Luka 3 - Ono

Yohane Doku Tau Tauŋo Kaisale Wane Don Ra Qelaŋanmaike

¹ Taiberius Sisa eŋe koma 15 Roma kepe ware ware suwaine geke. Pakiso, eŋane ketkele, Pontius Pailat eŋe Yuda kepeo ŋei waom geke, ŋo Herot, eŋe Pailat wane ketkele, eŋe Galili kepeo ŋei waom gekiso, ŋole Pilip, eŋe Itureya so Trakonitis kepeo ŋei waom geke. Ŋo Lisaniyas eŋe Abilene kepeo ŋei waom geke.

² Ŋo mosop ŋei ŋetne etke gekoik, Anas so Kaiyapasi, naso yewao Zekaraiya wane gipole Yohane eŋe kepe yaup papaino gekiso, Kaisale wane donŋo ketno ketke.

³ Pakiso, Yohane eŋe Yordan doku erinat so inat geware more, ŋei ŋerep iwa yale edane rake, “Ŋine borikineŋine ŋadek kawareu paki, doku taukei, Kaisaleŋo sot turuŋŋine qeliŋwareyake.”

⁴ Kaisale wane qelit ŋei, propet Isaiyaŋo eya wane don iwa yale dere more qeke, “Kepe yaup papaino ŋei maneŋo boka woka mane iwa yale ramaike, ‘Waom wane numa makoboeu, paki numaine kitou digin qekep!

⁵ Wagemine korop somewareu, meŋoine so bonagaine korop kito kito pelekeu digin qekep. Duma kuŋ qegu ŋine kito koboeu koboekep, so kito wa kito ketine ma sorokeu, qe leleke ket sorodoŋgep.

⁶ Paki daleo Kaisaleŋo ŋei ŋerep ma menaŋoniyake, eya wane kine eŋe kaulukkei.’ ”

⁷ Ŋei ŋerep magu suwaineŋo doku tau tau wane Yohane wano lotke warekoi, pakimo Yohaneŋo edange, “Ŋine koma wane doko ŋosakoune, ŋine Kaisale wano ŋine borikinane turuŋine mo zingeyakane okanmaike, ŋine yewa kakak kaikei wane maŋo ŋidange me?

⁸ Ŋine wetŋine mainge ware more, eya wane weleine maratkau, so ŋine ŋidomka misuk kiyeke more, ŋene Abraham wane ŋabokoune raikei, na ŋidanmaile, Kaisale eŋe maine wesi iwaŋo maki Abraham wane ŋabokoune koso musele maine wakongei!

⁹ Naka mo eki kino mot mole, eya wane eki mane eŋe wele maine mi qeki, kitare more gerepko pekekeu zeyake.”

¹⁰ Pakiso, ŋei ŋerep eŋe qesonka rakoi, “Ŋene daleo okanikene?”

¹¹ Rauso, eŋe mainge edange, “Ŋei mane eŋe takot etke mage more, takot mane kimaine takot midaine ka more, eŋe maniyake. Ŋei mane eŋe ŋaraine weneŋŋo rokop, yalewaka okaniyake.”

¹² Pakiso, takis mama eŋe yaleka doku taukei wane lotke more, qesonka rakoi, “Kito ŋebo ŋebon ŋene daleo okanikene?”

¹³ Rauso edange, “Ŋine ŋei eŋano ŋine takis maikei wane raraine, rokop yewa yale waka ma okanikei, ŋinŋine wetŋino misuk qeyau kere koso takotke maikei.”

¹⁴ Kawali ŋei natneŋo yale waka qesonka rakoi, “Ŋo ŋenewa? Ŋene daleo okanikene?” Rauso, eŋe edane rake, “Ŋine ŋei engu kito, me isi more wesiene zok yaup misuk omakongei, ŋine wesiŋine ma okanmami, yewa wane rokopka maikei.”

Yohaneŋo Yesu Wane Kine Ra Qelaŋane edange

¹⁵ Pakiso ŋei ŋerep eŋe weteno saqe saqe okangi, dere siuke more rakoi, “Eŋe Mesiya me mida?”

¹⁶ Yohaneŋo korop edane rake, “Noŋo dokuka tauŋunmaile, mane ŋadeno sarimaike, eŋe zonomine zok manerop pa manmaike. Eŋe naŋane rokop mida, namde eŋane qelit qeqe meine. Oŋo ŋine natne boaŋ Asu Koboboine ŋiboniyake, ŋo ŋine natne gerepŋo ŋizoyake.

¹⁷ Eŋe sawoliinerop sari more, ŋaraine eune ma more wele peikki urumgo wayake, ŋo ŋei sinoine yewamo peikki gerep togongo wa more ezowareyake.”

¹⁸ Yohaneŋo numa tanik kine kineo more, kisi maep don ŋei ŋerep edange, so gege mageene qotkoine qeliŋkaikei wane qebinonge, so kisi maep edange.

