yalinane iwa wiye sari okoranom!”

⁴ Pakiso, eŋe ŋei ŋerep qeson one rake, “Ŋenze ra rokop don eŋe Qezarek Naso wane don dalino ramaike? Masi maine maikene me qotkoine? Ŋene ŋei ŋerep gegeene ma menaŋ onikene me ŋei ŋerep enguŋem seukkei?” Qesonongi, edo dere more don mane mi mainge olatkoi.

⁵ Pakimo Yesu eŋe deine pore lolike more ongi eŋe dereretene won geki donene midaine metkoi, eya wane Yesu eŋe ikopka sotine osiki koso dere umare onge. Pakiso, Yesu eŋe zoma ŋei olale rake, “Ge meteŋone birakanom! Eŋe metine biraki, eyaka ikopka menaŋ-kake.”

⁶ Yale okangiso, Parisaiyo eŋe ikopka Kaisale wane lewa lewaŋ urum qeliŋka more wiye saket ari Herot wane tego eŋerop lewage more, Yesu eŋe numa eya me eya maratka more qeu seukeyakane done aukoi.

Kepe Baŋem Ŋei Ŋerep Eŋe Yesu Wano Sarikoi

⁷ Yesu eŋe dokoine eŋerop wiye mat yewa qeligeu paki, Galili wane doku namuŋ pamaike, yewa arikoi. Pakimo ŋei ŋerep magu tego kakapa suwaineŋo wiye eŋe mogatka arikoi. Ŋei ŋerep magu suwaine yewa eŋe kepe baŋem ŋine sarikoi.

⁸ Galili kepeo ŋine, Yuda kepeo ŋine, Yerusalem mat suwaino ŋine, Idumiya kepeo ŋine, Yordan kepe sasaino ŋine, Tire so Sidon kepeo ŋine. Ŋei ŋerep magu suwaine yewa eŋe Yesuŋo urata kine kine maki detka more eŋano sarikoi.

⁹ Magu suwaine zok manerop Yesu watke more, gitit kaikei wane okanbi eŋe dokoine eŋane rake, “Ŋine ari seki mane ikopka mauluke ma sariu, yaup warenan metkep! Ŋei ŋerepŋo magu suwaine okanbi, so na eya wane kutno wa more toe, ŋei ŋerep biraone eri kere, amaŋ naeka toe mesikale.”

¹⁰ Sogino mo Yesu eŋe ŋei ŋerep loutne ma menaŋ onge, eya wane ŋei ŋerep zoma enerop eŋe edom meteeneŋo solaine makei wane onge, pakimo eya wane eŋe kima kopene qepodon onbi sari, Yesu sola takotino uwakaikei wane okangoi.

¹¹ Naso natneo ŋei ŋerep asu qotkoinerop eŋe Yesu ka more ari kepeo ket rasu pa more boka aroke ora rakoi, “Ge, Kaisale wane Gipole!”

¹² Yale rau, Yesu eŋe asu qotkoine togogoleka ra togole ongi paki eŋe ma, eya tingo me didiwo eŋane eŋetine zok mi rau suwayakane rawetonge.

Yesu Eŋe Dokoine 12 Ebuke

¹³ Pakiso, Yesu eŋe weti bonagao wake, naso eyao wiye more, ŋei natne eŋerop gekei wane ma wakononge, ŋei eya eŋe edoraki eŋano sarikoi.

¹⁴ Pakimo eŋe ŋei magu 12 ma wakononge, ŋei yewaŋo eŋinerop gekei wane, ma wakon one more, eŋeteene aposel edorake, so eŋe bira ongi ari ŋei ŋerep eŋano kisi maep ra qelaŋanikei wane rake.

¹⁵ Yesu eŋe ŋei 12 yewa eŋine tungo asu qotkoine esop onikei wane zonom takot onge.

¹⁶ Yesu dokoine eŋane eŋet tegoene iwa yale ebonge. Simon, eŋetine mane Petoro orake.

¹⁷ Zebedi wane gipole Yakop, eŋine so ŋole Yohane, erane eŋeteetne mane Boanerges etorake. Eŋet yewa wane kine, quruŋ qilap.

¹⁸ Andreya, so Pilip, Bartolomu, Matayo, Tomas, Yakop, Alpius wane gipole, so Tadius so Saimon Zelot.

