2 Timoti 2 - Ono

Timoti Eŋe Kristo Yesu Wane Kawali Ŋei Mayakatne

¹ Ŋo medepne, ge yemo Kristo Yesu wano ŋine wet pesekze pamaike, yewa ŋine togole togole marat kaikene.

² Don korop ge detnannom, na ŋei ŋerep eŋane kaitko ra qelaŋangole, don yewa ge malip kanom paki, ŋei natne don maine wareka okanmami, eŋe ebonnom edo maine eweke more, ŋei ŋerep natne yale waka kito edanikei.

³ Ge Kristo Yesu wane kawali ŋei mayakakatne okane more urata iwa wane umatine ŋenerop tewekkene.

⁴ Kawali ŋei mane eŋe ware wareineŋo kaki paki, wet pesek desiyakane raki paki, ŋei ŋerep yauwine eŋane gege yaline mi ge okanmaike, midakaka.

⁵ Biririk biririk ŋei mane eŋe biririke more lewine yaup mi mayake. I midakaka, eŋe biririk biririk wane don numa pamaike, yewa dere tewekeyake, ŋo yemo yuwane more lewine mayake.

⁶ Ŋei mane eŋe ŋara urata togole mayake, oŋo ŋara lewine alakane more, eu yewa wane kotino ŋine neyake.

⁷ Na don eya ramaile, eya wane iwa yale desikene, baŋ Waomŋo dereretŋone ma lotkeki, ge don iwa wane kine korop desikene.

⁸ Ge Yesu Kristo detlukkaikene, eŋe seuseuwoŋine wisikae wiyeke, eŋe Davit wane ŋosa wili wiliine, kisi maep donŋo yale rake, na don yewa ra qelaŋanmaile.

⁹ Na kisi maep don iwa ra qelaŋanbe, ŋei eŋe eya wane naŋane ŋei borikine rau paki, wikile kinekine kutno motmami, so borikine mama yale mulap togogoleŋo weneŋ wokom nanbi metmaile, ŋo siluŋ Kaisale wane don yemo mulap urumgo maine mi birakaikei.

¹⁰ So na yewa wane rawe paki, wet dereretne ma togole more umat kinekine yewa teweke okoramaile, yewa mo Kaisale oŋomka ŋei ŋerep magukoune alakan ma wesake biraonge, eŋe weneŋ gege maepine Kristo Yesu wano pamaike, yewa so gege togon qeli ewe zonom gorop yewa maikei wane, na qesiŋ onmaile.

¹¹ Don iwa yemo welekatne, “Ŋo ŋene eŋerop weneŋ seukkonane, ŋene baŋ koso eŋerop yalewaka wiye gekene,

¹² Ŋo ŋene takotke more togogole okorakene, ŋene baŋ yale waka eŋerop ŋei waom okan warekene. Ŋo ŋene eŋe bisoune qekeneo, eŋe yalewaka baŋ ŋenane bisopze qeyake.

¹³ So ŋene aŋaine tewekkenane raŋem paki, koso qewoloŋgene. Ŋo eŋe yemo aŋa tewe tewekka geyake, eŋe oŋomka aŋaine mi birayake, midakaka, urata mama ŋei wele, eŋe eŋetine Kaisale wane kaitko pamaike.”

Kaisale Wane Urata Ŋei Wele

¹⁴ Ge naso baŋem don iwa ŋei ŋerep magu kopŋone qe wirike edan okanikene, so ge Kaisale wane kaitko girem don togole edannom, eŋe don yauwinane kawali zok misuk qekei. Masi tanik yalineŋo ŋei mane maine mi mapik kayake, midakaka, yemo ŋei wa ketene more, don yaline det okanmami, eŋane wetene matali okanmaike.

¹⁵ Eya wane, ge urata togogole ma more, so Kaisale wane kaitko urata ŋei wele okane gekene, paki ge Kaisale wane don welekatne koboine, yewa gamu midaine Kaisale wane kaitko kito edanlukkene.

¹⁶ Don kinekine yauwine so qelaŋ don wele midaine, yewa kakak kaikene, don kinekine yalineŋo ŋei natne zok tebaongi, Kaisale ŋadekka eri abaran ge okanmami.

¹⁷ Ŋei yaline eŋane don kito eda edanene, yemo baŋ kubet suwaineŋo sola so bikum zatkeki ari okan okanmaike, ŋei yewa eŋane kito eboebon kimatkeene etke, Himenaeus so Piletus.

¹⁸ Ŋei yaline eŋe don wele yewa qeliŋkau paki, iwa yale ra okanmami, “Ŋene mo wisikae wiyekone, baŋ koso ŋado mi wisikae wiyekene.” Don yale rau paki, ŋei natne eŋane wet mali malipene ma qororoŋ okanmami,

¹⁹ Ŋo Kaisaleŋo bosiŋ togole, sele paŋpoŋine mo yaso biraki ketke okoramaike, yewamo ruzakeu maine mi okmageyake, pakiso, don iwa yale kutno qeke, “Waom eŋe ŋei ŋerep magukoune eŋine biŋek, eya mo deton waremaike, so, ŋei ŋerep natne eŋe raikei, ‘Ŋene Waom wane biŋek’, yale rau paki, eŋe borikine yewa ŋadek kaikei.”

²⁰ Mat suwaine mane wane kotino yewao pelet suwaine loutne so lase loutne kine mane kine mane met waremaike. Natne silwaŋo mamaine, natne golŋo mamaine, natne ekiŋo mamaine, ŋo natne kepeŋo mamaine. Natne urata wele mot mot wane, ŋo natne eya urata yauwine mot mot wane.

²¹ Eya wane ŋei mane eŋe masi tanik qotkoine yewa korop qeliŋka wareki paki, koboboine geyake, ŋei yewa eŋe pelet suwaine urata wele mot mot eya wane rokop, eŋe baŋ urata mane wele yewaoka talekaki mayake, onoka wane, eŋe suwaineinane aŋaine teweke qesiŋka okanmaike, eŋe mo ewekmaike, eya wane urata kinekine wele yewa maine mayake.

²² Ŋei qaluwit eŋane weteno dereret borikinekine kine wakongi, wetke mage okanmami, ge masi tanik yewa ŋadek kaikene. Pakiso ge tanik manik maine, koboboine, mali malip wetŋo Waom malipka more, ŋei ŋerep sunka ebo ebon, so peyam gege, yewa ŋei natne wet qelaŋan gorop gemami, eŋerop Waomŋo qesiŋ ŋuniyakane eŋetine ora meŋen kaikei.

²³ Ŋo ge yemo don kinekine sinoine ŋei qelaŋine, dereretene midaine, eŋane don yewa ŋadek kaikene, ge mo detmaine, don yalineŋo kawali ma wakon okanmaike.

²⁴ Waom wane qelit ŋei, eŋe aŋa soraŋ misuk okan oniyake. Eŋe ŋei korop wetineŋo kima ebuyake, so kito eboebon mayakakatne wetne pesekakatne geyake.

²⁵ Eŋe urata bororom maki paki, ŋei don qeqe eŋane wetene ma peseyake. Eŋe yale okangi, Kaisale oŋom qesiŋ one more, wetene maingeki eŋe don welekatne yewa maine detluk kaikei,

²⁶ paki, eŋe baŋ koso dereretene lotkeki, alakan Ŋei Borikinane upiko waketpi ebuki, eŋane aŋaine teweke more, qelitine qe gekoi, upik yewa ŋine baŋ maine kakakka saket arikei.