Luka 1 - Ono

Lukaŋo Yesu Wane Donkisi Teopilus Qe Mange

¹ O, Teopilus suwainene. Mokaka ŋei loutne eŋe Kaisaleŋo kine kine wele maki keuzo wakonge, eya wane don kisi tegoke more qekoi.

² Don kisi yewa mo ŋei weneŋ osop ge more, deene qomineŋo alakan wakongi, kinerop ka detka okangoi, eŋe ŋedangoi. Ŋei eyao kine kine one more, Kaisale wane kisi maep don ra qelaŋangoi.

³ Pakimo noŋo yalewaka mo kino ŋineka kine kine wakone sarike, eya wane bororom ra qeson okane, kine dere detluk kawarewe, pakimo koso ge iwa sorok sorok qetitike qe ginmaile.

⁴ Pakimo, ge iwa dapore more, iwa yale detnom qoeyake. Eŋe kito gingoi, yewa mo kine kine wele!

Aŋeloŋo Yohane Wakoniyakane Zekaraiya Olatke

⁵ Naso Herot eŋe Yuda kepeo ŋei waom geke, yewao mosop ŋei mane geke, eŋetine Zekaraiya, eŋe mosop ŋei Abiya wane tegoo ŋine. Ŋanom-inane eŋetne Elizabet, eŋe yalewaka mosop ŋei tego eŋano ŋine.

⁶ Ere Kaisale wane kaitko gegeetne koboboine geuk paki, Waom wane ra rokop donine koropka tewekkoik.

⁷ Elizabet eŋe qaton gekane ere medewe-kopetne midaine ge mage, ŋei ŋerep sele okangoik.

⁸ Naso maneo, Zekaraiya wane nasoo, eŋe Kaisale wane Bakom Urumgo urataine mayakane sarike.

⁹ Sarikiso, mosop ŋei korop urataine welaine welaine maikei wane okane weneŋ sarikoi, pakiso, Zekaraiya eŋe kopu qounerop kiwakeyakane rakauso Kaisale Wane Bakom Urum kotino waketke.

¹⁰ Waket more, kopu qounerop kiwakki, so ŋei ŋerep magu eŋe ŋadino Kaisale meŋenka gekoi.

¹¹ Pakiso, Waom wane aŋelo maneŋo wakone more, kopu qounerop kiwa kiwak, eya wane zake nat paromino won-goken yewa okorake.

¹² Okorakiso, Zekaraiyaŋo kaki paki qise more, ikki kito qokkake.

¹³ Yale okangimo, aŋeloŋo iwa yale olatke, “Zekaraiya, ge mi kaet-gangep! Kaisaleŋo meŋe meŋenŋone mo detke, eya wane mo ŋanomŋone Elizabetŋo medep ŋatke more mayake, eŋane eŋetine Yohane orakene.

¹⁴ Ge eŋane wet pesek dere more bakom kitokene, so ŋei ŋerep korop eŋe yalewaka wakongi dere more simile oniyake!

¹⁵ Eŋe Waom wane kaitko ŋei suwaine okane geyake, eŋe wain so doku togole mi neyake. Eŋe medep abubuka paki Asu Koboboineŋo eŋane kotino ket more geyake.

¹⁶ Pakimo, eŋe Israel ŋei ŋerep korop mainongi, koso zinge more Waomene Kaisale, kaitno kitokei.

¹⁷ Kaisale wane don sae ŋine rara ŋei, Elaiya wano Asu so zonom pake, rokop yalewaka pa mangi, eŋe Waom modatka alakane geyake, pakimo, ŋei ŋerep suwaine so medep nigatne eŋane wetene maton tolaki weku okaniyake, so wet togon ŋei eŋe main-ongi, koboboine eŋane numao waketkei. Yale okangimo, eŋe Waom wane ŋei ŋerep okane korop ka eweke more gekei.”

¹⁸ Rakimo, Zekaraiyaŋo aŋelo olale rake, “Na daleo don iwa ramaine, eya detpe wele okaniyake? Na mo ŋei sele okanmaile, so ŋanomne eŋe yalewaka sele okanmaike.”