¹⁹ Pakimo ŋei waomene Herot, eŋe ŋolane ŋanomine Herodiyas kobu make, so borikine natne weneŋ make, eya wane Yohaneŋo girem don olatke.

²⁰ Herot eŋe sot yewa okange, so koso takotke more sot mane kakapa suwaine manerop okange, eyamo Yohane mulap urumgo birakake.

Yohaneŋo Yesu Doku Taukake

²¹ Ŋei ŋerep loutne eŋe Yohane wano lotke more doku taukoi, pakiso Yesu eŋe yalewaka ari more tauke. Tau more meŋenka metkiso, qeli aŋaŋge.

²² Pakiso, Asu Koboboineŋo sola bikum gorop okane, baluse yale lele more, so Yesu wane kutno ketke. Pakiso, qeliwo ŋine don mane iwa yale raki sarike, “Ge nae gipon maepne, na geŋane zok similenan okanmaike.”

Yesu Wane ŋosa Wili Wilikoune

²³ Yesu eŋe komaine 34 okangi, so urataine kiyeke make, ŋei ŋerep eŋe Yesu wane detpi, Yosep wane gipole okange. Yosep eŋe Heli wane gipole.

²⁴ Heli eŋe Matat wane gipole. Matat eŋe Lewi wane gipole. Lewi eŋe Meliki wane gipole, Meliki eŋe Yanai wane gipole, Yanai eŋe Yosep wane gipole,

²⁵ Yosep eŋe Matatiyas wane gipole, Matatiyas eŋe Amos wane gipole, Amos eŋe Nahum wane gipole, Nahum eŋe Esili wane Gipole, Elisi eŋe Nagai wane gipole,

²⁶ Nagai eŋe Mat wane gipole, Mat eŋe Matatiyas wane gipole, Matatiyas eŋe Semen wane gipole, Semen eŋe Yesek wane gipole, Yesek eŋe Yoda wane gipole,

²⁷ Yoda eŋe Yoanan wane gipole, Yoanan eŋe Resa wane gipole, Resa eŋe Zerubabel wane gipole, Zerubabel eŋe Seyaltiel wane gipole, Seyaltiel eŋe Neri wane gipole,

²⁸ Neri eŋe Meliki wane gipole, Meliki eŋe Adi wane gipole, Adi eŋe Kosam wane gipole, Kosam eŋe Elmadam wane gipole, Elmadam eŋe Eri wane gipole,

²⁹ Eri eŋe Yosuwa wane gipole, Yosuwa eŋe Eliezer wane gipole, Eliezer eŋe Yorim wane gipole, Yorim eŋe Matat wane gipole, Matat eŋe Lewi wane gipole,

³⁰ Lewi eŋe Simeon wane gipole, Simeon eŋe Yuda wane gipole, Yuda eŋe Yosep wane gipole, Yosep eŋe Yonam wane gipole, Yonam eŋe Eliyakim wane gipole,

³¹ Eliyakim eŋe Meleya wane gipole, Meleya eŋe Menna wane gipole, Menna eŋe Matata wane gipole, Matata eŋe Natan wane gipole, Natan eŋe Dawit wane gipole,

³² Dawit eŋe Yese wane gipole, Yese eŋe Obet wane gipole, Obet eŋe Boaz wane gipole, Boaz eŋe Salmon wane gipole, Salmon eŋe Nason wane gipole,

³³ Nason eŋe Aminadap wane gipole, Aminadap eŋe Atmin wane gipole, Atmin eŋe Arni wane gipole, Arni eŋe Hezoron wane gipole, Hezoron eŋe Perez wane gipole, Perez eŋe Yuda wane gipole,

³⁴ Yuda eŋe Yakop wane gipole, Yakop eŋe Isak wane gipole, Isak eŋe Abraham wane gipole, Abraham eŋe Tera wane gipole, Tera eŋe Nahor wane gipole,

³⁵ Nahor eŋe Seruk wane gipole, Seruk eŋe Reu wane gipole, Reu eŋe Pelek wane gipole, Pelek eŋe Eber wane gipole, Eber eŋe Sela wane gipole,

³⁶ Sela eŋe Kainan wane gipole, Kainan eŋe Arpakasat wane gipole, Arpakasat eŋe Sem wane gipole, Sem eŋe Noa wane gipole, Noa eŋe Lamek wane gipole,

³⁷ Lamek eŋe Metusela wane gipole, Metusela eŋe Enok wane gipole, Enok eŋe Yaret wane gipole, Yaret eŋe Mahalalel wane gipole, Mahalalel eŋe Kenan wane gipole,

³⁸ Kenan eŋe Enos wane gipole, Enos eŋe Set wane gipole, Set eŋe Adam wane gipole, Adam eŋe Kaisale wane gipole.