Aposolo 27 - Ono

Paulo Roma Ariyakane Eŋe Seki Make

¹ Ŋene seki ma more, Itali arikenane don mo ma togolekoi paki, eŋe Paulo so mulap ŋei natne, eya kawali ŋei (100) zaleene yalewaŋo eŋane ware ware ŋetne, eŋetine Yulius, eŋane meteo biraongoi, kawali ŋei yewa eŋe Sisa wane magu.

² Ŋene Adramtium eŋane seki mane eŋe Isaiya mat suwaine eya wane sawekino ariyakane okangi, so ŋene yewa wane kutno sontake wakone, pakiso qoe arikone. Aristarkus eŋe Tesalonaika matko, Makedoniya kepeo ŋine, eŋe ŋenerop weneŋ arikone.

³ Kaiwe maneo ŋene ari, Saidon eya lukkone, yewao Yulius eŋe Paulo masi maine okankake, paki Paulo eŋe ari kimakoune one more, eŋano ŋine ŋara kine kine maratkake.

⁴ Ŋene Saidon qelige ariŋem, momoŋo qebin ŋonge, eya wane seki eŋe wa Saiprus ŋadino arike.

⁵ Eya wane, ŋene Silisiya so Pampiliya kiwet osoetno yewaka kiwet kitare sari, Lisiya kepe wane mat mane, eŋetine Maira, eya lotkeyakane.

⁶ Mat yewa wane kawali ŋei eŋane ware ware ŋetne kapten mane, oŋo Alekzandriya eŋane seki mane, Itali ariyakane okange, eŋe maratka more, so ŋebu ari seki yewao biraŋongi wakone.

⁷ Paki ŋene eya ŋine qoe more, seki yewa eŋe bororom bororom ariki, eya qeka geŋem naso natne midake, paki ŋene urata suwaine ma sari mage, Nidas mat osino lotkekone, paki momo suwaineŋo numa leŋŋongi, koso arikenane numaze mi lotkeki, ŋene Salmone osino Krit siya ŋadino lolike arikone.

⁸ Eŋe urata suwaine mau, Krit sawek qe kororoŋ mogare gemage, baŋ mat mane eŋetine, Seki Wake Waket Maine, eya ari waketkone, eŋe Laseya mat suwaine osino.

⁹ Ŋene naso kiroroine yewa metkone, met mageŋem takotke numa ari ari, eyamo zok kiwet borike, onoka wane naso yewao Yuda eŋane Tau Qe Met Met naso eya mo yuwange. Eya wane Pauloŋo edane rake,

¹⁰ “Ŋei nau, na kamaile, yemo ŋenane numaze iwa ŋine koso arikene, eyamo baŋ kakarauk kaikene, eyamo baŋ aboŋ korop so seki weneŋ mataliyake, so ŋei gegeze weneŋ midayake.”

¹¹ Ŋo kawali ŋei eŋane ŋetne, eŋe seki ware ware so seki welaine erane don dere malipkake, ŋo Paulo wane don eya yemo mi malipkake.

¹² Ŋo momo nasoo sawek yewao seki okora okora wane zake mat maine mida, eya wane ŋei loutne seki kutno metkoi, eŋe eya qelige more maine ari Piniks lotke more, mat yewao mesikei wane ra togolekoi, onoka wane momo suwaine puwange, eya wane, Piniks eya yemo Krit wane sawek mane seki okora okora wane basis maine. Qekatno wane momo maine mi puwaniyake.

Dibom Suwaine Wakonge

¹³ Rai momo lup luwine kiyeke puwangi, so eŋe rakoi, ŋene don tegoze au more pisekone, eya maine teweke okangene, eso eŋe aŋka warageu waki, so seki mau qalak mogare Krit siya osino arike.

¹⁴ Ŋo mi azongi momo togogole mane “Yawara,” oramami, siyao ŋine puwangi ketke.

¹⁵ Ket eyaŋo seki qe main qein maki, so sekiŋo momo oken ariyakane kop mi okange, ŋene eya maŋem ariyakane, eyamo yeine qeliŋgone pakiso, momoŋo tewekŋone arike.

¹⁶ Ŋene siya nigatne Kauda yuwane raiwoken arikone, yewao ŋene qekatne natne marat kakone, yewa ŋene qeka maka natne weneŋ maratka more, seki wane digi mulapŋo lukkone.

¹⁷ Eŋe digi eya waraŋkau, seki kutno waki so mulap natneŋo makatake sekiwo walipka more pisekoi. Eŋe sekiŋo Libiya wane saweko kiwet meuno wa soŋageyakane kaetonge, eso eŋe seli mau ketki so seki qeliŋkau, momoŋo qebinkaki arike.

¹⁸ Momo suwaine takotke qeki, dibom suwaine, eso kaiweine maneo yemo eŋe kiyeke, seki wane aboŋ qakeu kiwetko ketke.

¹⁹ Pakiso kaiwe karewe yewao eŋe seki wane mulap so aboŋ natne enŋene metenenŋo ma qakeu kiwetko ketke.

²⁰ Kaiwe loutne ŋene kepe deine me serekin mane mi kakone, so momoŋo takotke togogole puwange, naso yewao ŋene waetne arikenane wetkekone, ŋo koso seukkenane weneŋ detkone.

