Aposolo 14 - Ono

Paulo So Barnabas Ere Ikonium Matko Urata Makoik

¹ Masi kine kine korop Antiok wakonge, yale waka Ikonium matko wakonge. Paulo so Barnabas ere Yuda eŋane lewa lewaŋ urumgo ari ŋei ŋerep edangoik, eya wane Yuda ŋei ŋerep so qelaŋ ŋei ŋerep Yuda ŋadino eŋe loutneŋo mali malip korop okane, Yesu mogatkakoi.

² Ŋo Yuda ŋei ŋerep Yesu mi mogat kakoi, eŋe qelaŋ ŋei ŋerep Yuda ŋadino mali malip ŋei ŋerep magu gekoi, eŋe kimakopene ŋaba okan onikei wane wetene qepoke qebinongoi.

³ Aposolo ere soda loutne Ikonium ge more Waom wane ra more kaet midaine togoleka don maine edangoik. Waomŋo ere qesiŋotki so ere masi kine kine togole mauk, eya wane Waom eŋe ŋei ŋerep wetineŋo malipone more sikanonge, aposolo ere kisi maep Don eya ra qelaŋan-ongoik.

⁴ Mat welaine eŋe wet etke okangoi, ŋei ŋerep natne eŋe wiri Yuda tego mogat ongoi, ŋo ŋei ŋerep natne eŋe aposolo ere mogat otkoi.

⁵ Pakiso, ŋei qelaŋ Yuda ŋadino, so Yuda ŋei tego natne eŋe suwaine kopene eŋerop aposolo matali ore more wesiŋo etkuwi seukkeik wane rau togoleke.

⁶ Rauso aposolo ere don eya dere more Listra so Derbe matko, Likaoniya kepeo kaet arikoik.

⁷ Ere kepe yewao Kaisale wane kisi maep don, eya ra qelaŋan ongoik.

Paulo So Barnabas Ere Listra So Derbe Matko Arikoik

⁸ Listra matko, ŋei mane kine qotkoine eŋe nabok kotino ŋine mo yaline sarike, paki eŋe numa mane mi geke.

⁹ Eŋe met met ka mere Paulo wane don detke, Paulo eŋe ŋei eya detlukkake, ŋei eyaŋo Paulo wane don dere malip kake, eya wane Kaisaleŋo eŋe maine ma menaŋkayake, eya wane Paulo eŋe yale dere more ŋei kine qotkoine eya pore kalilipka,

¹⁰ so boka olatke, “Ge wiye koboine kiyeŋone kutno okoranom!” Ŋei eya eŋe kaŋzage wiye more kiyeke gesoke lolike arike.

¹¹ Pakimo, Paulo eŋe masi eya maki wakongi, ŋei ŋerep eŋe ka more, enŋene Likaoniya donenoka kiyeke boka rakoi, “Kaisale eŋe ŋei yale lele more ŋenano sarimami!”

¹² Ŋei ŋerep eŋe Barnabas wane Waom mane Zeus orakoi, ŋo eŋe Paulo wane Waom mane Hermes orakoi, onoka wane Hermes eŋe Zeus wane don ra qelaŋangi detkoi, eya wane.

¹³ Waom mane, eŋetine Zeus, eŋane matine mat suwaine ŋadino pake. Zeus wane mosop ŋei eŋine so ŋei ŋerep eŋe aposolo erano bulamakau ŋei so zariŋ peike, mat wane madetko ma sarikoi, eŋe so ŋei ŋerep magu eŋe aposolo bakom okan otkei wane.

¹⁴ Pakimo Barnabas so Paulo ere ŋei ŋerep eŋe daleo okangei wane okangoi, eya wane similene detluke more, ma waluk-ongeik wane, takot lap lap etne ma barake more, biririke ari ŋei ŋerep magu keuweno boka ari rakoik.

