Luka 17 - Ono

Sot Wane Kine

¹ Pakiso Yesu eŋe dokoine edane rake, “Borikine kine kineŋo ŋei ŋerep mau sotene maratoniyake, eya naso baŋem wakonmaike, ŋo ŋei maneŋo kimaine qebin mabin borikine mane ma more, sot marat kayakeo, Kaisaleŋo ŋei eya wikile maniyake.

² Ŋo ŋei maneŋo medep nigatne yewa maki me iwenkaki sot marat kayakeo, Kaisaleŋo ŋei eya wikile suwaine zok maniyake.

³ Eya wane ŋine kine kine ma more kaulukkei. “Kimaŋone eŋe masi borikine mayakeo, ge maine eŋano ari girem olale more, rawetkanom, eŋe sot eya ŋadekkayakeo, ge maine sotine qelige turuŋine birakene.

⁴ Eŋe masi borikine geŋano atak sewen, kaiwe wekuo ma more sari more rokop atak sewen rapoke golasiyakeo, me qom borik don golasiyakeo, ge sot turuŋine qelige manikene, so ge iwa yale olasikene, ‘Na sot turuŋŋone mo qeliŋmaile.’ ”

Mali Malip Wane Kine Yesuŋo Edange

⁵ Yesu wane qelit ŋei eŋe Yesu olale rakoi, “Ŋenane mali malipze togole mida, ge mali malipze manom togolekep!”

⁶ Waomzeŋo mainge iwa yale rake, “Mastet woune eŋe niga nigatne okanmaike pakimo ŋinane mali malipŋine eŋe woune yale waka nigatne okaniyakeo, ŋine eki suwaine yewao maine olasikei, ‘Ge wiye lolige ŋodoŋonerop ari kiwetko okoranom!’ Ŋine yale ra olatpi, eki eya eŋe maine ŋinane don tewekeyake.

Qelit Qe Qe Urata Wane Kine Yesuŋo Edange

⁷ Ŋinane keuwo ŋine ŋei maneŋo qelit mamaike, ŋei eyaŋo sere kito more lama wareon okanmaike. Urata eya qoeki, so eŋe euwo ŋine sariki eŋe iwa yale mi olatmaike, ‘Ge ikop sari nenom!’

⁸ Midakaka, eŋe iwa yale olasiyake, ‘Ge wiye naŋane ŋara soep mauluke more, laplap libeka bira more ŋara soep ninnom nekale, na newe qoeki baŋ ŋado yemo ge ŋara dokuŋone nekene.’

⁹ Qelit qeqeŋone eŋe urata ma qelitŋone qeki, ge maine ewine kito mawa kaikene me? Midakaka!

¹⁰ Ŋine yale waka, na kine kine ŋidangole, eya korop ŋine ma more raikei, ‘Ŋene qelit qeqe ŋei, ge kine kine ŋedangone, eya ŋene mo mene, eya mo rokouno.’ ”

Yesu Eŋe Ŋei 10 Ma Menaŋonge

¹¹ Yesu eŋe Yerusalem ariyakane Samariya kepe so Galili kepe keuwetnoka ari more,

¹² mat maneo wakesiyakane okane, ŋei 10 kubet togoleenerop maratonge, eŋe amaŋ okora more,

¹³ boka rakoi, “Yesu, waom, ge ŋenane wetŋone borikep!”

¹⁴ Yesu eŋe ŋei eya one more edange, “Ŋine ari more, mosop ŋei solaŋine eya sikanonikei.” Eŋe ariu ariu eyaka kubet togon solaeno pake, eya mo osi more, libeka okange.

¹⁵ Ŋei maneŋo solaine kaki menaŋgi, so eŋe Yesu wano zinge ari, Kaisale wane eŋetine ora mawaka more suwaineze oi bakom okankake.

¹⁶ Eŋe Yesu wane kino ket rasu more, ewine kitoke, ŋei yewa eŋe Samariya welaine mane, eŋe Yuda tego ŋadino ŋine.

¹⁷ Pakimo Yesu eŋe olale rake, “Na ŋei 10 ma menaŋonile, ŋei natne 9 eŋe diyao arimami?

¹⁸ Onoka wane qelaŋ lobo ŋeiŋoka iwa koso zinge Kaisale wane eŋetine buke wamaike?”

