1 Timoti 5 - Ono

Ŋei Ŋerep Ma Koboe Onikenane Don

¹ Ge ŋei mane suwaine don gereunerop misuk olasikene, olatkenane okannom paki, yemo magane ranom paki, don bororomgo olasikene, ŋo ŋei medep yemo ŋon tarekopne yale ram pakiso, tikŋaneŋ makoboe onikene.

² Ŋo sele ŋerep yemo nagakopne yale ranom paki, bororom makoboe onikene, ŋo ŋerep natewen eŋe yemo kiyarokopne yale detnom paki, wetŋone koboboineka paki edora edanikene so makoboe onikene.

Ŋerep Mala Eŋane Don

³ Ŋerep mala ŋaokopene welekatne seuseune eŋane eweene kito more mapitongene.

⁴ Ŋerep mala, mane eŋe gipon borasokoune me ŋosakoune gekeiwo, yemo eŋe kisi maep wane numa iwa yale okanikei, eŋe aŋa tewe tewek pamaikane, nabok magak so aso migakopene eŋane turuŋine ma suluke wareone more, qelitene qekei, onoka wane yale okanbi, Kaisaleŋo detki menageyake.

⁵ Ŋerep mane eŋe welekatne mala, doko ŋosakoune midaine, maŋo warekayake, eŋe wetneŋo Kaisale wane motki paki, qesiŋ kayakane takorakot ruwo so kaiwe meŋenka more olasiyake, eŋe mala wele raki paki mapit ongene

⁶ Ŋo mala ŋerep mane eŋe solainane don teweke bailalaŋ urata mayakeo, eŋe siluŋ wisikauneŋo koso seuseune yale okaniyake.

⁷ Don iwa edan lukenom dere more maneŋo sot mane misuk ma wakoniyake.

⁸ Ŋo mane eŋe kimakoune so eŋine weŋem sotakkoune mi ma suluke ware oniyake, eŋe mali malipine mo qeliŋgi paki, qelaŋ ŋei eŋane gege yewa yuwane, qelaŋ togole okaniyake.

⁹ Ŋerep mala mane eŋe komaine 60 mi maratkaki, ŋerep mala natne eŋane eŋet tegoo misuk takot kekene, ŋo mane eŋe ŋaune weku maki paki, eŋeropka geki paki, seukke eŋe koma 60 okangi, maine eŋetine mosikene.

¹⁰ So eŋe urata kinekine mayakatne mauluke make, kineine yale desikei, so eŋe gipon borasokoune ebuki paki mauluk one more mire gume onge, me eŋano ŋei lobo sariu ebu more matino koto biraonge, me Kaisale wane ŋei ŋerep eŋane kiyeene saukke, ket qeqine bori worine maulukonge, so eŋe mauluk mauluk urata kinekine mayakatne make, kine yale dere more ŋerep yaline eŋane eŋetka qekene.

¹¹ Ŋo ge ŋerep ŋaokopene seuseune eŋane eŋetene eyamo misuk ekapko qekene, onoka wane eŋe ŋei koso ebukei wane simileene paki Kristo ŋadekka okanmami.

¹² Paki alakan rara togon donene yewa qebarake more, sot korop okan okanmami.

¹³ So urata kito qoke more qewoloŋ ge okanmami, so yewaka mida, eŋe mat maneo ŋine mat maneo wawa ketket ge okanmami, paki don sinoine borikine yewa natne eŋano ŋine kobu ma ari more, don kinekine mi raraine, yewa rau suwa ari okan maike.

¹⁴ Eya wane, na iwa yale ramaile, ŋerep ŋaokopene seuseune eŋe koso ŋaokopene ebuwi paki, doko medewekopene qepokeu paki, kat matene mauluke warekaikei, yale okane geu, ŋabakopze eŋe don borikine ŋedangei wane numa zuwage more qeliŋgei.

¹⁵ Ŋene ŋerep mala weŋem musele natne eŋe mo ikopka numa qeyau more, Ŋei Borikine mogatka ari okanmami.

¹⁶ Ŋerep mane eŋe mali malip korop, eŋane keuwo ŋine mala ŋerep natne gekeiwo, yemo oŋo mala yewa kito qesiŋ ebuyake, eŋe umat yewa doku tautau magu eŋane kuteno misuk mosiyake, pakiso doku tautau magu eŋe mala ŋerep sotawekopene midaine, yewaka weku kito qesiŋ ebukei.

Ŋetne Wareongenane Don

¹⁷ Ŋei sele ŋetne urata weku mane maulukke ma okanmami, eŋe doku tautau magu ŋine lewine mawa more qoleonikei, ŋetne urata togole ma more Kaisale wane don edan okanmami, so kito ebon okanmami, yewa eŋane ramaile.

¹⁸ Kaisale wane ekapko yale ramaike, “Bulamakau eŋe kineŋo urata mau, wit lapelekki ariki, aŋaine misuk mawon gekene, eŋe maine neyake, yale waka urata mama ŋei eŋe lewine maine mayake.”

¹⁹ Ŋei ŋetne mane wane qalosip don wakongi, ŋei wekuŋo raki eŋane don misuk desikene, ŋei etke me kareweŋo rau so, yemo maine desikene.

²⁰ Ŋei ŋetne natne borikine maikeiwo, yemo ŋetne kimakopene eŋane kaitko don girem edannom, ŋetne kimakopene eŋe one more kaet oniyake.

²¹ Na Kaisale wane kaitko, so Kristo Yesu wane kaitko, so aŋelo koboboine eŋane kaiteno, don ra togole more rawe detnom, na don golat warekole, yewa qeligenom mane misuk kesiyake, so geŋone wetŋono qeyau ŋei ŋerep tanik kine mane kine mane zok misuk qebin onikene, ge kine wekuka rokopko okanonikene.

²² Ge Waom wane urata ranom paki, ŋei mane esatka ma more misuk meteŋone lewino more mosop kaikene, eŋane sotŋo geŋane kutŋono wayakane, geŋone kotoŋone warekanom, libeka payake.

Zoma Don So Borikine Wako Wakon Wane Don

²³ Ge qom kiki so zoma wikile zok okangan okanmaikane dokuka misuk nekene, wain doku ewekine me nigatnemde weneŋ nenom, kaŋone qesiŋ kayake.

²⁴ Ŋei natne eŋane borikineene yemo kine ma wakon ma wakon naso mi bomileki, esatka didiwo wakongi, ka okanmaine, ŋo ŋei natne eŋane borikineene yemo sanka pamaike, ŋado wakoniyake.

²⁵ Rokop yalewaka tanik manik mayakatne eya wane weleine natne yemo esatka didiwo wakongi ka okanmaine. Ŋo natne sanka pamaike yewamo gemage yalewaka mi payake baŋ didiwo wakonwareyake.