¹⁵ “Onoka wane kine kine iwa mamami? Ŋere kepe ŋeika, ŋere ŋine yaleka! Ŋere ŋine kisi maep don, eya ŋidaniketane sarimaite, ŋine Waom isisine eya ŋadekka more, zinge Kaisale gege welaine eŋane kaitko gekei. Kaisale gege welaine eŋe qeli so kepe so kine kine korop ma wakonge.

¹⁶ Mo sogino Kaisaleŋo ŋei ŋerep qeliŋongi yau yaup gekoi,

¹⁷ Ŋo naso baŋem eŋe eŋine kine ŋei ŋerep sikanonge, eya wane eŋe masi weku mane ma mageyake, eŋe koya qeliwo ŋine qakki ket okanmaike, eŋe eki zaguk maki wele qe okanmami, eŋe ŋara ŋibon okanmaike, so koto ŋino wet peseŋo qe watkemaike, eŋe ŋinane bakomŋine kito okanmaike.”

¹⁸ Paki ere don eya edankoik, ŋo ere ŋei ŋerep eŋe rawetonbik erane bakom kito soe soep mi maikei wane urata suwaine makoik.

¹⁹ Pakiso, Yuda ŋei natne, Antiok matko Pisidiya kepeo ŋine, so natne Ikonium ŋine, eŋe ŋei ŋerep magu eya ebuwi, eŋe Paulo wesiŋo qeu paki, waraŋka ma ket mat ŋadino birakau paki, rakoi Paulo mo seukmaike.

²⁰ Ŋo, mali malip ŋei ŋerep magu eŋe Paulo wano lewageu paki lolikka okorakoi, Paulo eŋe koso wiye more mat koto waketke, kepe qaeki eŋe so Barnabas ere Derbe matko arikoik.

Barnabas So Paulo Ere Antiok, Siriya Kepeo Zinge Arikoik

²¹ Paulo so Barnabas ere kisi maep don eya Derbe matko ra qelaŋanbik eya wane ŋei ŋerep loutne eŋe Waom mogat kakoi, pakiso ere zinge Listra matko ari more, eya ŋine, Ikonium so Antiok matko, Pisidiya kepeo lolike arikoik.

²² Ere mali malip magu zonom ebongoik, so mali malip wele eyao kito gekei wane, dokoetne mat eyao korop ma togole edangoik. Ma togole one rakoik, “Ŋine Waomze koboboine mogat kaikei, ŋene Kaisale wane gege maep kepeo wakesikene eya wane ŋene kepe iwao umat wikile loutne desikene.”

²³ Ere mali malip ŋei ŋerep maguine maguine eŋano ari more, sawe ge meŋenka more ware ware maguine maguine doku tau tau magu eŋane biraongoik, yale waka Aposolo ere ŋei ŋerep eya mali malip korop doku tau tau Waomzane meteo biraongoik.

²⁴ Ere Pisidiya kepe korop lolike ari more sari Pampiliya kepeo lotkekoik.

²⁵ Ere Perga matko kisi maep don ra qelaŋane more Ataliya matko ari ketkoik.

²⁶ Eso yewa ŋine eŋe seki kutno wa more, kito zinge Antiok matko, Siriya kepeo arikoik, kepe yewao ere alakan doku tau tau magu edo ere Kaisale wane metino bira ore more, mosop ore wareotpi urata eya maikeik wane meŋen kakoi. Wane yekuwat namo urata eya mo mauk qoeki, ere zinge arikoik.

²⁷ Ere Antiok matko lotke more mali malip magu qeturaŋ one more, Kaisaleŋo yeye kine kine erano maki wakonge, eya wane don kisi korop edangoik, so Kaisaleŋo qelaŋ ŋei ŋerep Yuda ŋadino gekoi, eŋe Kaisale malipkakoi, wane eŋane numa lalaŋge, eya wane ere korop edangoik.

²⁸ Ere naso kiroine mali malip ŋei ŋerep eŋerop eya metkoik.