Galatiya 6 - Ono

Ŋene Qesi Qesiŋnagu More Umatze Tewekkene

¹ Kimakopne, ŋei maneŋo borikine kine kine mane maki, ŋine Asurop gemamiŋo wet peseko bororom borikineine, eya ma koboe kaikei. So Ŋei Borikineŋo ŋine weneŋ sot marat-kaikei wane liwek-ŋuniyakane, ŋine yale waka gege ŋinane diyam ma ware kaulukkei.

² Qesi qesiŋ okan-nagu more maneŋo mane wane umat-ŋine yewa maine weneŋ qesiŋ-nagu tewekkei. Yalewa oken okangeiwo, yemo ŋine Kristo wane ra rokop don yewa maine tewekkei.

³ Ŋei mane eŋetine midaine eŋe rayake, “Na eŋetne weneŋ,” yale rayake, eŋe oŋomka isi-naguyake.

⁴ Ŋei korop eŋe urataene maine me mida, yewa eŋe edomka dere wanok me dere detsorok okanikei, ŋei eŋe yale wa okane more, eŋe oŋom maine okanmaike, me mamaike, yewa wane oi bakom okaniyake. Ŋo eŋe ŋei natne eŋane tanik manik-enerop eŋine, eya dere wanok me dere detsorok misuk okaniyake.

⁵ Eya yemo iwa yale wane ŋei korop eŋe umatene so tanik manikene yewa eŋe bonep bonep edom tewekkei.

⁶ Ŋei mane ŋinane keuwo ŋineŋo Kaisale wane kisi maep don kito ebon okanmaike, ŋine ŋei yewa eŋe aboŋ kine kine ŋine bile natne damo qe mapoke, kito ebo ebonŋine yewa kito qesiŋ okane manikei.

Gege Magezane Rokop Wele Baŋ Maratkaikene

⁷ Ŋine ŋidomka misuk isi nagukei. Ŋei maneŋo Kaisale maine mi isi kayake. Ŋei mane eŋe ŋara mane mesiyake, metki ŋara tanik weku yewa-ŋoka euwino wakongi, eŋe ŋado koso ŋara eŋet mane mi maratka more, eŋe eŋet weku yewaka lokakeyake.

⁸ Ŋo ŋei mane eŋe gege soginane numa mogare mo borikine kine kine ma nogan kayake paki, eŋe gege soginane numa me tanik manik mamaike, yewa wane weleine, eŋe seuseu marat-kayake, ŋo mane eŋe Asu wane numa so tanik manik mogas-yakeo, eŋe Asu wane weleine gege togon maratka more naso baŋem geuluke ge ariyake.

⁹ Eya wane ŋene kine kine maine okanikenane, me makenane bau wawa misuk okanikene. Ŋene qewoloŋ mi okanikeneo, yemo boaŋ gemage, Kaisaleŋo naso motke, bomileki asu oŋa oŋa-zane moriyan mayakatne marat-kaikene.

¹⁰ Yalinane, ŋene keune natne numa maratka more wakongi, yemo naso baŋem ŋei korop kine kine bile so maineka ma masuluk onikene, so kimakopze mali malip-eneŋo Waom malipka gemami, eŋane weneŋ dere more, togogoleka kine kine mayakatne kito qesiŋ okan-onikene.

Pauloŋo Galatiya Ŋei Ŋerep Girem Don So Mosop Don Edangi Qoeke

¹¹ Ŋine kibine suwaine iwa kau, na nae meteneŋo ŋinane qemaile.

¹² Ŋei natne eŋe mawa naguwi paki, solaŋine kitasikei wane qebin-ŋunmami, eŋe yewa okanmami, yemo weku iwa yale wane, eŋe Kristo kibeŋinane ra more wikile kuteno mi wayakane kaet okane more, yale okanmami.

¹³ So ŋei solaene kita kitatne, eŋe yalewaka Yuda wane ra rokop don yewa mi tewek okanmami, eŋe yemo yaup ŋido solaŋine kitare more, eŋano takotkeu enŋene mawa nagukei wane detpi paki, yale okan okanmami.

¹⁴ Ŋo na, na yemo kine kine mane eya me eya wane eŋetine ra more mi mawa kaikale, na yemo weku, Waomze Yesu Kristo wane kibeŋ-inenane kisi maep yewa waneka mawa-kaikale, Kristo wane kibeŋ-inane ra more kepe wane masi tanik naŋano, eya mo korop seukwareke, ŋo na yale-waka kibego kepe wane masi tanik wane ra more, mo noŋom weneŋ seukkole.

¹⁵ Ŋei solaine kita kitatne, me ŋei solaine mi kita kitatne yewa eŋe yale-waka wele mi okanmaike. Gege sogine qelige, gege musele koboboine maikei, gege yewaŋo yemo wele okanmaike.

¹⁶ Qaŋa so boŋ yewao okoramami, rokop ŋeiwa wet dereret-eneŋo don iwa ekap kotino malipka more, gege-eneŋo yewa mogare gemami, eŋano peyam, so qom pesek, so wet maep, eyaŋo eŋerop pa rokopke pa wareyake! So Kaisale wane ŋei ŋerep magu wele Israel eŋano weneŋ korop pa wareyake!

¹⁷ Na ekap iwa yale qewe qoeyake, ŋei maneŋo umat koso manerop misuk niniyake, onoka wane, na Waom Yesu wane lopotŋo solano paki magemaile, eyaŋo ŋei ŋerep eŋe iwa yale sikan-onmaike, “Eŋe welekatne Kristo wane ŋei koboboine.”

¹⁸ Kimakopne, Waomze Yesu Kristo wane mosopŋo maine ŋinane asu ŋino pa warekep! O, weleka!