¹⁹ Rakimo, aŋeloŋo iwa yale olatke, “Na Gabriel, na Kaisale wane kaitko ge okanmaile, na oŋom talenangi sari, qom menaŋ don iwa golatmaile.

²⁰ Pakimo, ge naŋane don detnom wele mi okangi, detlukmaine, eya wane turuŋine ge qelaŋ okane more, don raraŋone midaine genom, don golatmaile, iwa wele wakoniyake.”

²¹ Zekaraiya eŋe Kaisale wane Bakom Urumgo yale okane geki, ŋei ŋerep eŋe naso kiroine tomaka more kinane ŋaŋaekoi.

²² Zakariya eŋe Kaisale wane Bakom Urumgo ŋine saket more don edaniyakane ŋaŋaeke, eya wane eŋe mo wetke rakoi, eŋe tanik mane Kaisale wane Bakom Urumgo wakongi kake. Pakiso, eŋe don edaniyakane ŋaŋaeso metineŋoka kait masi ma okanonge.

²³ Yale okane geki urumgo urata mama nasoine qoekiso, Zakariyaŋo matino zinge arike.

²⁴ Pakiso ŋado ŋanomine Elizabet eŋe medep ŋatkeke. Ŋatke more, siu siuko geki, meso mete mane qoekiso rake,

²⁵ “Waomŋo naso motke, yewa bomileki qesiŋnane more, gamune yewa ŋei ŋerep eŋane kaiteno ŋine ma biraki ariyake!”

Aŋeloŋo Yesu Wakoniyakane Mariya Olatke

²⁶ Meso 6 qoekiso, Kaisaleŋo aŋelo Gabriel talekaki, Galili kepeo Nazaret matko arike.

²⁷ Eŋe ari more ŋerep natewen mane eŋetne Mariya, ŋei mane eŋetne Yosep, eŋane biŋek qeu geke, eŋano lotkeke, Yosep eŋe ŋei waom Dawit wane tutule.

²⁸ Pakimo, aŋeloŋo Mariya wano wakone more rake, “Peyamŋo gerop payake! Waomŋo gerop gemaike so suwaineka mosop ganmaike!”

²⁹ Aŋeloŋo don yale rakimo, Mariyaŋo detki qekaki wetneŋo iwa yale wetkeke, “Don iwa onoka wane nolatmaike?”

³⁰ Pakimo, aŋeloŋo olale rake, “Mariya ge misuk kaet gangep, Kaisaleŋo gangi menaŋmaike.

³¹ Detmaine, ge medep ŋatke more manom paki, eŋetne Yesu orakene.

³² Eŋe baŋ ŋei kakapa suwaine okaniyake, pakimo, eŋe baŋ eŋetine qeliwo Kaisale Wawaine eŋane Medep orakei. Pakimo, baŋ Waom Kaisaleŋo ŋaboine Dawit yale, ŋei waom birakaki geyake.

³³ Ge more, Yakop wane ŋosa wili wiliine eŋane ŋei waom okane, qoi qoine midaine wareone tako rakot ge ari more geyake!”

³⁴ Rakimo, Mariyaŋo aŋelo iwa yale olatke, “Na natewen, ŋeirop mane mi gemaile, yalinane-mo ge don ramaine, yewa daleo wele mosiyake?”

³⁵ Aŋeloŋo done turuŋine mainge rake, “Asu Koboboineŋo geŋane kutko kesiyake, so Kaisale wane zonomŋo geŋano ket more qesiŋ ganiyake, kine yalewa wane medep koboboine maikene, eŋane eŋetne baŋ Kaisale wane Medep orakei.

³⁶ Detmaine, kimaŋone Elizabet eŋe ŋerep seleŋo medep ŋatke geki, meso 6 okanmaike. Eŋe ŋerep qaton, yale ora ra okanmami, ŋo eŋe siluŋ medep ŋatkemaike.

³⁷ Kaisaleŋo kine kine mane okaniyakane mi qekayake.”