¹⁹ Ŋo Yudas Iskariot, ŋei yewaŋo Yesu ŋaba eŋane meteeno masi qotkoine okan kaikei wane ma wakonka birakake.

Ŋei Eŋe Rakoi Yesu Eŋe Belzebulrop Urataine Mamaike

²⁰ Pakiso, Yesu eŋe matko ariki ŋei ŋerep magu suwaineŋo eŋano koso sari lewaŋgoi. Eya wane Yesu, eŋine so dokoine eŋe qeka more, dalino ŋara mane neurap.

²¹ Yesuŋo kine kine okange so make, eya wane tego tanik manik eya ŋei eŋe ra suwau dere more weŋem tutulekoune, eŋe Yesu ma walukka more, iwen-kaikei wane sarikoi. Tutulekoune eŋe iwa yale rakoi, “Eŋe mo qelaŋ qemaike!”

²² Kaisale papa togon welaine ŋei natne, Skribe, eŋe Yerusalem ŋine ket more rakoi, “Eŋe kotino Belzebul, eŋetine mane Ŋei Borikineŋo okoramaike. Eŋe Belzebul wane zonomgo so oŋo qesiŋkaki, asu qotkoine eya esop-onmaike, eyaŋo asu qotkoine eŋane ware ware.”

²³ Eŋe yale rauso, Yesu eŋe edoraki osino sari metpiso don rokop mane more edane rake, “Ŋei Borikine oŋomka dalino Ŋei Borikine osop-kayake?

²⁴ Ŋei ŋerep kaunsol mane wane magu eŋe wiri magu etke okane more yakukei mo, kaunsol eya wane zonomine eyamo midayake.

²⁵ Ŋo ŋei urumene weku eŋe wiri more magu etke okane more kawali yakukei, ŋei yewa eŋe koso togole qeturage maine weku mi lele gekei.

²⁶ Ŋo Ŋei Borikine eŋe eŋine magu ŋaba okan-oniyake, eŋe wiri more zonomene midayake.”

²⁷ Yesu eŋe koso don iwa yale takotke rake, “Ŋei Borikine zonomine suwaine, eŋane urata wane aboŋ kine kineine yaup maine mi ari maikene, yemo midakaka. Mikep eŋine kiye metine wokomka more ŋado maine eŋane mat koto wa more, urata wane aboŋ kine kineine pamaike, yewa matali onikene.

²⁸ Na ŋine don wele iwa yale ŋidanbe, Kaisale eŋe ŋei ŋerep eŋane masi tanik qotkoine kine kine so don dereret borikine ramami, yewa eŋe korop qeliŋgi siukeyake.

²⁹ Ŋo ŋei mane eŋe Kaisale wane Asu Koboboine ra matali okan kayakeo, yemo ukude Kaisaleŋo eŋane sot eya mi qeliŋgi siukeyake. Eŋane borikinane sot turuŋ eya qoi qoine midaine motki pamageyake.”

³⁰ Yesu eŋe don yale ra edangane Kaisale wane papa togon don welaine ŋei eŋe rakoi, “Yesu eŋe mo kotino asu qotkoineŋo ketke okoramaike.”

Yesu Wane Nagaine So Ŋonqakoune

³¹ Naso yewao Yesu wane nagaine, so ŋonqaine eŋe sari lotke more mat wazaino okora more don motpi wake, Yesuŋo saket oniyakane.

³² Pakimo, ŋei ŋerep magu suwaine eŋe Yesu lolikka metkoi, edo olale rakoi, “Ge detnom! Geŋane nagaŋone, so ŋonqakopŋone eŋe qeinat, mat wazaino okora more goŋo kesikenane ramami.”

³³ Yalewa rau, Yesu eŋe mainge edane rake, “Maŋo naŋane nagane, so ŋonqane?”

³⁴ Eŋe deine ŋei ŋerep lolikka metkoi, eŋe one more, eŋanoka pore ongi paki rake, “Onbi! Iwa edo naŋane nagane so ŋonqane okanmami.

³⁵ Ŋei me ŋerep mane eŋe Kaisale wane don dere eŋane simile mogasikei, eya ŋo naŋane nagane so ŋonqane okanmami”.