²¹ Urata ŋei eŋe ŋara mi nene naso kiroine yaup tau gekoi, ŋado Pauloŋo ŋei kaiteno wiye okora more rake, “Ŋei nau, ŋine naŋane don maine detpi rap, paki ŋene Krit siya mi qelige sariŋem rap, yemo ŋene kakarauk korop iwa so aboŋ, eya mi mataliŋem rap,

²² Ŋo, na iwa qebin ŋunmaile, ŋine togoleu, ŋinano ŋine maneŋo gegeine baŋ mi qeliŋgi siukeyake, sekiŋoka weku yemo baŋ siukeyake.

²³ Na Kaisale wane urata ŋei, na eŋane ewine kito okanmaile, yatne ruwoo Kaisale wane aŋeloŋo naŋano sari more, nolale reke,

²⁴ ‘Paulo, ge misuk kaet ganiyake, ge Roma gavaman ware ware suwainane kaitko siluŋ okorakene, so Kaisale eŋe eŋine wet menaŋinane okanmaike, eya wane eŋe geŋane ra more, ŋei korop seki koto gerop gemami mapik oniyake.’

²⁵ Eya wane, ŋei nau, ŋine togoleu! Na Kaisale malip kamaile, eŋe don kine kine nolalike, eya wane rokop baŋ korop mayake.

²⁶ Ŋo momoŋo ŋene baŋ puwan ŋongi, qalakko siya natne mane waikene.”

²⁷ Ruwo 14 okangiso, momoŋo ŋenane seki qebinkaki, Meditereniyan kiwetko wawa ket ket lolike pake. Ruwo banino, seki wane urata ŋei eŋe detpi, ŋene kepe osino lotkekone, yale okange.

²⁸ Eya wane eŋe wesi mane mulapko luke kiwetko birau ketki, koso warageu saki mulap darapŋo kiwetko ketke, eya dapotkoi. Mulap wane kiroineine eya 40 mita. Nigatne ari ari more, eŋe mulap eya koso kiwetko birau ketki, koso warageu saki dapotpi, 30 mita yale okange.

²⁹ Ŋenane sekizeŋo karabaŋ kutno wayakane eŋe kaetonge, eso eŋe aŋka etke so etke (4) ŋadino ŋine biraonbi ketkoi, pakiso kepe qaeyakane meŋenkakoi.

³⁰ Seki wane urata ŋei eŋe sekiwo ŋine kaet arikei wane okane, eŋe digi mane qei qoroŋ qoroŋ kiwet kutno ketki, isione more rakoi, eŋe aŋka natne seki sotno ŋine birau kiwetko kesikei,

³¹ Ŋo Paulo eŋe one more kawali ŋei ŋetne so kawali ŋeikoune edange, “Seki wane urata ŋei eŋe seki kutno mi mere more seki qeliŋ kaikeiwo, ŋine korop seukkei.”

³² Yale raki, so kawali ŋei yewa eŋe digi wane mulap kitatpi paki, qeliŋkau arike.

³³ Kepe mo qaeyakane okangi, Paulo eŋe ŋei yewa edo ŋara nekei wane raone rake, “Ŋine toma sari mageu, mo kaiwe 14 ukude lelemaike, eya wane na ra ŋunmaile.

³⁴ Na ŋine meŋen ŋunmaile, ŋine ŋara natne neu, ŋinane leweŋine zoune mane baŋ mi siukeyake, wikile mane mi desikei.”

³⁵ Paulo eŋe yewa raki qoeki, ŋado kasap natne ma more eŋane kaiteno korop Kaisale bakomine kito more, eya mapokke paki, kiyeke neke.

³⁶ Pakiso eŋe korop zonomene motki, yaleka ŋara natne nekoi.

³⁷ Ŋene ŋei korop 276ŋo seki kutno gekone,

³⁸ Ŋei korop ŋara neu rokop ongi, so ŋado sekiwo ŋine wit peike qakeu kiwetko ketki so seki ewekke.

Seki Qalakko Borike

³⁹ Pakiso kepe qaeki, seki wane urata ŋei eŋe kepe yewa mi detkakoi, ŋo eŋe sotne mane qalakine weneŋ pake, eso eŋe dere rakoi, maine yale okaniyakeo, yemo ŋene seki maŋem qalak yewao kere kitoyake.

⁴⁰ So naso yewaoka eŋe aŋka etke so etke eya wane mulap kitatkoi, so mulappa dama dama malipkaki mainge okanmaike, eya siwot warekoi. Pakiso eŋe seli abonbi, sotno waki, so momoŋo puwane seki qebinkaki arike, paki qalalage qalakko arike.

⁴¹ Ŋo seki eŋe lawao wa qe more, qalakko soŋage metke, seki sotne eŋe makatake metki, mau mi qoe weteke, eyaka dibom suwaineŋo seki kainoken eyamo rasipokki, din bun wiri ket arike.

⁴² Kawali ŋei eŋe mulap ŋei korop engu wareu, eŋano ŋine maneŋo kaet logone qalakko mi ariyakane wetkekoi.

⁴³ Ŋo, kawali ŋei ŋetne eŋe Paulo loloŋ kayakane wekeke, eso eya wane eŋe ŋeikoune yewa mi okanikei wane rawetonge, eya wane turuŋine yemo eŋe ŋei korop logo logon wane kine detkoi, eŋe alakane sontake kiwetko ket more, logone ari qalakko wakei wane edange.

⁴⁴ Wele korop eŋe palaŋ kutno so seki wirike, eya wane eki sisine eyaoka more qesuŋka more, logone arikei wane edange, ŋene yalewa okane more koropŋo maineka qalakko ket warekone, ŋo ŋenano ŋine maneŋo mane mi siukke.