³⁸ Rakiso, Mariyaŋo rake, “Na waom wane qelit ŋerep, eya wane ge don ramaine, yale okan-naniyake.” Yale rakiso, aŋeloŋo arike.

Mariyaŋo Ari Elizabet Kulitka Ari Kake

³⁹ Mariya eŋe geki, mi azongi ikopka eweke more, Yuda kepe bonagaino mat mane metke, yewa arike.

⁴⁰ Ari lotke more, Zekaraiya wane matko wa more, so Elizabet kaki pakiso, oi bakom okankake.

⁴¹ Elizabetŋo Mariya wane oi bakom yewa dere metkiso, medepŋo yewaka mo eya ŋatino uŋap make, pakiso Asu Koboboineŋo Elizabet wane kotino watkeke.

⁴² Pakiso, Elizabetŋo mawaka so don iwa yale rake, “Ŋerep kimaze, geŋane mosop korop yewaŋo ŋerep natne eŋe yuwan-onwaremaike, so medep ŋatŋono metmaike, eŋe yalewaka mosop korop.

⁴³ Onoka maepnane, Waomnane nagaineŋo nanikenane sarimaine?

⁴⁴ Oi bakom okan nannom, ketno ketki ŋatno medepŋo uŋap mamaike, so bakom kitomaike.

⁴⁵ Ge wet pesek suwaine okanmaine, ge Waom wane kisi maep don golatke, yewa detnom wele okange, eya wane wele geŋano wakoniyake.”

Mariya Wane Bakom Eŋet

⁴⁶ Mariyaŋo rake, “Qomneŋo Waom mawa kamaike,

^47-49 Kaisaleŋo mauluk nanmaike, eŋe qelit ŋerep meine ket qeqine naŋane wetkemaike, eya wane oŋa oŋaneŋo wet pesek okanmaike. Togole welaine Kaisaleŋo masi kakapa naŋano mamaike, eya wane ukude so baŋ ŋado ŋei ŋerep kepe korop maguine maguine eŋe na nora baŋ bakom okan-nangei, ‘Kaisaleŋo mosop-nange.’ Kaisale wano eya wane eŋane eŋetine koboboine.

⁵⁰ Ŋei ŋerep eŋe Kaisale ewine kito okanmami, eŋe enŋene so eŋane doko ŋosa wili wiliene wet maep ebon mageyake.

⁵¹ Eŋe kabirimine togogoleka bira more, ŋei wawaine ge okanmami, esop-ongi yau yaup ari okanmami.

⁵² Eŋe ŋei waom togogole met meteno ŋine maket biraone more, ŋei ketlele gemami, eŋe ebu wa meŋo biraon okanmaike.

⁵³ Bodi so aboŋene midaine ge okanmami, eŋe kine kine mayakatne qe watke ebon okanmaike. Ŋo riwe moriyan so aboŋ enerop ge okanmami, eŋe yemo esop-ongi, eŋe meteeneka qeliŋka ari okanmami.

⁵⁴ Eŋe ra rokop donine ŋabo-kopze eŋano ra togoleke, yewa ware kamaike, eŋe qelit ŋeiine Israel qesiŋ kamaike.

⁵⁵ Eŋe ŋaboze Abraham so eŋane doko ŋosa wili wilikoune, eŋano wet maep ebone ariyake.”

⁵⁶ Mariya eŋe meso karewe Elizabet korop geki, pakiso koso zinge matino arike.

Yohane Wakonge

⁵⁷ Elizabet eŋe nasoine bomilekiso, medep ŋei make.

⁵⁸ Pakiso, Elizabet matkoune so weŋem sota-wekoune eŋe kisiine eya dere so Waomŋo wet maep-inane kine eŋano ma wakonge, eya wane dere so eŋerop weneŋ bakom kitokoi.

⁵⁹ Kaiwe urata mama 8 qoekiso, eŋe lewageu, medep-inane yaine solaine kitatkoi, pakiso, medep wane eŋetne magaine Zekaraiya wasekakei wane rakoi.

⁶⁰ Rauso, naga-ineŋo kitatone more rake, “Mida! Eŋetine Yohane orakene.”