¹⁹ So Yesu eŋe takotke more olatke, “Ge wiye arinom, ge naŋane don mo malipkamaine, so mali malipŋonane menaŋmaine.”

Kaisale Eŋe Dalino Waremaike

²⁰ Kaisale wane papa togon welaine ŋei, Parisi, eŋe sari Yesu qesonka rakoi, “Naso dango Kaisale eŋe sari kepe warekayake?” Yesu eŋe mainge rake, “Kaisale eŋe waremaike, eya ŋine maine mi kaikei, so.

²¹ Ŋei maneŋo mi rayake, ‘I, kau!’ me, ‘Yewa pamaike!’ Kaisaleŋo qeli ewine ŋinane wetŋine so koto ŋino yemo, mo sarike ware-ŋunmaike so baŋ rokop-ŋune geyake.”

²² Pakiso Yesu eŋe dokoine edange, “Boaŋ ŋine Ŋei Wawainane Gipole nasoine kaikei wane wetkekei, ŋo ŋine mi kaikei.

²³ Ŋei natne ŋinano sari ŋidanikei, ‘Ŋine eriwa kau!’ me, ‘Ŋine iwa kau!’ ŋo, ŋine mi kaikei.

²⁴ Qilapŋo naso natne walatake wamaike, so naso natne qeli korop kilitikmaike, Ŋei Wawainane Gipolane nasoine eŋe qilap yale ikopka wakoniyake.

²⁵ Ŋo alakane eŋe wikile suwaine detki, so ŋei ŋerep eŋe ŋadekkaikei.

²⁶ Kine kine Noa wane nasoo wakonge, eya korop Ŋei Wawainane Gipolane nasoino wakoniyake.

²⁷ Noa wane nasoo eya, ŋei ŋerep korop ŋara doku soep ne more, zokit makoi, nasoine yale ari mage ari mageki, so Noa eŋe sekiwo kaiwe mane waketki, doku qakumŋo ket more ŋei ŋerep korop enguki seukwarekoi.

²⁸ Kine kine eya Lot wane nasoino wakonge, eya korop Ŋei Wawainane Gipolane nasoino wakoniyake. Lot wane nasoo ŋei ŋerep eŋe ŋara soep ne more, aboŋ qole more eu ebore more, mat makoi.

²⁹ Pakiso Lot eŋe kaiwe mane Sodom qeliŋgi, so naso yewao gerep so wesi bolamineropŋo kere more, ŋei ŋerep korop enguwi seukwarekoi.

³⁰ Boaŋ Kaisaleŋo Ŋei Wawainane Gipole ma qelaŋankayake, naso eyaŋo Lot wane nasoo wakonge yale okaniyake.

³¹ “Naso yewao, ŋei mane eŋe mat sekaino mere more, mat koto mi wa more kine kineine natne mayake, eŋe yeine qelige kaet ariyake. Yalewaka ŋei mane eŋe euwo ge more, matko koso mi zinge ari kine kineine eya mayake, eŋe yeine qelige ket ariyake.

³² Ŋine Lot wane ŋanominane don kisi eya dere detsorokpi, eŋe deineŋo potki ŋadino Sodom mat suwaino ariki kaki paki seukke!

³³ Ŋei mane eŋe naŋane ra more wikilane kaet kaki, solaine ma waulukeyakeo, eŋe gege togon wane numaine korop siukka-lukeyake, ŋo ŋei mane eŋe naŋane ra more seukeyake, ŋei yewa eŋe gege togon marat kayake.

³⁴ Na ŋidanmaile, Ŋei Wawainane Gipole nasoine, ruwo yewao ŋei etke ere mat wekuwoka kulu paut, Kaisaleŋo ŋei weku ma more, ŋei mane qeliŋkayake.

³⁵ Ŋerep etke ere ŋara soige metpik, Kaisaleŋo ŋerep weku ma more, ŋerep mane qeliŋkayake.

³⁶ Ŋei etke ere euwo uratao geuk, Kaisaleŋo ŋei weku ma more, ŋei mane qeliŋkayake.”

³⁷ Yesu eŋe yale raki qoeki, so dokoine eŋe qesonka rakoi, “Kine kine eya ramaine, diyao wakoniyake?” Yesu eŋe mainge rake, “Kine kine seuseune pareŋ pamaike, naso yewao gawe naŋi eŋe ari lewaŋmaŋkei.”