⁶¹ Yale rakiso, eŋe olale rakoi, “Mame aso-kopŋone eŋane wase wase eŋet mane yale mi pamaike!”

⁶² Ra kito qok yale okanmage, so magaine meteŋoka kait masi okanka more, medep eŋetne orayakane qesonkakoi.

⁶³ Pakiso, Zekaraiya eŋe tape wane raki manbiso, iwa yale qeke, “Eŋetine Yohane.” Pakiso, eŋe korop qise nagukoi!

⁶⁴ Mi azongiso, Zekaraiya maine mo menaŋge, paki don raraine wakongiso, Kaisale eŋetine ma wakake.

⁶⁵ Pakiso, mat loli lolik ŋei ŋerep gekoi, eŋe don kisi yewa detpi kaet-onge. So Yuda kepe meŋo-ino mat mere arike, yewao don kisi yewa weneŋ aŋaŋo aŋa auye okan warekoi.

⁶⁶ Don kisi detkoi, ŋei ŋerep yewa eŋe don kisi yewa wetke ge more qesone rakoi, “Medep yaline suwa more daleo okaniyake?” Eŋe mo detkoi, Waom wane zonomŋo mo kutno wa pake.

Zekaraiyaŋo Don Naŋengo Rake

⁶⁷ Asu Koboboineŋo Yohane magaine Zekaraiya wane kotino ket watkeke, paki eŋe Kaisale ma waka more, iwa yale rake,

⁶⁸ “Ŋene Waom ma wakaŋem, Israel wane Kaisale! Eŋe sariki paki, ŋei ŋerewe-koune qesiŋ onmaike, eŋe koso siwot-onmaike.

⁶⁹ Qelit medeune Dawit wane ŋabokoune ŋenane keuwo ŋine, ŋei togogole mane ma wakonkaki, oŋo baŋ mauluk-oniyake.

⁷⁰ Eŋe mokaka propet, qelit ŋeikoune koboboine, eŋane aŋa piwoka edangi, don ŋenzo ra gekoi,

⁷¹ baŋ ŋabakopze eŋane meteeno ŋine koso main-ŋongi zingekene, so ŋabaŋone more qaisik-ŋon okanmami, eŋane meteeno ŋine makok ŋoniyake.

⁷² Ŋabo-kopze eŋerop tako rakot togon koboboine okaniyakane detongi, paki masi wet maep mayakatne eŋano okan-oniyake.

⁷³ Eŋe ŋaboze Abraham ra togole mangane, ŋabakopze eŋano ŋine makok ŋoniyake.

⁷⁴ So det-ŋongi, kaetze midaine qelitine qekene.

⁷⁵ Paki, eŋane kaitko kepeo gekene, rokop naso baŋem sot turuŋze midaine koboboine gekene.

⁷⁶ Medepne, ge eŋe baŋ Kaisale Wawainane qelit ŋei gorakei, goŋo baŋ Waom wane ŋetne kisage alakan-gene, eŋane numaine lapon-genane.

⁷⁷ Goŋo baŋ ŋei ŋerewe-koune kito ebon okannom. ‘Kaisaleŋo eŋane sotene nigetkaki qeliŋ-oniyake, yale okane more mauluk-ŋuniyake.’

⁷⁸ Kaisaleze eŋe wet maepine suwaine pa manmaikane baŋ raki, wet maepine eya kepe qae qae yale qelaŋan-ŋoniyake, so wet maepine eyaŋo eŋe mauluk ŋongi menaŋgene.

⁷⁹ Kaisaleŋo qeliwo ŋine qelaŋanine maki sirike, seuseu wane panaman ruwitko gemami, yewa qelaŋan-oniyake, pakimo, sikan-ŋongi, peyam wane numa wakongi, maine gesoke arikene.”

⁸⁰ Pakiso, medep eŋe suwakiso, Waom wano dereret-ineŋo yale waka suwake, eŋe kepe yaup papaino gemageki, urata mamainane naso bomilekiso, Israel magu eŋano wakonge.